ភ្នំពេញ ៖ ប្រិយមិត្តបានដឹង និងរំជួលចិត្តរួចហើយ អំពីប្អូនស្រីម្នាក់កំពុងតែជួបទុក្ខលំបាកខ្លាំងណាស់ ដោយសារតែប្អូនស្រីមានជំងឺជាច្រើនមុខ ដុំគីសក្នុងពោះវៀន ត្រូវវះកាត់ ខណៈដែលឪពុករបស់នាងជាអ្នករត់ម៉ូតូឌុបទាំងយប់ទាំងថ្ងៃកាត់ភ្លៀងកាត់ខ្យល់ ដើម្បីបានប្រាក់យកមកបង់ថ្លៃព្យាបាលកូនស្រី។
ក្រោយពីវីដេអូដ៏កម្សត់ លោកពូជាឪពុកឱថើប និងផ្តល់កម្លាំងចិត្ត ឲ្យកូនស្រីតស៊ូ កុំចុះចាញ់នឹងព្រហ្មលិខិតនៅក្នុងមន្ទីរពេទ្យ ត្រូវបានចែករំលែកយ៉ាងទូលំទូលាយនៅលើបណ្តាញសង្គម ធ្វើឲ្យគ្រប់គ្នាអាណិតអាសូរជាពន់ពេក និងសឹងទប់ទឹកភ្នែកពុំបាននោះ ឃើញថាមានបងប្អូនសប្បុរសជនមួយចំនួន បានឧបត្ថម្ភជាបន្តបន្ទាប់ ដើម្បីជាការលើកទឹកចិត្តដល់ប្អូនស្រី និងជួយសម្រាលបន្ទុកថ្លៃព្យាបាលសម្រាប់ឪពុករបស់នាងបានខ្លះ។
ដោយឡែក នៅរសៀលថ្ងៃទី១១ ខែសីហា ឆ្នាំ២០២០ លោក កាំង ពៅ និងលោក សា ម៉េត តំណាងឲ្យថ្នាក់ដឹកនាំ និងក្រុមការងារគេហទំព័រ CEN បានចុះទៅសួរសុខទុក្ខ ដោយនាំយកនូវថវិកា និងព្រមទាំងគ្រឿងបរិភោគចំនួន ជូនដល់ប្អូនស្រី សេងសុភី ដែលមានជំងឺដុះគីសក្នុងពោះវៀន និងបែកលំពែង ត្រូវវះកាត់ ដែលកំពុងសម្រាកព្យាបាលនៅមន្ទីរពេទ្យ កេតុមាលា៕ ដោយ៖ លឹម ហុង