ក្នុងពិធីប្រកាសចូល កាន់មុខតំណែង អគ្គនាយក នៃអគ្គនាយកដ្ឋានពន្ធនាគារ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្ងៃងថា មានមន្ដ្រីខ្លះពឹងទៅលើសំណើ ឬមួយរត់ការ ដើម្បីទទួលបានតំណែងថ្មី។ សម្តេចបញ្ជាក់ថា ការធ្វើបែបដូច្នេះ គឺខុសហើយ បើកាលណា រត់ការប្រៀបដូចយើងមិនទុកចិត្តខ្លួនឯង និងមិនទុកចិត្តការវាយតម្លៃរបស់ថ្នាក់ដឹកនាំ ដូច្នេះកុំនាំគ្នាធ្វើអ៊ីចឹង ត្រូវប្រឹងប្រែងធ្វើការងារទើបជាការល្អ។
នាទីស្ដីការក្រសួងមហាផ្ទៃ នារសៀលថ្ងៃទី១០ ខែសីហា ឆ្នាំ២០២០នេះ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រកាស ចូលកាន់មុខតំណែងអគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ ដោយមានការចូលរួមពី រដ្ឋលេខាធិការ អនុរដ្ឋលេខាធិការ ក្រសួងមហាផ្ទៃ អគ្គស្នងការដ្ឋាននគរបាលជាតិ ពន្ធនាគាររាជធានី-ខេត្ត ព្រមទាំងភាគីពាក់ព័ន្ធជាច្រើនរូបទៀត។
សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ក៏បានផ្ដាំផ្ញើ និងវាយតម្លៃខ្ពស់ចំពោះថ្នាក់ដឹកនាំក្រសួង ថ្នាក់ដឹកនាំអគ្គនាយកដ្ឋានពន្ធនាគារ មណ្ឌលអប់រំកែប្រែ និងពន្ធគារទូទាំងប្រទេស ដែលបានខិតខំរួមគ្នាបំពេញការងារយ៉ាងសកម្ម តស៊ូជម្នះរាល់គ្រប់ការលំបាក ពុះពារសម្រេចបានសមិទ្ធផលនានាជាច្រើន។
បន្ថែមពីនេះ សម្ដេចក្រឡាហោម ក៏បានណែនាំថ្នាក់ដឹកនាំអគ្គនាយកដ្ឋានពន្ធនាគារ មណ្ឌលអប់រំកែប្រែ និងពន្ធនាគាររាជធានី-ខេត្ត បន្ដខិតខំពុះពារជម្នះលើការលំបាកនានាជាបន្ដទៀត ជាពិសេស ការងារ ប្រយុទ្ធប្រឆាំងនឹងជំងឺកូវីដ-១៩ ដែលកំពុងតែគំរាមកំហែងដល់សុខភាពសាធារណៈជាសកល ដើម្បីឲ្យអង្គភាពពន្ធនាគារ ទទួលបាននូវភាពជោគជ័យ និងស្នាដៃថ្មីៗបន្ថែមទៀត ស្របតាមគោលនយោបាយរបស់រាជរដ្ឋាភិបាលកម្ពុជា។
ជាងនេះទៅទៀត សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានរៀបរាប់ថា «មានមន្ដ្រីខ្លះគាត់ពឹងទៅលើសំណើ ឬមួយរត់ការ ដើម្បីទទួលបានតំណែងថ្មី ការធ្វើដូចនេះគឺខុស កាលណាយើងរត់ការប្រៀបដូចយើងមិនទុកចិត្តខ្លួនឯង និងមិនទុកចិត្តការវាយតម្លៃរបស់ថ្នាក់ដឹកនាំ ចឹងហើយពឹងទៅលើការរត់ការ ខ្ញុំគិតថា យើងធ្វើចឹងមិនល្អទេ កុំនាំគ្នាធ្វើចឹង ត្រូវប្រឹងប្រែងធ្វើការងារទើបជាការល្អ»។
សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានបញ្ជាឱ្យ អគ្គនាយកពន្ធនាគារថ្មី ទប់ស្កាត់ និងលុបបំបាត់ការលួចទាក់ទងតាមទូរស័ព្ទ ពីក្នុងពន្ធនាគារចេញមកខាងក្រៅពីសំណាក់អ្នកជាប់ឃុំ។ សម្តេចក្រឡាហោម ស ខេង បានបញ្ជាយ៉ាងដូច្នេះថា៖ «សន្តិសុខកន្លងទៅ ការពិតទូទៅយើងធ្វើបានល្អហើយ ក៏ប៉ុន្តែ ការគ្រប់គ្រងទំនាក់ទំនងចេញមកក្រៅបញ្ហានេះ យើងត្រូវប្តេជ្ញាត្រូវធ្វើឱ្យបាន កុំឱ្យការទាក់ទងមកក្រៅថែមទៀត លួចទូរស័ព្ទយកចូលអីអញ្ចឹង នេះជាបញ្ហា ខ្ញុំជឿថាយើងរៀបចំវិធានការជាក់លាក់ កន្លងទៅយើងបានដោះស្រាយបញ្ហាបានមួយចំនួន ដោយមានការវិនិយោគ ពីវិស័យឯកជនតែមិនបានទទួលជោគជ័យទេ អញ្ចឹងហើយសុំឱ្យបន្តធ្វើកិច្ចការងារនេះបន្តទៀត»។
សម្តេចក្រឡាហោម ស ខេង បានលើកឡើងថា បញ្ហារបស់មន្ត្រីយើង ក៏នៅតែជាបញ្ហាប្រឈមមួយផងដែរ។ មន្ត្រីអនុរ័ក្សពន្ធនាគារ បច្ចុប្បន្ននេះ កម្ពុជាមានចំនួន ៣.០៧៤នាក់ ដែលចំនួននេះ មានការខ្វះខាតនៅឡើយ ដូច្នេះ តម្រូវឱ្យមានការបង្កើនចំនួនផងដែរ។
សម្ដេចក្រឡាហោម ស ខេង បានថ្លែងថា «ខ្ញុំមានជំនឿទៅលើ ឯកឧត្តម កើត រិទ្ធ រដ្ឋមន្ដ្រីក្រសួងយុត្តិធម៌ លើយុទ្ធនាការដោះស្រាយសំណុំរឿងកកស្ទះ តែមិនដឹងថា ការដោះស្រាយសំណុំរឿងកកស្ទះនេះ វាអាចជួយសម្រាលដល់អ្នកជាប់ឃុំនៅក្នុងពន្ធនាគារដែរ ឬទេ? ខ្ញុំក៏បានរំលឹក ឯកឧត្តម កើត រិទ្ធ ដែរថា សំណុំរឿងកកស្ទះមនុស្សនៅក្រៅឃុំកុំអាលសិន ត្រូវជំរុញសំណុំរឿងដែលកកស្ទះ ហើយមនុស្សនៅជាប់ឃុំ។ សំណុំរឿងដែលមិនមានអ្នកជាប់ឃុំ មិនទាន់ជាអាទិភាពនៅឡើយទេ ។ អាទិភាពចម្បង គឺសំណុំរឿងទាំងឡាយណាដែលមានអ្នកជាប់ឃុំក្នុងពន្ធនាគារ។ ការធ្វើបែបនេះ សំដៅសម្រួលដល់ ភាពចង្អៀនណែន នៅក្នុងពន្ធនាគារនាពេលបច្ចុប្បន្ន។
