ខេត្តព្រះសីហនុ៖ ទីបំផុតទៅ គ្រូពេទ្យម្នាក់ បំរើការងារនៅមន្ទីរពេទ្យបង្អែកខេត្តព្រះសីហនុ ត្រូវបានថ្នាក់ដឹកនាំក្រសួងសុខាភិបាល និងថ្នាក់ដឹកនាំខេត្តព្រះសីហនុ បានប្រកាសតែងតាំងជា អនុប្រធានមន្ទីរសុខាភិបាលខេត្តព្រះសីហនុ នៅព្រឹកថ្ងៃសុក្រ ទី២ ខែកុម្ភៈ ឆ្នាំ២០១៨ នាសាលាខេត្តព្រះសីហនុ។
លោកវេជ្ជបណ្ឌិត លិ គឹមហ៊ួរ ដែលទើបទទួលបានការតែងតាំងជា អនុប្រធានមន្ទីរសុខាភិបាលខេត្តព្រះសីហនុថ្មី បានប្តេជ្ញាថា នឹងបំពេញការងារអោយបានប្រសើរស្របតាមច្បាប់ និងភារកិច្ច របស់ខ្លួន។ ជាងនេះទៀត ក៏បានប្តេជ្ញាថា នឹងខិតខំ រួមសហការគ្នាជាមួយថ្នាក់ដឹកនាំ និងមន្ត្រីរាជការទាំងអស់ នៃមន្ទីរសុខាភិបាលខេត្តព្រះសីហនុ បំពេញការងារអោយបានល្អនាថ្ងៃអនាគត។
ឯកឧត្តម ផៃ ប៊ុនវណ្ណៈ អភិបាលរងខេត្តព្រះសីហនុ ដែលបានចូលរួមជាអធិបតី ក្នុងពិធី ប្រកាសតែងតាំង លោកវេជ្ជបណ្ឌិត លិ គឹមហ៊ួរ អោយក្លាយជា អនុប្រធានមន្ទីរសុខាភិបាលខេត្តព្រះសីហនុ។ លោកក៏បានស្នើដល់ លោក លិ គឹមហ៊ួរ ត្រូវបំពេញតួនាទី ជាមួយថ្នាកដឹកនាំមន្ត្រីរាជការក្នុងស្ថាប័ននេះ អោយបានល្អ និងត្រូវរួមសហការគ្នាបំពេការងារ ដោយសន្តិវិធី ព្រមទាំងមានការយោគយល់គ្នាខ្ពស់។ ជាពិសេសជាងនេះ ក៏ត្រូវរួមសាមគ្គីថែរក្សាផ្ទៃក្នុង នៅមន្ទីរសុខាភិបាលខេត្តព្រះសីហនុ អោយបានល្អ៕ ដែន សីមា
