តាកែវ ៖ ថ្លែងនៅក្នុងយុទ្ធនាការចុះចាក់វាក់សាំងបង្ការជំងឺសារទឹក និងជំងឹអុតក្តាមដល់សត្វចិញ្ចឹមគោក្របីរបស់បងប្អូនប្រជាពលរដ្ឋនៅឃុំសំបួរ ស្រុកទ្រាំង ខេត្តតាកែវ នាព្រឹកថ្ងៃទី០២ កុម្ភៈ ២០១៨ នេះ លោក ថៃ លី ប្រធានការិយាល័យផលិតកម្ម និង
បសុព្យាបាលខេត្តតាកែវ បានអំពាវនាវអោយបងប្អូនប្រជាពលរដ្ឋទាំងអស់ ចូលរួមសហការជាមួយម្ត្រីពេទ្យសត្វភូមិឃុំ ដើម្បីធ្វើការចាក់វាក់សាំងបង្ការទប់ស្កាត់ជំងឺសារទឹក និងជំងឺអ៊ុតក្តាម ជាបន្ទាន់ ខណៈពេលដែលថ្មីៗនេះជំងឺសារទឹកបានផ្ទុះឡើងនៅឃុំចំនួន២ឋិតក្នុង ស្រុកទ្រាំង ខេត្តតាកែវ បណ្តាលអោយសត្វគោក្របី ប្រមាណជាង ៣០០ក្បាល កំពុងប្រឈរមុខនិងជម្ងឺនេះ ហើយ មានក្របីជាង៣០ក្បាលបានងាប់ទៅហើយ ដូច្នេះដើម្បីការពារនៅសត្វចិញ្ចឹមរបស់បងប្អូនប្រជាពលរដ្ឋទាំងអស់គ្នា សូមបងប្អូនប្រជាពលរដ្ឋទាំងអស់ចូលរួមសហការណ៏ជាមួយនិងមន្ត្រីជំនាញរបស់ការិយាល័យផលិតកម្មនិងបសុព្យាបាល ក្នុងការចូលរួមយកគោក្របីរបស់ខ្លួនមកចាក់ថ្នាំបង្ការអោយបាន ១០០ភាគរយលើសត្វចិញ្ចឹមគោក្របីរបស់ពួកគាត់ ព្រោះសត្វទាំងនេះគឺជាទ្រព្យសម្បត្តិមួយរបស់បងប្អូនប្រជាពលរដ្ឋដែរ ដើម្បីជៀសវាងការខាតបង់ ។
សូមបញ្ជាក់ផងដែរថានៅក្នុងយុទ្ធនាការចាក់វាក់សាំងបង្ការជំងឺសារទឹក និងអ៊ុតក្តាមលើសត្វគោក្របីក្នុងឃុំសំបួរនៅក្នុងថ្ងៃនេះ គឺមន្ត្រីជំនាញពេទ្យសត្វ បានចាក់ថ្នាំបង្ការលើសត្វគោចំនួន ២១១១ក្បាល និងក្របីបានចំនួន ៣៣៨ក្បាល សល់ពីនេះមន្ត្រីជំនាញពេទ្យសត្វភូមិឃុំបានបន្តយុទ្ធនាការចាក់វាក់សាំងទៅដល់ផ្ទះរបស់បងប្អូនប្រជាពលរដ្ឋថែមទៀតផងដែរ ។
លោក ទេព ស៊ីនឿន ប្រធានពេទ្យសត្វស្រុកទ្រាំង បានអោយដឹងថា ករណីផ្ទុះជំងឺសារទឹកលើសត្វគោក្របីនៅស្រុកទ្រាំងនេះ គឺបណ្តាលអោយក្របីចំនួន ៣០៩ ក្បាលប្រឈរមុខនិងជំងឺសារទឹកនេះ ហើយបានងាប់ក្របីចំនួន ៣៦ក្បាល និងកំពុងតែឈឺ ២៥ក្បាលទៀត ដែលនេះ ជាមូលហេតុតែមួយតម្រូវអោយបងប្អូនប្រជាពលរដ្ឋទាំងអស់ចូលរួមសហការណ៏ជាមួយនិងមន្ត្រីជំនាញពេទ្យសត្វរបស់យើង ធ្វើការចាក់វាក់សាំងបង្ការជំងឺសារទឹកនេះ ដើម្បីទុបស្កាត់កុំអោយមានការឆ្លងរីករាលដាលដល់ភូមិឃុំរបស់អស់លោក ។ លោកប្រធានពេទ្យសត្វស្រុកទ្រាំងបានអោយដឹងទៀតថា ក្របីដែលឈឺនិងងាប់នៅក្នុងទឹកដីស្រុកទ្រាំងនេះ គឺជាក្របីដែលជម្លៀសចេញពីស្រុកបូរីជលសារ ដោយសារតែកត្តាស្ថានភាពទឹក ទើបតម្រូវអោយម្ចាស់ជម្លៀសក្របីរបស់ខ្លួនមករកទីទួលសុវត្តិភាព តែដោយសារតែកត្តាអាកាសធាតុមានការប្រែប្រួលបានធ្វើធ្វើអោយកើតជាមេរោគឆ្លងរីករាលដាលដល់សត្វគោក្របីតែម្តងទៅ ៕ តាកែវ