ក្រុងព្រះសីហនុ ៖ រថយន្តដឹកស្រាបៀរអង្គរមួយគ្រឿង ឡើងចំណោតមិនរួច រអិលថយក្រោយក្រឡាប់នៅតាមផ្លូវជិតរោងចក្រស្រាបៀរអង្គរ ឃ្លាំងលើក្នុងសង្កាត់លេខ១ ក្រុងព្រះសីហនុ វេលាម៉ោងជិត១០និង៣០នាទីព្រឹក ថ្ងៃ៦ ខែសីហាឆ្នាំ២០២០។ បើតាមពលរដ្ឋអ្នកឃើញហេតុផ្ទាល់ថា សំណាងណាស់ដែលមិនមានមនុស្សរងគ្រោះថ្នាក់ និងថាផ្លូវនេះ ចំណោតខ្លាំងត្រង់ចំណុចឡើងមករកផ្លូវជាតិលេខ៤ ដែលងាយបង្កគ្រោះថ្នាក់។
ទោះយ៉ាងណា អ្វីដែលហួសចិត្តខ្លាំងបំផុតនោះ គឺខណៈពេលឃើញឱកាសដ៏ល្អនេះហុចឲ្យ ប្រជាពលរដ្ឋទាំងប្រុសស្រី ពិសេសអ្នករស់នៅកន្លែងកើតហេតុ បានសម្រុកចូលទៅដណ្តើមគ្នាប្រមូលយកកំប៉ុងស្រាបៀរ ច្រកយកទៅផ្ទះទាំងការ៉ុងៗ។
ក្នុងនោះផងដែរ បើទោះជាកម្លាំងសមត្ថកិច្ច ចុះមករារាំងយ៉ាងណា ក៏ក្រុមឆ្លៀតឱកាសទាំងនេះ ពុំខ្លាចញញើតឡើយ ដែលទាល់តែសមត្ថកិច្ចប្រើវិធានការក្តៅ ទើបពួកគេដកថយ។
ក្រោយពីបានឃើញរូបភាពដ៏អាក្រក់មើលនេះរួច ក្នុងនោះអ្នកលេងហ្វេសប៊ុកម្នាក់បានខមិនដាក់ទៅលើស្រីៗ ដែលខំប្រឹងចូលទៅដណ្តើមស្រាដូចដណ្តើមមាសពេជ្រយ៉ាងដូច្នេះថា៖ «ចង់បានម្ល៉េះ! យកទៅមិនសុខទេ ដឹងប្តីផឹកស្រវឹងប្រើហឹងស្សា កូនផឹកស្រវឹងបើកបរគ្រោះថា្នក់តាមផ្លូវពុំខាន វាជារបស់ក្តៅក្រហាយ ថោកអីនឹងស្រាបៀរមួយកំពុង 2000 រៀលហ្នឹង ។ ទង្វើរដ៏អាក្រក់មើលបែបនេះ គឺវាពិតជាធ្វើឲ្យប៉ះពាល់ដល់សង្គមយើងជាខ្លាំង»៕ ដោយ៖ លឹម ហុង
