ភ្នំពេញ ៖ ស្ត្រីម្នាក់បើករថយន្តម៉ាកព្រូស ឆ្លងភ្លើងស្តុបលឿនពេក ជ្រុលបុកបុរសម្នាក់ជិះម៉ូតូហុងដាឃ្លីកដួល ហើយរេចង្កូតមកបុកបុរសម្នាក់អង្គុយលើកង់បីអានកាសែត ក្រឡាប់រថយន្តមិនទាន់អស់ល្បឿន បន្តបុកបង្គោលភ្លើងបំភ្លឺផ្លូវបណ្ដាលរងកាខូចខាត សំណាងល្អមានអ្នករបួសស្រាល២នាក់ លើកដាក់លើម៉ូតូកង់បីយកទៅមន្ទីរពេទ្យឯកជនដើម្បីសង្គ្រោះ ដែលហេតុការណ៍នេះបង្កការភ្ញាក់ផ្អើល កាលវេលាម៉ោង៧និង០០នាទីព្រឹកថ្ងៃទី៨ ខែ សីហា ឆ្នាំ ២០២០ នៅចំណុចស្តុបវត្តលង្កា តាមផ្លូវព្រះសីហនុ កែងផ្លូវ៥១សង្កាត់ បឹងកេងកងទី១ ខណ្ឌបឹងកេងកង ។
ស្ត្រីនោះ ឈ្មោះទ្រឿង គីចលាង អាយុ ២៩ឆ្នាំ ស្នាក់នៅខេត្តក្រចេះ ជាអ្នកបើកបររថយន្តព្រូសពណ៌ប្រផេះ ពាក់ផ្លាកលេខភ្នំពេញ ២AY-១៨៨២ ។ មុនកើតហេតុ នាងបានប្រាប់នគរបាលថា គាត់បើកតាមផ្លូវព្រះសីហនុ ក្នុងទិសដៅពីលិចទៅកើតភ្លើងស្តុបខៀវ ស្រាប់តែភ្លើងលោតមកក្រហម ក៏គាត់ជាន់បន្ថែមល្បឿនឲ្យផុតស្តុប តែចៃដន្យមានបុរសម្នាក់ បើកម៉ូតូហុងដាឃ្លីកពាក់ផ្លាកលេខ នគរបាល ១-១៩៩៥ ឆ្លងកាត់ទទឹងផ្លូវតាមផ្លូវ៥១ ក្នុងទិសដៅពីជើងមកត្បូងជាន់ហ្វ្រាំមិនទាន់ បុកម៉ូតូឃ្លីករួចបន្តរេចង្កូតបុកម៉ូតូកង់បីចតនៅលើចិញ្ចើមផ្លូវ ប៉ើងក្រឡាប់ម៉ូតូកង់បី ជ្រុលទៅបុកបង្គោលភ្លើងបំភ្លឺផ្លូវរបស់សាលាក្រុង បណ្ដាលខូចខាត ក្នុងនោះសំណាងល្អមិនមានរបួសធ្ងន់ គ្រាន់តែបុរស២នាក់របួសស្រាល យកទៅមន្ទីរពេទ្យដឹកតាមកង់បី ។ ភ្លាមស្ត្រីអ្នកបើកបររថយន្តគាត់មិនមានរបួស ហើយមិនរត់គេចដែរ ។ រថយន្តខូចខាតផ្ទុះពោងសុវត្ថិភាព និងខូច១កំណាត់ខាងមុខទាំងសុង ។
នគរបាលបានទំនាក់ទំនងទៅនគរបាលការិយាល័យចរាចរណ៍ផ្លូវគោក ស្នងការរាជធានីភ្នំពេញ ដើម្បីមកវាស់វែងយករថយន្តបង្កហេតុ និងម៉ូតូ២គ្រឿង រក្សាទុកដោយសារខូចខាតសម្បត្តិរដ្ឋផង រង់ចាំធ្វើការដោះស្រាយពេលក្រោយទៀត ។ តាមស្ដាប់និងពិនិត្យកន្លែងកើតហេតុ ស្ត្រីអ្នកបើកបររថយន្ត បើកបរគ្មានការប្រុងប្រយ័ត្ន ពេលជួបបញ្ហាទប់ស្មារតីមិនបាន ដោយរថយន្តបន្ថែមល្បឿនខ្លាំងពេក។ នគរបាលផ្នែកចរាចរណ៍អំពាវនាវ ដល់ប្រជាពលរដ្ឋ សូមមេត្តាបើកបរគោរពច្បាប់ និងស្លាកសញ្ញាចរាចរណ៍ទាំងអស់គ្នា ជៀសវាងគ្រោះរបួស និងស្លាប់ កុំឲ្យបងប្អូនគ្រួសារអ្នកគ្រោះ មានការស្រក់ទឹកភ្នែក ដោយសារអ្នកបើកបរធ្វើប្រហែសមួយប៉ប្រិចភ្នែក៕
ដោយ៖កូឡាប
