ប្រធានាធិបតីរុស្ស៊ីលោកវ្លាឌីមៀពូទីន បានប្រកាសនៅថ្ងៃអង្គារនេះថា ក្រសួងសុខាភិបាលប្រទេស របស់លោកបានអនុម័តវ៉ាក់សាំងការពារជំងឺកូវីដ – ១៩ ដំបូងបង្អស់នៅលើពិភពលោក ហើយកូនស្រីរបស់គាត់ម្នាក់ បានប្រើវ៉ាក់សាំងនេះ។ នេះបើតាមការផ្សាយរបស់វេបសាយ RT នៅថ្ងៃពុធនេះ។
លោកពូទីនបាននិយាយថា“ កូនស្រីរបស់ខ្ញុំម្នាក់បានចាក់វ៉ាក់សាំងនេះ។ ក្នុងន័យនេះ នាងបានចូលរួមក្នុងការសាកល្បង។ បន្ទាប់ពីការចាក់វ៉ាក់សាំងលើកដំបូង នាងមានសីតុណ្ហភាព ៣៨អង្សាសេ ថ្ងៃបន្ទាប់ ៣៧អង្សាសេ ហើយនោះជាអ្វីទាំងអស់។
ប្រធានាធិបតីរុស្ស៊ីលោកវ្លាឌីមៀពូទីន បានប្រកាសពីការអនុម័តទទួលស្គាល់វ៉ាក់សាំងការពារវីរុសកូវីដ១៩ នៅថ្ងៃទី១១សីហានេះ ទោះបីជាមានការព្រួយបារម្ភ និងសំណួរជាច្រើនដែលមិនទាន់បានឆ្លើយតប អំពីសុវត្ថិភាព និងប្រសិទ្ធភាពរបស់វាក៏ដោយ ។
ប្រធានាធិបតីវ្ល៉ាឌីមៀពូទីនថ្លែងថា ប្រទេសរុស្ស៊ីបានក្លាយជាប្រទេសដំបូងគេ នៅលើពិភពលោក ដែលបានផ្តល់ការទទួលស្គាល់លើវ៉ាក់សាំង កូវីដ ១៩ នេះបន្ទាប់ពីការធ្វើតេស្តលើមនុស្សមិន ដល់ ២ ខែផងនោះ ។ ការអភិវឌ្ឍនេះ បានត្រួសត្រាយផ្លូវដ៏ធំដល់ប្រជាជនរុស្ស៊ី ប៉ុន្តែដំណាក់កាលចុងក្រោយ នៃការសាកល្បងដើម្បីធានាសុវត្ថិភាព និងប្រសិទ្ធភាពបន្ថែមទៀត នៅតែបន្តធ្វើឡើង ។
ថ្លែងនៅក្នុងកិច្ចប្រជុំរដ្ឋាភិបាល លោកពូទីន បញ្ជាក់ថា វ៉ាក់សាំងដែលបានបង្កើតឡើងនេះ គឺមានសុវត្ថិភាព ហើយលោកសង្ឃឹមថា ប្រទេសរុស្ស៊ី នឹងចាប់ផ្តើមផលិតវ៉ាក់សាំងនេះ ឱ្យបានឆាប់បំផុត ។
វ៉ាក់សាំងនេះ ត្រូវបានបង្កើតឡើងដោយវិទ្យាស្ថានហ្គាមាលីយ៉ា នៅទីក្រុងមូស្គូ ត្រូវបានគេដាក់ឈ្មោះថា Sputnik-V ។ លោកពូទីន មានប្រសាសន៍បញ្ជាក់ថា កូនស្រីរបស់គាត់ម្នាក់ ទទួលចាក់វាក់សាំងនេះ រួចទៅហើយ ៕ ដោយ៖បញ្ញាស័ក្តិ
