ភ្នំពេញ៖ មន្ត្រីជាន់ខ្ពស់ក្រសួងមហាផ្ទៃ បានអះអាងថា គម្រោងកសាងសមត្ថភាពដល់តំណាងអង្គការសង្គមស៊ីវិលនៅកម្ពុជា នឹងផ្តល់ឱកាសសម្រាប់ការសន្ទនា ប្រកបដោយបរិយាប័ន្នលើបញ្ហានានា រវាងអង្គការសង្គមស៊ីវិល ប្រជាពលរដ្ឋជាមួយ និងអាជ្ញាធរសាធារណៈ ពិសេសការជួយកសាងសមត្ថភាពស្ថាប័នរបស់អង្គការសង្គមស៊ីវិល អង្គការសហគមន៍មូលដ្ឋាន និងមន្ត្រីរបស់រាជរដ្ឋាភិបាល ខណៈអង្គការ និងសមាគមសរុបចំនួន ៥៦៨៣ ដែលកំពុងធ្វើសកម្មភាពដោយសេរី នៅក្នុងព្រះរាជាណាចក្រកម្ពុជា។
ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានថ្លែងបែបនេះ ក្នុងឱកាសអញ្ជើញជាអធិបតី បើកសិក្ខាសាលាលើគម្រោងកសាងសមត្ថភាព ដល់តំណាងអង្គការសង្គមស៊ីវិលនៅកម្ពុជា នាថ្ងៃទី១០ ខែ សីហា ឆ្នាំ ២០២០ នៅសណ្ឋាគារកាំបូឌីយ៉ាណា ដែលជាគំនិតផ្តួចផ្តើមរបស់ UNDP ក្រោមជំនួយឧប្ថម្ភរបស់រដ្ឋាភិបាលជប៉ុន ដោយមានការចូលរួមពីឯកឧត្តម Masahiro Mikami ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា និងលោក Nick Beresford តំណាងអង្គការ UNSP ប្រចាំប្រទេសកម្ពុជា ព្រមជាមួយតំណាងបណ្តាអង្គការសង្គមស៊ីវិលប្រមាណ៤០រូបផងដែរ។
ឯកឧត្តម ប៊ុន ហុន បានមានប្រសាសន៍សាទរចំពោះការដាក់ឲ្យដំណើការលើគម្រោងដ៏មានសារសំខាន់នេះ ព្រោះថា គម្រោងនេះនឹងផ្តល់ឱកាសសម្រាប់ការសន្ទនា ប្រកបដោយបរិយាប័ន្នលើបញ្ហានានា រវាងអង្គការសង្គមស៊ីវិល ប្រជាពលរដ្ឋជាមួយ និងអាជ្ញាធរសាធារណៈ ពិសេសការជួយកសាងសមត្ថភាពស្ថាប័នរបស់អង្គការសង្គមស៊ីវិល អង្គការសហគមន៍មូលដ្ឋាន និងមន្ត្រីរបស់រាជរដ្ឋាភិបាលផងដែរ។
ឯកឧត្តមបានបន្ថែមថា រាជរដ្ឋាភិបាលកម្ពុជាដែលមានក្រសួងមហាផ្ទៃជាសេនាធិការ តែងតែគាំទ្រនូវរាល់សកម្មភាពរបស់អង្គការសង្គមស៊ីវិល និងបានចាត់ទុកអង្គការសង្គមស៊ីវិលជាដៃគូដ៏ល្អ ក្នុងការចូលរួមអភិវឌ្ឍន៍ប្រទេសជាតិ ស្ទើរគ្រប់វិស័យដែលមានជាអាទិ៍ រួមមាន វិស័យអប់រំ សុខាភិបាល សាសនា កសិកម្ម បរិស្ថាន និងធនធានធម្មជាតិ។ល។ រាជរដ្ឋាភិបាលកម្ពុជា បានយកចិត្តទុកដាក់ជំរុញគាំទ្រ និងជួយសម្រួលដោះស្រាយនូវសំណើ សំណូមពរ និងបញ្ហាប្រឈមរបស់អង្គការសង្គមស៊ីវិល ដើម្បីធ្វើយ៉ាងណាឱ្យអង្គការសង្គមស៊ីវិល អាចធ្វើសកម្មភាពរបស់ខ្លួន ស្របតាមច្បាប់ដោយរលូនតាមរយៈយន្តការនានា ដូចជាការរៀបចំឲ្យមានវេទិកា ស្តីពីភាពជាដៃគូរវាងរាជរដ្ឋាភិបាល និងអង្គការសង្គមស៊ីវិល ទាំងនៅថ្នាក់ជាតិ និងថ្នាក់ក្រោមជាតិ ដែលក្រសួងមហាផ្ទៃបានកំណត់ថា វេទិកានេះត្រូវតែរៀបចំធ្វើឡើងឲ្យបានយ៉ាងតិចចំនួនពីរដងក្នុងមួយឆ្នាំ ក្នុងគោលបំណងផ្តល់លទ្ធភាពឲ្យអង្គការសង្គមស៊ីវិល និងរាជរដ្ឋាភិបាល ឬ រដ្ឋបាលថ្នាក់ក្រោមជាតិ បានជួបសន្ទនាគ្នា និងពិភាក្សា ព្រមទាំងស្តាប់នូវសំណើ សំណូមពរ និងបញ្ហាប្រឈមរបស់អង្គការសង្គមស៊ីវិល និងការផ្តល់នូវដំណោះស្រាយសមស្របពីរាជរដ្ឋាភិបាល ឬ រដ្ឋបាលថ្នាក់ក្រោមជាតិ។ លើសពីនេះទៅទៀត ក្រសួងមហាផ្ទៃបានរៀបចំប្រជុំពិភាក្សា ពីគ្រោះយោបល់ចំនួន ៦លើកមកហើយ ជាមួយតំណាងអង្គការសង្គមស៊ីវិលមកពីគ្រប់វិស័យ ដើម្បីពិភាក្សាលើសំណើសុំធ្វើវិសោធនកម្មច្បាប់ស្តីពីសមាគម និងអង្គការមិនមែនរដ្ឋាភិបាល ចំនួន ១៧មាត្រា។
ឯកឧត្តមបានសង្កត់ធ្ងន់ថា រាជរដ្ឋាភិបាល ក៏ដូចជាក្រសួងមហាផ្ទៃ មានការប្តេជ្ញាចិត្តខ្ពស់ក្នុងការធ្វើឲ្យមានលំហរសង្គមស៊ីវិល ជាក់ស្តែងរហូតមកដល់បច្ចុប្បន្ននេះមានអង្គការ និងសមាគមសរុបចំនួន ៥៦៨៣ ដែលកំពុងធ្វើសកម្មភាពដោយសេរី នៅក្នុងព្រះរាជាណាចក្រកម្ពុជា។ ឯកឧត្តម ក៏បានថ្លែងអំណរគុណដល់រដ្ឋាភិបាលជប៉ុន, អង្គការ UNDP និងភាគីពាក់ព័ន្ធដទៃទៀត ដែលតែងតែចូលរួមចំណែកយ៉ាងសកម្មជាមួយរដ្ឋាភិបាលកម្ពុជា ទាំងផ្នែកហិរញ្ញវត្ថុ និងបច្ចេកទេសក្នុងកិច្ចការអភិវឌ្ឍប្រទេសកម្ពុជា៕ ដោយ៖កូឡាប