សូមជម្រាបថា ឯកឧត្តម ឆែម សាវុធ ឋានន្ដរស័ក្តិឧត្តមអគ្គានរក្សថ្នាក់លេខ១ ត្រូវបានប្រកាសឱ្យចូល កាន់មុខតំណែងជាអគ្គនាយក នៃអគ្គនាយកដ្ឋានពន្ធនាគារ ក្រសួងមហាផ្ទៃ ជំនួសឯកឧត្តម នាយឧត្តមសេនីយ៍សន្តិបណ្ឌិត ចាន់ គឹមសេង ដែលត្រូវបានព្រះមហាក្សត្រត្រាស់ បង្គាប់តែងតាំងមុខតំណែងថ្មី ជាអនុរដ្ឋលេខាធិការក្រសួងមហាផ្ទៃ។
ឯកឧត្តម នាយឧត្តមសេនីយ៍ សន្ដិបណ្ឌិត ចាន់ គឹមសេង អនុរដ្ឋលេខាធិការ ក្រសួងមហាផ្ទៃ បានអានរបាយការណ៍របស់អគ្គនាយកដ្ឋានពន្ធនាគារថា ការការគ្រប់គ្រងពន្ធនាគារ នាពេលកន្លងទៅ សម្រេចបានដូចជា ការគ្រប់គ្រងពន្ធនាគារតាមបទដ្ឋានធានាបានសន្ដិសុខសុវត្ថិភាព និងមនុស្សធម៌ រក្សាបាននូវសន្ដិសុខសុវត្ថិភាព និងសណ្ដាប់ធ្នាប់ពន្ធនាគារ បង្ការទប់ស្កាត់ប្រកប ដោយសុវត្ថិភាព ហើយទប់ស្កាត់របស់ហាមឃាត់ចូលក្នុងពន្ធនាគារ ដើម្បីយកប្រព្រឹត្តិបទល្មើសផ្សេងៗ។ បានការពារសុវត្ថិភាពការដឹងជញ្ជូនអ្នកជាប់ពន្ធនាគារ ពីពន្ធនាគារមួយ ទៅពន្ធនាគារមួយទៀត ដើម្បីសម្រាលភាពចង្អៀតណែ ក៏ដូចជា ការដឹកជញ្ជូនជនជាប់ឃុំទៅកាន់សាលាជម្រះក្ដីគ្រប់ ថ្នាក់ ហើយទៅពិនិត្យព្យាបាល និងសង្គ្រោះបន្ទាន់ចំពោះអ្នកជំងឺក្នុងពន្ធនាគារ។
ឯឧត្តម ឆែម សាវុធ ឋានន្ដរស័ក្តិឧត្តមអគ្គានរក្សថ្នាក់លេខ១ បានឡើងធ្វើសេចក្តីរាយការណ៍ និងប្តេជ្ញាចិត្តថា ទី១-ប្ដេជ្ញាចិត្តអនុវត្តឲ្យបានម៉ឹងម៉ាតចំពោះ រដ្ឋធម្មនុញ្ញ និងគោលណែនាំនានារបស់រាជរដ្ឋាភិបាល និងរបស់ក្រសួងមហាផ្ទៃ ទី២-ប្ដេជ្ញាអនុវត្តគ្រប់គ្រងឲ្យបានជោគជ័យកម្មវិធីនយោបាយដំណាក់កាលទី៤ ឲ្យមានប្រសិទ្ធិភាព ទី៣-ប្ដេជ្ញាគោរពនិងអនុវត្តណែនាំ និងបង្ហាញនិងផ្ដល់អនុសាសន៍ដ៏ខ្ពង់ខ្ពស់របស់ សម្ដេចក្រឡាហោម ស ខេង ក៏ដូចជា ថ្នាក់ដឹកនាំក្រសួងមហាផ្ទៃ ដើម្បីគ្រប់គ្រង និងដឹកនាំដោយប្រសិទ្ធភាព តម្លាភាព ទី៤-ប្ដេជ្ញា ប្រកាន់ភ្ជាប់នូវគុណសម្បត្តិ៤យ៉ាង ឆន្ទះ ម្ចាស់ការ មនសិការ និងវប្បធម៌សេវាសាធារណៈ និងទី៥-ប្ដេជ្ញាពង្រឹងសាមគ្គីភាពផ្ទៃក្នុងឲ្យបានរឹងមាំ ជាដើម៕
ដោយ៖កូឡាប
