ភ្នំពេញ៖ ពាក់ព័ន្ធនឹងករណីស្ត្រីជនជាតិចិនម្នាក់ បានធ្លាក់ពីលើសណ្ឋាគារ Rumduol Grand Hote ជាន់ទី៥ ត្រូវបានកម្លាំងសមត្ថកិច្ចប៉ុស្តិ៍ផ្សារថ្មីទី៣ បានចុះមកដល់កន្លែងទីតាំងកើតហេតុ និងបានធ្វើការឃាត់ខ្លួនជនជាតិចិនចំនួន៤នាក់ យកមកប៉ុស្តិ៍នគរបាលផ្សារថ្មីទី៣ ដើម្បីធ្វើការសួរនាំ ។ បើតាមការសន្និដ្ឋានជំហ៊ានដំបូងសង្ស័យជាករណីចាប់ជំរិត។
ហេតុការណ៍បានកើតឡើងនៅវេលាម៉ោង ១០និង៥០នាទីព្រឹកថ្ងៃទី១១ ខែសីហា ឆ្នាំ២០២០នេះ ដែលស្ថិតនៅចំណុចសណ្ឋាគារ Rumduol Grand Hote តាមបណ្តោយផ្លូវ១៧៤ ក្នុងសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ។
មុនពេលកើតហេតុ នៅវេលាម៉ោង ៥និង៣០នាទីព្រឹកថ្ងៃទី១១ ខែសីហានេះ ស្ត្រីជនជាតិចិនរូបនោះ រួមជាមួយនឹងបុរសជនជាតិចិន២នាក់ទៀត នាំគ្នាចូលក្នុងសណ្ឋាគារ Rumduol Grand Hote ដោយមានការទាញប្រតាយប្រតប់គ្នាជាមួយស្ត្រីជនរងគ្រោះ ហើយបាននាំចូលមកក្នុងសណ្ឋាគារតែម្តង។ លុះមកដល់វេលាម៉ោង ១០និង៥០នាទីព្រឹកថ្ងៃ ស្ត្រីជនជាតិចិនម្នាក់នោះ បានយកភួយចងសម្រូតចុះពីបន្ទប់ជាន់ទី៥ នៃសណ្ឋាគារ Rumduol Grand Hote គេចខ្លួន ហើយរបូតធ្លាក់រងរបួសធ្ងន់៕
ដោយ៖បញ្ញាស័ក្តិ
