ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ មានប្រសាសន៍លើកឡើងថា រាជរដ្ឋាភិបាលកម្ពុជាមានឆន្ទៈនយោបាយខ្ពស់ និងប្តេជ្ញាចិត្តយ៉ាងមោះមុត ក្នុងការកែទម្រង់ច្បាប់ និងប្រព័ន្ធយុត្តិធម៌ សំដៅធានាដល់ការគោរពសិទ្ធិមនុស្ស ដោយពង្រឹងការអនុវត្តច្បាប់ជាតិ បទដ្ឋានសិទ្ធិមនុស្សអន្តរជាតិ ជាពិសេសខិតខំបង្ការអំពើទារុណកម្ម ឬប្រព្រឹត្តកម្មមិនគប្បីណាមួយ កុំឲ្យកើតមានលើជនដែលត្រូវបានដកហូតសេរីភាព។
សម្តេចមានប្រសាន៍បែបនេះ ក្នុងពីធីប្រកាសចូលកាន់មុខតំណែងសមាជិកគណៈកម្មាធិការជាតិប្រឆាំងទារុណកម្ម បំពាក់ឋាន្តរសក្តិ និងបំពាក់គ្រឿងឥស្សរយសជូនមន្ត្រីលេខាធិការដ្ឋាន នៃគណៈកម្មាធិការជាតិប្រឆាំងទារុណកម្ម គ.ជ.ប.ទ នៅថ្ងៃអង្គារ ទី១១ ខែសីហា ឆ្នាំ២០២០។
សម្តេចក្រឡាហោម មានប្រសាសន៍បន្ថែមទៀតថា ដើម្បីឱ្យការអនុវត្តកិច្ចការនេះទទួលបានជោគជ័យទាមទារឱ្យមន្ត្រីសាធារណៈ និងអាជ្ញាធរមានសមត្ថកិច្ច ទទួលបន្ទុកគ្រប់គ្រងជនដែលត្រូវបានដកហូតសេរីភាព ត្រូវផ្លាស់ប្តូរផ្នត់គំនិត ឥរិយាបទ និងអាកប្បកិរិយារបស់ខ្លួន ជុំវិញការឃាត់ខ្លួន ការឃុំខ្លួន ការអប់រំកែប្រែ ការព្យាបាល ការស្តារនីតិសម្បទាជនទាំងនោះផងដែរ។
សម្តេចក្រឡាហោម បន្តថា ការធ្វើទារុណកម្ម និងប្រព្រឹត្តកម្ម មិនគប្បីជាអំពើឃោឃៅ អមនុស្សធម៌ ឬបន្ទាបបន្ថោក ហើយក៏វាមិនមែនជាវិធានការចាំបាច់ដែលត្រូវយកមកអនុវត្តចំពោះជនទាំងនោះឡើយ ផ្ទុយទៅវិញប្រព្រឹត្តកម្មបែបនេះជាអំពើខុសច្បាប់ និងរំលោភសិទ្ធិមនុស្សធ្ងន់ធ្ងរដែលមិនអាចទទួលបានលទ្ធផលវិជ្ជមានដូចការចង់បាននោះទេ ដែលធ្វើឱ្យប៉ះពាល់ដល់សេចក្តីថ្លៃថ្នូរ របស់មនុស្សជាតិ និងផ្តល់ការឈឺចាប់ដល់ជនទាំងនោះ ហើយអាចបង្កើតឡើងនូវគំនុំគំគួនគ្នាមិនចេះចប់។
ក្នុងឱកាសនោះដែរសម្តេចក្រឡាហោម ក៏បានបញ្ជាក់ផងដែរថា កន្លងមកក្រសួងមហាផ្ទៃ ក៏បានចេញលិខិតស្តីពីការចុះអប់រំផ្សព្វផ្សាយលិខិតបទដ្ឋានគតិយុត្តជាតិ និងអន្តរជាតិ ពាក់ព័ន្ធនិងការធ្វើទារុណកម្ម និងការចុះអង្កេត ត្រួតពិនិត្យពន្ធនាគារ និងទីកន្លែងឃុំឃាំង បណ្តោះអាសន្ននានានៅតាមរាជធានី-ខេត្ត ដោយមិនផ្តល់ដំណឹងជាមុន ដល់គណៈអភិបាលរាជធានី -ខេត្ត អាជ្ញាធរគ្រប់គ្រងពន្ធនាគារ និងកន្លែងឃុំឃាំង ឬកន្លែងដកហូតសេរីភាពបណ្តោះអាសន្ននៅតាមរាជធានី-ខេត្ត ដោយបង្កលក្ខណៈងាយស្រួល
