លោក Joseph Yun អ្នកតំណាងពិសេសអាមេរិចប្រចាំកូរ៉េខាងជើង បានថ្លែងថា សហរដ្ឋអាមេរិច ស្ថិតនៅឆ្ងាយណាស់ ក្នុងការប្រើប្រាស់វិធានការយោធាទៅលើឧបទ្វីបកូរ៉េ។
លោកថ្លែងប្រាប់អ្នកសារព៌តមាននៅក្នុងទីក្រុងតូក្យូ ប្រទេសជប៉ុនដូច្នេះថា “គោលនយោបាយរបស់ពួកយើងគឺដំណោះស្រាយសន្តិវិធីជុំវិញវិបត្តិនុយក្លេអ៊ែរកូរ៉េខាងជើង។ ពួកយើងធ្លាប់បាននិយាយម្តងហើយម្តងទៀតថា អ្វីដែលពួកយើងចង់ឃើញនោះគឺ ការចរចារ”។
លោកបញ្ជាក់ថា “ពួកយើងក៏បាននិយាយផងដែរថា រាល់ជំរើសទាំងអស់គឺស្ថិតនៅលើតុស្រាប់ ហើយគ្រប់ជំរើសទាំងនោះ ត្រូវតែមានជំរើសយោធា ប៉ុន្តែខ្ញុំមិនជឿថា យើងស្ថិតនៅជិតជំរើសយោធានោះទេ”។
នៅពេលសួរពីកិច្ចចរចាររវាងកូរ៉េខាងជើង និងកូរ៉េខាងត្បូង លោកបានថ្លែងថា វាគឺជាជំហានឆ្ពោះទៅកាន់គោលដៅដ៏ត្រឹមត្រូវ ប៉ុន្តែកិច្ចចរចាររវាងវ៉ាស៊ីនតោន និងព្យុងយ៉ាង ត្រូវតែជាជំហាន ដែលកូរ៉េខាងជើងនឹងត្រូវធ្វើដំណើរឆ្ពោះទៅកាន់ការបោះបង់ចោលនុយក្លេអ៊ែរ។
សូមបញ្ជាក់ដែរថា ស្ថានភាពនៅឧបទ្វីបកូរ៉េ ហាក់មានភាពស្ងប់ស្ងាត់ និងប្រសើរជាមុនបន្តិចក្រោយពេល កូរ៉េខាងជើង និងកូរ៉េខាងត្បូង បានកំពុងបន្តកិច្ចចរចារគ្នា។ អ្នកតំណាងពិសេសអាមេរិកថា ការប្រើប្រាស់ជំរើសយោធាប្រឆាំងព្យុងយ៉ាង ស្ថិតនៅឆ្ងាយណាស់៕ សុភ័ក្ត្រ
