ខេត្តស្វាយរៀង៖ ការិយាល័យការពារជំងឺឆ្លង និងមិនឆ្លងនៃនាយកដ្ឋានសុខភាព កាកបាទក្រហមកម្ពុជា សហការជាមួយសាខាកាកបាទ ក្រហមកម្ពុជាខេត្តស្វាយរៀងកាលពី ថ្ងៃទី៥ ខែសីហា ឆ្នាំ២០២០ បានចុះអប់រំផ្សព្វផ្សាយអំពីអនាម័យទឹកស្អាត បញ្ហាអេដស៍ និងជំងឺកូវីដ ១៩ ដល់ប្រជាពលរដ្ឋ និងអ្នកស្ម័គ្រចិត្តកាកបាទក្រហមកម្ពុជា នៅឃុំចន្ទ្រា ស្រុកចន្ទ្រា ក្រោមការឧបត្ថម្ភថវិកាពីបណ្តាញការងារអេដស៍ប្រចាំតំបន់អាស៊ីប៉ាស៊ីហ្វិក(អាត) ក្នុងគោលបំណងដើម្បីអប់រំផ្សព្វផ្សាយស្តីពីវិធានការ ការពារជំងឺកូវីដ ១៩ និងអនាម័យទឹកស្អាត ការពារជំងឺដង្កាត់ផ្សេងៗ ដែលកំពុងរីករាលដាល នៅក្នុងសហគមន៍មួយចំនួននៅក្នុងប្រទេសកម្ពុជា។
ពិធីនេះបានការអញ្ជើញ ចូលរួមពីលោក សរ វណ្ណា នាយកសាខា លោក ថន ថាវុទ្ធា ប្រធានគណៈកម្មាធិការអនុសាខាកាកបាទក្រហមកម្ពុជាស្រុកចន្ទ្រា ព្រមទាំងប្រជាពលរដ្ឋ អ្នកស្ម័គ្រចិត្តកាកបាទក្រហម សរុបចំនួន ៥២ នាក់ ។
លោក ថន ថាវុទ្ធា មានមតិស្វាគមន៍ និង បានថ្លែងអំណរគុណ ដល់កាកបាទក្រហមកម្ពុជា ក៏ដូចជាសាខាកាកបាទក្រហមកម្ពុជាខេត្ត ដែលកន្លងមក ក៏ដូចជាពេលនេះបានយចិត្តទុកដាក់គិតគូរពីបញ្ហាសុខភាព របស់ប្រជាពលរដ្ឋនៅក្នុងសហគមន៍គ្រប់ពេលវេលា ។
ក្នុងឱការនោះលោក សរ វណ្ណា នាយកសាខា បាននាំមកនូវការផ្តាំផ្ញើសាកសួរសុខទុក្ខ ពីសំណាក់ឯកឧត្តម ម៉ែន វិបុល ប្រធានគណៈកម្មាធិការសាខា ដល់ប្រជាពលរដ្ឋ អ្នកស្ម័គ្រចិត្ត ទាំងអស់ដោយក្តីនឹករលឹក ហើយសូមកុំមានការព្រួយបារម្ភត្រូវគិតគូរពីសុខភាព ចំពោះបងប្អូនដែលទើបត្រឡប់មកពីក្រៅប្រទេស ត្រូវនៅដាច់ដោយឡែកពីគេរយៈពេល ១៤ ថ្ងៃ កុំឱ្យជួបជុំហូបចុកគ្រឿងស្រវឹងក្នុងពិធីផ្សេងៗ ។ ក្នុងករណីបើមានអាការដូចជាក្អក ក្តៅខ្លួន ផ្តាសសាយ គ្រុនក្តៅ ពិបាកដកដង្ហើម សូមទៅជួបគ្រូពេទ្យជំនាញដែលនៅជិតលោកអ្នកបំផុត រួចប្រាប់ព័ត៌មានអំពីប្រវត្តិនៃការធ្វើដំណើរ និងប្រភេទរោគសញ្ញាដល់គ្រូពេទ្យ ។