ឆ្លៀតឱកាសនោះ សម្ដេចក្រឡាហោម ស ខេង បានថ្លែងអំណរគុណយ៉ាងជ្រាលជ្រៅចំពោះ ការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ដែលបានជួយឧបត្ថម្ភគាំទ្រដល់គណៈ កម្មាធិការជាតិប្រឆាំងទារុណ ដើម្បីចូលរួមទប់ស្កាត់ការធ្វើទារុណកម្ម និងប្រព្រឹត្តកម្មមិនគម្បីផ្សេងៗ សំដៅ កសាងព្រះរាជាណាចក្រកម្ពុជាឲ្យក្លាយជានីរដ្ឋ កាន់តែល្អប្រសើរ។
ជាងនេះទៅទៀត សម្ដេចក្រឡាហោម ស ខេង ក៏បានផ្ដល់អនុសាសន៍បំពេញបន្ថែមមួយចំនួនសម្រាប់ គណៈកម្មាធិការជាតិប្រឆាំងទារុណកម្ម និងអាជ្ញាធរមានសមត្ថកិច្ចក្នុងការគ្រប់គ្រងជនត្រូវបានដកហូត សេរីភាព ដើម្បីអនុវត្តឲ្យស្របតាមច្បាប់ជាតិ និងស្មារតីនៃអនុសញ្ញាប្រឆាំងទារុណកម្ម និងពិធីសារបន្ថែ មលើអនុសញ្ញានេះដូចតទៅ៖ ត្រូវបន្ដអប់រំផ្សព្វផ្សាយ និងលើកកម្ពស់ការយល់ដឹងអំពីអនុសញ្ញាប្រឆាំងទារុណកម្ម ពិធីសារបន្ថែម និងសន្ធិសញ្ញាផ្សេងៗទៀត ព្រមទាំងបទបញ្ញត្តិទាំងឡាយក្នុងច្បាប់ជាតិដែលពាក់ព័ន្ធ ទៅដល់អាជ្ញាធរ សាធារណៈ និងមន្ដ្រីដែលបំពេញតួនាទីនៅតាមទីកន្លែងឃុំឃាំងជនដែលបានដកហូតសេរីភាព។ ត្រូវចុះត្រួតពិនិត្យ និងតាមដានយ៉ាងទៀងទាត់ អំពីស្ថានភាពនៅតាមកន្លែងឃុំឃាំងនានា ក្នុងគោល ដៅពង្រឹងការការពារដល់ជនជាប់ឃុំ ពីការធ្វើទារុណកម្ម និងត្រូវផ្ដល់អនុសាសន៍ចាំបាច់ដល់អាជ្ញាធរ មានសមត្ថកិច្ចក្នុងគោលបំណងកែលម្អប្រព្រឹត្តកម្ម និងស្ថានភាពរស់នៅរបស់ជនដែលត្រូវបានដកហូត សេរីភាពស្របតាមនីតិវិធីច្បាប់ជាតិ និងអនុលោមតាមស្មារតី នៃអនុសញ្ញាប្រឆាំងទារុណកម្ម និងពិធី សារបន្ថែម។ ត្រូវសហការគ្នាឲ្យបានល្អ និងមានសាមគ្គីភាពផ្ទៃក្នុងគណៈកម្មាធិការជាតិប្រឆាំងទារុណកម្ម ជាពិសេសត្រូវទំនាក់ទំនងល្អ និងជិតស្និតជាមួយក្រសួង-ស្ថាប័នពាក់ព័ន្ធ និងការិយាល័យឧត្តមស្នងការ អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា។ ត្រូវលើកកម្ពស់ស្មារតី គោរពសិទ្ធិមនុស្ស ជាពិសេសចំពោះជនដែលត្រូវបានដកហូតសេរីភាព ស្របតាមច្បាប់ជាតិ និងច្បាប់អន្ដរជាតិ។ ត្រូវសហការបង្កលក្ខណៈងាយស្រួលដល់គណៈកម្មាធិការជាតិប្រឆាំងទារុណកម្ម និងអនុគណៈកម្មាធិ ការបង្ការទារុណកម្មរបស់អង្គការសហប្រជាជាតិ ឲ្យបំពេញកាតព្វកិច្ចតាមអាណត្តិការងាររបស់ខ្លួនប្រកប ដោយប្រសិទ្ធភាព សំដៅរួមចំណែកដល់ការលើកកម្ពស់សិទ្ធមនុស្សប្រចាំកម្ពុជាឲ្យកាន់តែប្រសើរឡើង ថែមទៀ។
