ភ្នំពេញ ៖ សហព័ន្ធកីឡាវាយកូនឃ្លីលើតុកម្ពុជាបានបើកកិច្ចប្រជុំការងារប្រចាំខែរបស់ខ្លួននាថ្ងៃទី១០ សីហាដើម្បីកំណត់និងគោលដៅយុទ្ធសាស្ត្រត្រៀមការប្រកួត SEA GAMES ២០២៣ ដោយមានការអញ្ជើញចូលរួមពីលោកនាយឧត្តមសេនីយ៍ គៀត ច័ន្ទថារិទ្ធ សហព័ន្ធកីឡាវាយកូនឃ្លីលើតុកម្ពុជាជាមួយសមាជិកប្រតិបត្តិរបស់សហព័ន្ធ។
លោក ស៊ុន សុទ្ធារិទ្ធ អគ្គលេខាធិការនៃសហព័ន្ធបានប្រាប់ឲ្យដឹងថា សហព័ន្ធបានរៀបចំទិសដៅយុទ្ធសាស្ត្រត្រៀមការប្រកួត SEA GAMES២០២៣ដោយក្នុងនោះពង្រឹងការហ្វឹកហាត់របស់កីឡាករកីឡាការិនីដើម្បីចម្រាញ់ជ្រើសរើសអត្តពលិកឆ្នើមចូលរួមព្រឹត្តិកាណ៍ការប្រកួត SEA GAMES ២០២១នៅប្រទេសវៀតណាម ដោយយើងធ្វើការប្រកួតតាមដំណាក់កាលនីមួយៗក្នុងការស្ទាប់ស្ទង់សមត្ថភាព និងបច្ចេកទេសរបស់ពួកគេយើងតាមផែនការមេរបស់ប្រធានសហព័ន្ធ។
ឯកឧត្តមនាយឧត្តមសេនីយ៍គៀតច័ន្ទថារិទ្ធបានមានប្រសាសន៍ថាការប្រកួតSEAGAMES២០២១នៅប្រទេសវៀតណាមជាចំណុចសំខាន់សម្រាប់សំឡឹងមើលសមត្ថភាព និងបច្ចេកទេសរបស់កីឡាករ-កីឡាការិនីវាយកូនឃ្លីលើតុក្នុងការត្រៀមខ្លួនព្រឹត្តិកាណ៍ការប្រកួត SEA GAMES 2023 លើកទី៣២ដែលកម្ពុជាធ្វើម្ចាស់ផ្ទះ។ ដូច្នេះការជ្រើសរើសកីឡាករ-កីឡាការិនីត្រូវមើលឲ្យបានឆ្ងាយ ជាពិសេសយើងត្រូវស្វែងរកកីឡាករកីឡាការិនីកូនខ្មែររស់នៅក្រៅប្រទេសដោយអញ្ជើញឲ្យពួកគេចូលរួមប្រកួតមិត្តភាពជាមួយក្រុមកីឡាករ-កីឡាការិនីជម្រើសជាតិ។
ឯកឧត្តមបានបន្តថាការប្រកួតមិត្តភាពនេះមានសារសំខាន់ណាស់ប្រសិនបើកីឡាករកីឡាការិនីកូនខ្មែររស់នៅក្រៅប្រទេសឈ្នះជម្រើសជាតិ ព្រមទាំងមានសមត្ថភាពខ្ពស់នោះ យើងត្រូវយកមកលេងតំណាងឲ្យប្រទេសកម្ពុជា។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ ប្រធានសហព័ន្ធ បានមានប្រសាសន៍គាំទ្រលើរបាយការណ៍ ដែលបានរាយការណ៍នាពេលនេះ ឯកឧត្តម ប្រធានសហព័ន្ធ បានលើកឡើងពី ការរៀបចំផែនការយុទ្ធសាស្ត្រ ការរៀបចំកីឡាករ កីឡាការិនី ការហ្វឹកហាត់ ដើម្បីឆ្ពោះទៅកីឡាស៊ីហ្គេម ឆ្នាំ២០២១ និងឆ្នាំ២០២៣។
ក្រៅពីការត្រៀមខ្លួនក្នុងការចូលរួមកីឡាស៊ីហ្គេម ឯកឧត្តម នាយឧត្តមសេនីយ៍ ក៏បានឲ្យសហព័ន្ធត្រូវឲ្យកីឡាករទាំងអស់ ត្រៀមខ្លួនប្រកួតលក្ខណៈជាតិ ដែលសហព័ន្ធកីឡាវាយកូនឃ្លីលើតុ នឹងរៀបចំការប្រកួតជ្រើសរើសជើងឯកថ្នាក់ជាតិ និងពានរង្វាន់សហព័ន្ធកីឡាវាយកូនឃ្លីលើតុកម្ពុជា លើកទី១ ប្រចាំឆ្នាំ២០២០។
ឯកឧត្តម នាយឧត្តមសេនីយ៍ គៀត ច័ន្ទថារិទ្ធ ប្រធានសហព័ន្ធបានលើកឡើងពី ទិសដៅអនុវត្តបន្ត សហព័ន្ធត្រូវស្វែងរកធនធាន ក៏ដូចជាបណ្ដុះកីឡាករថ្មីៗ ក្នុងនោះដែរឯកឧត្តម បានណែនាំដល់សហព័ន្ធធ្វើការជ្រើសរើសកីឡាករ នៅតាមគ្រឹះសិក្សា សាលាចំណេះដឹងទូទៅ ទាំងរដ្ឋ និងឯកជន។ ក្នុងនោះដែរ ឯកឧត្តម ប្រធានសហព័ន្ធ ក៏បានឲ្យមានការជ្រើសរើសដល់ប្រជាពលរដ្ឋកម្ពុជា ដែលកំពុងរស់នៅក្រៅប្រទេស ដែលមានចំណូលចិត្តលើកីឡាវាយកូនឃ្លីលើតុនេះផងដែរ៕ ដោយ៖កូឡាប
