បន្ទាយមានជ័យ ៖ ពលរដ្ឋជាអ្នកមានជំនឿរជាង១ម៉ឺននាក់ បានចូលរួមពិធីបួងសួងនិងនិមន្តព្រះសង្ឃជាង៥៥០អង្គបិណ្ឌបាត្រនាឱកាសបុណ្យមាឃបូជា នៅប្រាសាទបន្ទាយឆ្មារ ដើម្បីសេចក្តីសុខសន្តិភាព សេចក្តីចម្រុងចម្រើនតទៅទៀតនៅខេត្តបន្ទាយមានជ័យ ក៏ដូចជានៅក្នុងប្រទេសកម្ពុជា។
ពិធីនោះបានធ្វើឡើងពីរសៀលថ្ងៃទី៣១មករា រហូតដល់ថ្ងៃត្រង់ថ្ងៃទី ១កុម្ភះឆ្នាំ២០១៨ កន្លងមកក្រោមការរៀបចំនិងឧបត្ថម្ភរបស់រដ្ឋបាលខេត្តបន្ទាយមានជ័យ រដ្ឋបាលស្រុក ឃុំ មន្ត្រីរាជការស៊ីវិល កងកម្លាំង សហភាពសហព័ន្ធយុវជនកម្ពុជា អ្នកតំណាងរាស្ត្រ ក្រុមការងាររបស់លោកជំទាវឧកញ៉ា ម៉ៅ ម៉ាល័យ និងសហគមន៍ទេសចរណ៍ប្រាសាទបន្ទាយឆ្មារ។
លោកស្រីឧបនាយករដ្ឋមន្ត្រី ម៉ែន សំអន លោកស្រីឧកញ៉ា ម៉ៅ ម៉ាល័យ កែ គឹមយ៉ាន និងប្រតិភូភរិយាថ្នាក់ដឹកនាំ , លោក អ្នកសមាជិកសភាទាំង២ សមាជិករាជរដ្ឋាភិបាល លោកសួន បវរ អភិបាលខេត្តបន្ទាយមានជ័យនិងអភិបាលរងខេត្ត សមាជិកក្រុមប្រឹក្សាខេត្ត ស្រុក អភិបាលរងខេត្ត អភិបាលស្រុក មន្ត្រីរាជការស៊ីវិលកងកម្លាំង ពុទ្ធបរិស័ទ ជាង១ម៉ឺននាក់ចូលរួម ។
ពីធីបួងសួងក៏សុំលាងជម្រះបាបកម្ម អំពើអាក្រក់ អកុសលមួយចំនួនដែលបានប្រព្រឹត្តកន្លងមក ។ហើយសុំឧបទ្រពចង្រៃ និងសត្រូវ អមិត្តជិតឆ្ងាយដែលតាមយាយីអោយវិនាសបាត់រលត់ទៅ។
ថ្ងៃទី១កុម្ភៈ លោកស្រីឧបនាយករដ្ឋមន្ត្រី ម៉ែន សំអន លោកស្រី ម៉ៅ ម៉ាល័យ កែ គឹមយ៉ាន លោកអភិបាលខេត្តនិងមន្ត្រីអ្នកមុខ អ្នកការ ពុទ្ធបរិស័ទបានធ្វើពិធីសែនព្រេនបួងសួងនៅថែវនៃប្រាសាទបន្ទាយឆ្មារ បានធ្វើបទនមស្សការព្រះរតនត្រ័យ សមាទានសីល ហើយធ្វើសត្តប្បករណអភិធម្ម បង្សុកូល និងនិមន្តព្រះសង្ឃចំនួន៥៥៤អង្គមកពីគ្រប់ស្រុកក្រុងនៃខេត្តបន្ទាយមានជ័យនិងមួយចំនួនមកពីក្រុងភ្នំពេញ និមន្តគោចរបិណ្ឌបាត្រចង្ហាន់ និងទទួលទេយ្យទានពីមន្ត្រីនិងពុទ្ធបរិស័ទដ៏ច្រើនកុះករ។
នាឱកាសនោះ លោក សួន បវរ អភិបាលខេត្តបន្ទាយមានជ័យ ក៏ដូចជាអាចារ្យមង្គលដឹកនាំពិធីបានថ្លែងថា: ពិធីបួងសួងនិងពីធីបិណ្ឌបាត្រក្នុងបុណ្យមាឃបូជានោះគឺដើម្បីរំលឹកគុណ ចំពោះដួងវិញ្ញាណក្ខន្ធអតីតព្រះមហាក្សត្រ រួមទាំងព្រះមហាវីរ:ក្រត្រជ័យវរ្ម័នទី៧ និងព្រះមហាក្សត្រី ព្រះរាជបុត្រស្រិន្ទ្រកុមារ:និងសេនា ចំពោះបុព្វបុរស វីរបុរស យុទ្ធជននារី ប្រជាពលរដ្ឋដែលបានបុជាជីវិតក្នុងហុព្វហេតុការពារជាតិមាតុភូមិនិងប្រជាជនកម្ពុជា។
ក៏សូម បួងសួងចំពោះព្រះបារមីដ៏សក្តិសិទ្ធិទាំងអស់ ពិសេសបារមីប្រាសាទបន្ទាយឆ្មារ និងប្រាសាទជុំវិញនោះ សូមប្រោសប្រទានពរសព្វសារធុការពរជ័យនិងផ្តល់សេចក្តីសុខ សេចក្តីចម្រើនសម្រាប់ប្រទេសជាតិ ក៏ដូចជាខេត្តបន្ទាយមានជ័យនិងប្រជាពលរដ្ឋជារៀងរហូតតទៅទៀត។
ចុងក្រោយលោកស្រី លោកនិងមន្ត្រីថ្នាក់ដឹកនាំបានចែកអំណៅយដល់ប្រជាពលរដ្ឋក្រីក្រជាច្រើននាក់ផងដែរ៕ ដោយ ៖ បន្ទាយ
