ភ្នំពេញ ៖ ករណីម្ចាស់រថយន្ត Land Cruiser ជាថៅកែហាងសាច់អាំង ហេង ហេង ដែលបើកឡានដេញបុករថយន្ត Prius ទាំងកំរោលនោះ ឯកឧត្តមឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានឲ្យដឹងនៅព្រឹកថ្ងៃទី៨ ខែសីហា ឆ្នាំ២០២០នេះថា ករណីរថយន្ដ Land Cruiser បើកបុករថយន្ត Prius សមត្ថកិច្ចនគរបាលរាជធានីភ្នំពេញ កំពុងចាត់ការហើយ។
ឧត្ដមសេនីយ៍ឯក ស ថេត បានបញ្ជាក់ថា បើម្ចាស់រថយន្ត Land Cruiser មិនចូលខ្លួនដោះស្រាយទេ សមត្ថកិច្ចនឹងស្នើសុំតុលាការចេញដីកាតាមចាប់ខ្លួនតែម្ដង ។ សង្ឃឹមថា សមត្ថកិច្ចនឹងនាំខ្លួន ញ៉ សុខហេង មកទទួលខុសត្រូវចំពោះមុខច្បាប់ឆាប់ៗជាក់ជាពុំខាន ។
ម្ចាស់រថយន្ត Land Cruiser ដែលបើកឡានដេញបុករថយន្ត Prius ទាំងកំរោលដោយមិនដឹងមូលហេតុនោះ គាត់មានឈ្មោះ ញ៉ សុខហេង និងជាថៅកែហាងសាច់អាំង ហេង ហេង នៅផ្លូវ ៥៩០ សង្កាត់បឹងកក់ ២ ខណ្ឌ ទួលគោក ។
ឡានដែលគាត់បើកបុកគេនោះជាឡានបង់រលោះ របស់ក្រុមហ៊ុន លី ហួរ លីស៊ីង ភីអិលស៊ី ។
សូមបញ្ជាក់ថា មានករណី រថយន្ដ Land Cruiser ពណ៌ស តាមរយៈកាមេរ៉ាវីដេអូសុវត្ថិភាព ឃើញថា បានបើករថយន្តរបស់ខ្លួនបុកជាមួយរថយន្ត Prius មិនដឹងមូលហេតុ ដោយបើកបុកពីមុខមិនអស់ ចិត្តហើយនៅបត់ឡានតាមដេញបុកពីក្រោយថែមទៀត ។ ហេតុការណ៍នេះបានកើតឡើងនៅថ្ងៃទី២០ ខែកក្កដា ឆ្នាំ២០២០ នៅខណ្ឌទួលគោក ។
តាមរយៈផ្លាកលេខរថយន្ត Land Cruiser ដែលបានបន្សល់ទុកនៅកន្លែងកើតហេតុ 2AW-2099 ភ្នំពេញ ជារបស់ក្រុមហ៊ុន លី ហួរ លីស៊ីង ភីអិលស៊ី ផ្ទះលេខ ២៤៣-២៤៤ ផ្លូវ ៥៩៨ ភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ ។
ម្ចាស់រថយន្ដ Prius ជាអ្នករត់តាក់ស៊ីពេលរាត្រី ដែលត្រូវរថយន្ដ Land Cruiser ពាក់ផ្លាកលេខភ្នំពេញ 2AW-2099 ដេញបុកទាំងកម្រោលយ៉ាងរន្ធត់នោះ បានសម្រេចដាក់ពាក្យ បណ្ដឹងជាផ្លូវការទៅស្នងការដ្ឋាននគរបាលរាជធានីភ្នំពេញ ដោយប្ដឹងពីបទ ប៉ុនប៉ងឃាតកម្ម និងធ្វើឲ្យខូចខាតដោយចេតនា មានស្ថានទម្ងន់ទោស។