ឯកឧត្តម នុត សាអាន ប្រធាន គ.ជ.ប.ទ បានថ្លែងថា ដោយស្មារតីទទួលខុសត្រូវខ្ពស់ សមាជិក-សមាជិកា គ.ជ.ប.ទ និងមន្ដ្រីលេខាធិការដ្ឋាន បានចាប់បំពេញតួនាទីរបស់ខ្លួនចាប់ពីខែឧសភា ឆ្នាំ២០១៨ បន្ទាប់ពីមន្ដ្រី នៃគណៈកម្មាធិការជាតិរៀបចំផ្លាស់ប្ដូរទៅកន្លែងថ្មី។ បើគិតមកដល់ថ្ងៃនេះ មានរយៈពេលជាង២ឆ្នាំហើយ ទោះបីមិនទាន់មានការិយាល័យ និងថវិកាដំណើរការការងារគ្រប់គ្រាន់ សមស្រប និងគ្មានមធ្យោបាយធ្វើដំណើរ របស់អង្គភាព ជាពិសេស នៅដើមឆ្នាំ២០២០នេះ ដោយសារ បញ្ហាជំងឺកូវីដ-១៩ ធ្វើឲ្យរាំងស្ទះដល់ការងារចុះត្រួតពិនិត្យតាម ទីកន្លែងដកហូតសេរីភាព និងការចុះអប់ រំផ្សព្វផ្សាយលិខិតបទដ្ឋាននានា តាមបណ្ដារាជធានី-ខេត្ត។
ជាងនេះទៅទៀត ឯកឧត្តម នុត សាអាន បានបញ្ជាក់ថា គ.ជ.ប.ទ បានចុះត្រួតពិនិត្យតាមទីកន្លែងឃុំ ឃាំង និងបានចុះត្រួតពិនិត្យភាពមិនប្រក្រតី ដែលពាក់ព័ន្ធនឹងទារុណកម្ម បានរកឃើញបញ្ហាប្រឈម នានា និងបានផ្ដល់អនុសាសន៍កែលម្អជូនអាជ្ញាធរពាក់ព័ន្ធផងដែរ។
សូមជម្រាបថា មន្ត្រីរាជការដែលត្រូវបានប្រកាសចូលកាន់មុខតំណែងជា សមាជិក គណៈកម្មាធិការជាតិប្រឆាំងទារុណកម្ម និងបំពាក់ឋានន្តរស័ក្តិ ព្រមទាំងគ្រឿងឥស្សរិយយសជូននាពេលនេះ រួមមាន៖ សមាជិក គណៈកម្មាធិការជាតិប្រឆាំង ទារុណកម្ម មានចំនួន៤រូប, បំពាក់ឋានន្ដរស័ក្តិថ្នាក់ឧត្តមសេនយ៍ឯក មានចំនួន១រូប, បំពាក់ឋានន្ដរស័ក្តិថ្នាក់ឧត្តមសេនយ៍ទោ មានចំនួន២រូប និងបំពាក់គ្រឿងឥស្សរិយយស ព្រះរាជាណាចក្រកម្ពុជា ថ្នាក់ មហាសេរីវឌ្ឍន៍ មានចំនួន១រូប។
សូមបញ្ជាក់ដែរថា បច្ចុប្បន្នពន្ធនាគារទាំង២៨នៅទូទាំងប្រទេសផ្ទុកអ្នកជាប់ឃុំ គិតត្រឹមថ្ងៃទី១០ ខែកក្កដា ឆ្នាំ២០២០ សរុបចំនួន៣៩.៣១៦នាក់ ស្ដ្រី២.៥៧១នាក់ ក្នុងនោះ មានជនបរទេសចំនួន១.៨៧៣នាក់ ស្ដ្រី២៤៨នាក់ អនីតិជន១.៦៨២នាក់ ស្ដ្រី៧២នាក់។ ក្នុងចំណោមជនជាប់ឃុំសរុបត្រូវបានបែងចែកជាប្រភេទជនជាប់ឃុំ ដូចជា ៖ ជនត្រូវចោទ៨.៩០០នាក់ ក្នុងនោះ៥៦៧នាក់ ជនបរទេស៥៨៩នាក់ អនីតិជន៤៥៥នាក់។ ជនជាប់ចោទ៤.៦៤៩នាក់ ក្នុងនោះស្ដ្រី២៥៩នាក់ ជនបរទេស៣០៩នាក់ អនីតិជន៣៤៨នាក់។ ពិរុទ្ធជន១៤.៨១៧នាក់ ក្នុងនោះស្ដ្រី១.០០៦នាក់ ជនបរទេស៦៨៣នាក់ អនីតិជន៧៣៥នាក់។ ទណ្ឌិត១០.៩៥០នាក់ ក្នុងនោះស្ដ្រី៧៣០នាក់ ជនបរទេស២៩៣នាក់ អនីតិជន២០៧នាក់។ ហើយបទល្មើសភាគច្រើនគឺគ្រឿងញៀនស្មើនឹង៥៨,៨៧% បទល្មើសលួចមានទម្ងន់ទោស៩,៥៤% បទល្មើសលួច៧,២៧% រំលោភសេពសន្ថវៈ៥,៨៧% បទល្មើសឃាតកម្ម៥,៣៥% និងបទល្មើសផ្សេងៗ១៣,១០%៕
ដោយ៖កូឡាប