ប្រិយមិត្ត និងមហាជនជាច្រើន ពិតជាបានជ្រាបរួចហើយ ទាក់ទងនឹងវីដេអូឃ្លីបមួយ បង្ហាញស្ត្រីម្នាក់ដឹកកូនស្រីតូចៗ២នាក់ ចូលទៅលួចកាច់ស្លឹកសាវម៉ៅក្នុងចម្ការគេ ដើម្បីយកមកដាក់តាំងនឹងសាវម៉ៅរបស់ខ្លួន ដែលទិញមកពីស្រែអំបិលគេមិនឲ្យស្លឹក ដើម្បីឲ្យមើលទៅស្រស់។
ក្នុងវីដេអូនេះផងដែរ ឃើញថាមានបងប្អូនជាច្រើន បានចូលខមិនរិះគន់ម្ចាស់ចម្ការ២នាក់ប្តីប្រពន្ធនោះថា គ្រាន់តែស្លឹកសាវម៉ៅ១ដៃសោះ ចាប់ដកសោម៉ូតូ និងសុទ្ធតែឲ្យគ្នាស្បថងាប់ចោលកូនទៀត ពិតជាមានចិត្តចង្អៀតចង្អល់ពេកហើយ លោកអើយ។
ទោះយ៉ាងណា ក្រោយឃើញមនុស្សមួយចំនួនធំ ដែលពុំដឹងហេតុផលច្បាស់ ចេះតែនាំគ្នារិះគន់ និងអ្នកខ្លះទៀតក៏ជេរប្រើពាក្យសម្តីហាក់អសុរសពេក ពេលនេះ បងប្រុសជាម្ចាស់ចម្ការបានចេញមកបកស្រាយរឿងនេះ។
តាមរយៈវីដេអូជិត ១០ នាទី ម្ចាស់ចម្ការរូបនេះដែលមានគណនីហ្វេសប៊ុកឈ្មោះ Mears Samnang Kuy បានរៀបរាប់ដំណើរដើមទងយ៉ាងដូច្នេះថា៖ «ចំពោះបងប្អូនដែលបានជេរខ្ញុំៗមិនប្រកាន់ខឹងនោះទេ តែពេលនេះ ខ្ញុំចង់ឲ្យបងប្អូនអាជីវករលក់ផ្លែឈើនៅខេត្តកំពត ជាពិសេសនៅទឹកឈូ បានយល់ថា សូមបងប្អូនអាជីវករកស៊ីឲ្យមានភាពស្មោះត្រង់នឹងគ្នា ជាមួយបងប្អូនយើងទាំងអស់គ្នា មានន័យថា បើយើងលក់ផ្លែឈើជារបស់ខ្មែរយើងៗ ប្រាប់គេថាជារបស់ខ្មែរយើង តែកុំយកផ្លែឈើយួន ឬ ថៃ ហើយមកលួចកាច់មែកសាវម៉ៅគេ ដូចជារបស់ខ្ញុំអ៊ីចឹង ដើម្បីយកទៅបន្លំគេ អាហ្នឹងវាមិនល្អទេ ដោយអី បងប្អូនយើងមកពីខេត្តផ្សេងៗចង់មកសាករសជាតិផ្លែឈើនៅខេត្តកំពតយើងថា មានរសជាតិខ្លាញ់ មានទាំងពីទុរេន សាវម៉ៅ មង្ឃុត ដូង ស្វាយសព្វគ្រប់បែបយ៉ាង សុទ្ធតែមានរសជាតិឆ្ងាញ់ ប៉ុន្តែ ដោយសារបងប្អូនអាជីវករខ្លះដើម្បីចង់ចំណេញ ទៅទិញផ្លែឈើមកពីថៃ វៀតណាម ហើយមកបន្លំគេអ៊ីចឹង វាធ្វើឲ្យប៉ះពាល់ដល់អ្នករកស៊ីសុចរិតទៀងត្រង់ អ្នកចម្ការដែលគ្នាខំដាំ…» ។
បងប្រុសម្ចាស់ចម្ការបន្តថា៖ «ខ្លួនខ្ញុំ ពុំមានចិត្តកំណាញ់ ចិត្តអន្តេរថី គ្រាន់តែស្លឹករ៤ ៥ ចាប់គាត់ ឬនិយាយអ្វីមិនសមរម្យអីទេ តែខ្ញុំគ្រាន់តែចង់ប្រាប់ថា អ្នកដែលលួចហ្នឹង គឺលួចរាល់ព្រឹករាល់ថ្ងៃតែម្តង ព្រោះថាដើមសាវម៉ៅនៅជិតផ្លូវចង់ងាប់អស់ហើយ ព្រោះកាច់ៗពេក ដោយឃើញស្រែកៗចង់ស្អកក…។ ប៉ុន្តែ ខ្ញុំចង់ឲ្យបងប្អូនទាំងអស់គ្នាហ្នឹង ជាពិសេសអាជីវករយល់ថា កុំរកស៊ីបោកប្រាស់ទៅលើអ្នកទិញ រកស៊ីឲ្យទៀងត្រង់ លក់តែផលិតផលខ្មែរយើង កុំយកផលិតផលយួនឬ ថៃ មកលក់បន្លំបងប្អូនយើង។ ពិសេសនៅពេលទុរេនឡើងបានថ្លៃ អ្នកខ្លះមិនដឹងដឹកមកពីណាទេ ខ្លះដឹកមកពីថៃ ពីយួន ដោយដឹកមកពេលយប់ មកទម្លាក់នៅមុខចម្ការគេ ហើយកុហក់គេថាទុរេនខ្មែរ ដើម្បីលក់បានថ្លៃ តែតាមពិត សុទ្ធតែទុរេនដាក់ថ្នាំគីមីមកពីយួន ថៃ…» ។
ឆ្លៀតក្នុងឱកាសនេះផងដែរ បងប្រុសជាម្ចាស់ចម្ការក៏បានស្នើដុំបងប្អូនរស់នៅផ្នែកខាងលើ ក្នុងតំបន់ទឹកឈូ សូមមេត្តាកុំបោះសំរាមចោលសព្វគ្រប់បែបយ៉ាង ដែលមានទាំងសំឡីអនាម័យស្ត្រី បណ្តែតតាមទឹកឲ្យរួចតែពីដៃ ដោយពុំគិតផលប៉ះពាល់ដល់បរិស្ថាន ជាពិសេសអ្នករស់នៅខាងក្រោម។ មួយវិញទៀត គាត់ក៏បានសំណូមពរដល់ភ្ញៀវទេសចរផងដែរ សូមហូបរួចហើយ មេត្តាយកសំរាមទៅដាក់ក្នុងធុងសំរាមឲ្យបានត្រឹមត្រូវផង កុំច្រកពីកន្លែងគេយកមកផ្លុងចោលតាមផ្លូវពាសវាលពាសកាល៕ ដោយ៖ លឹម ហុង