នៅព្រឹកថ្ងៃទី៧ ខែសីហា ឆ្នាំ២០២០នេះ ជនរងគ្រោះឈ្មោះ ផន សុភ័ក្ដ្រ បានដាក់ពាក្យបណ្ដឹងប្ដឹងឈ្មោះ ញ៉ សុខហេង មានទីលំនៅផ្ទះលេខ២៨ ផ្លូវលេខ៥៩០ ភូមិ១០ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ក្រោយបើករថយន្ដដេញបុករបស់ខ្លួន កាលពីថ្ងៃទី២០ ខែកក្កដា ឆ្នាំ២០២០។
ក្នុងពាក្យបណ្ដឹងក្រៅពីសុំឲ្យសមត្ថកិច្ចអនុវត្តតាមផ្លូវច្បាប់ហើយនោះ ជនរងគ្រោះ ផន សុភ័ក្ដ្រ បានសំណូមពរទាមទារសំណងខូចខាតរថយន្ដ ចំនួន១២.០០០ដុល្លារ និងសំណងជំងឺចិត្ត ចំនួន៣០.០០០ដុល្លារ។
បុរសអ្នករត់តាក់ស៊ីម្នាក់ បានបញ្ចេញវីដេអូបើករថយន្ដដេញបុកទាំងកំរោល ពីសំណាក់បុរសម្នាក់នៅខណ្ឌទួលគោក បណ្ដាលឲ្យរថយន្ដរបស់ខ្លួន រងការខូចខាតយ៉ាងធ្ងន់ធ្ងរកាលពីយប់ថ្ងៃទី២០ ខែកក្កដា ឆ្នាំ២០២០កន្លងទៅ ប៉ុន្ដែរហូតមកដល់ពេលនេះ អស់រយៈពេលជាង១០ថ្ងៃមកហើយ ជនបង្កមិនបានចូលខ្លួនមកដោះស្រាយ ទទួលខុសត្រូវចំពោះផ្លូវច្បាប់នោះទេ។
លោក ផន សុភ័ក្ត្រ ដែលជនរងគ្រោះបានរៀបរាប់ពីព្រឹត្តិការណ៍នេះថា កាលពីយប់ថ្ងៃទី២០ ខែកក្កដា ឆ្នាំ២០២០ វេលាម៉ោងរំលងអធ្រាត្រ លោកត្រូវបាននារីម្នាក់ហៅទៅដឹកនៅក្បែរហាងសាច់គោអាំង ហេងហេង។ ពេលលោកបើកទៅដល់ក្បែរហាងចម្ងាយប្រហែល២០ម៉ែត្រ ដើម្បីរង់ចាំពីនារីម្នាក់នោះ ក៏ត្រូវបាននាងប្រាប់ថា ចេញមិនរួចដោយត្រូវបានគេចាក់សោជាប់ ហើយលោកក៏រៀបចំបើករថយន្ដចេញ។ ប៉ុន្ដែភ្លាមៗនោះស្រាប់តែអ្នកបើករថយន្ដ Land Cruiser មកបុកចំពីមុខលាន់យ៉ាងខ្លាំង។ ភ្លាមនោះលោកបានបើករថយន្ដរត់ ប៉ុន្ដែត្រូវជនបង្កបើកដេញតាមទៅបុកមួយតង់ទៀត បណ្ដាលឲ្យរងការខូចខាតផ្នែកខាងក្រោយយ៉ាងធ្ងន់ធ្ងរ រហូតរថយន្ដបង្កជ្រុះផ្លាកលេខនៅកន្លែងកើតហេតុទៀតផង។
តាមរយៈវីដេអូកាមេរ៉ាសុវត្ថិភាព ដែលជនរងគ្រោះបង្ហាញឃើញថា ខណៈដែលជនរងគ្រោះកំពុងឈប់រថយន្ដ ស្រាប់តែរថយន្ដ Land Cruiser មកបុកចំពីមុខយ៉ាងខ្លាំងអូសប៉ុន្មានម៉ែត្រ រួចអ្នកបើករថយន្ដ Prius បានបើកគេច តែត្រូវរថយន្ដ Land Cruiser បើកដេញតាមទៅបុកនៅគោលដៅទី២ មុននឹងបើកគេចខ្លួនតែម្ដង៕
ដោយ៖បញ្ញាស័ក្តិ