លោកនាយកសាខាបានបន្តទៀតថា តាមការវាយតម្លៃកម្រិតហានិភ័យ ដែលអាចមានលទ្ធភាពឆ្លងក្នុងសហគមន៍ របស់អង្គការសុខភាពពិភពលោក បានបង្ហាញថានៅក្នុងព្រះរាជាណាចក្រកម្ពុជា អាចឆ្លងទៅលើកក្តាដូចជា ការកើនឡើងនៃការហោះហើរ និងអ្នកដំណើមកប្រទេសកម្ពុជា មានការកើនឡើងនៃការនាំចូលជំងឺកូវីដ ១៩ អ្នកដំណើខ្លះមិនបានអនុវត្តឱ្យបានខ្ជាប់ខ្ជួននូវវិធានការចត្តាឡីស័ក នៅគេហដ្ឋាននៅមានកម្រិត។ល។ បន្ទាប់មកក្រុមការងារក៏បានផ្សព្វផ្សាយ ពីវិធីការការពារ ថែទាំ និងកាត់បន្ថយហានិភ័យពីការឆ្លងជំងឺកូវីដ ១៩ ដែលមានដូចខាងក្រោម៖
១/ លាងដៃញឹកញាប់ជាមួយសាប៊ូ និងទឹកស្អាត ឬអាល់កុល ២/ខ្ទប់មាត់ និងច្រមុះ នៅពេលក្អកឬកណ្ដាស់ដោយប្រើកែងដៃ ឬក្រដាស់អនាម័យ រួចបោះចោលក្នុងធុងសំរាមឱ្យបានត្រឹមត្រូវ ៣/ ជៀសវាងប៉ះពាល់ ជិតស្និទ្ធជាមួយអ្នកដែលមានគ្រុនក្ដៅ ក្អក ឬផ្ដាសាយ ៤/ ជៀសវាងប៉ះពាល់ភ្នែក ច្រមុះ ឬមាត់ ៥/ បរិភោគ អាហារដែលចម្អិនបានល្អ ៦/ស្វាគមន៍ដោយសំពះជំនួសការចាប់ដៃ ក្នុងករណីសង្ស័យជំងឺកូវីដ ១៩ បុគ្គលដែលមានរោគសញ្ញាយ៉ាងតិចមួយក្នុងចំណោមសញ្ញាដូចតទៅ៖គ្រុនក្ដៅយ៉ាងតិច ៣៨ អង្សាសេ ក្អកហៀរសំបោរ ឈឺបំពង់ក ហត់ពិបាកដកដង្ហើម និងមានប្រវត្តិធ្វើដំណើរឬស្នាក់នៅក្នុងប្រទេសផ្សេងទៀត ក្រៅពីប្រទេសកម្ពុជា ឬបានប៉ះពាល់ជាមួយអ្នកជំងឺកូវីដ ១៩ (បញ្ជាក់ពីមន្ទីរពិសោធន៍ក្នុងអំឡុងពេល១៤ថ្ងៃ) មុនចេញរោគសញ្ញា ។ អ្នកជំងឺ រលាកផ្លូវដង្ហើមធ្ងន់ធ្ងរ (គ្រុនក្ដៅនិងមុខសញ្ញារលាកផ្លូវដង្ហើមយ៉ាងតិចមួយ ដូចជា ក្អក ហត់ ពិបាកដកដង្ហើម) ដោយមិនដឹងមូលហេតុច្បាស់លាស់ និងតម្រូវឲ្យសម្រាកនៅមន្ទីរពេទ្យ ។ ក្នុងថ្ងៃនេះដែរក្រុមការងារក៏បាន ចែកជូនអ្នកចូលរួមចំនួន ៥២ នាក់ ក្នុងម្នាក់ទទួលបានអាល់កុល ១ ដប សាប៊ូ ១ ដុំ ម៉ាស ១ ខិត្តប័ណ្ណអប់រំផ្សព្វផ្សាយផ្ទាំងតូច ១ សន្លឹក និង ខិត្តប័ណ្ណអប់រំផ្សព្វផ្សាយផ្ទាំងធំ ១ សន្លឹកផងដែរ ៕ដោយ៖វ៉ៃកូ
