បុរសម្នាក់ដែលក្រោយមកត្រូវបានដឹងថា មានឋានន្តរស័ក្តិជាឧត្តមសេនីយ៍ត្រី ឋានៈអនុប្រធាននាយកដ្ឋានមួយ ត្រូវបានសមត្ថកិច្ចចាប់ខ្លួនភ្លាមៗ បន្ទាប់ពីដកកាំភ្លើងគំរាមបាញ់លើស្ត្រីម្នាក់ជាម្ចាស់ហាងយីហោ «វិមានព្រិល» ធ្វើឲ្យភ្ញៀវផឹកស៊ីរត់ចែកជើងគ្នាព្រាត កាលពីវេលាម៉ោង ១ និង ៣០ នាទីយប់ រំលងអធ្រាត្រឈានចូលថ្ងៃទី១២ ខែសីហា ឆ្នាំ២០២០ ស្ថិតនៅផ្លូវ១៦៣ សង្កាត់ទួលទំពូងទី១ ខណ្ឌចំការមន រាជធានីភ្នំពេញ។
បើតាមប្រភពពីភ្ញៀវម្នាក់បានប្រាប់ឲ្យដឹងថា មុនពេលកើតហេតុ គេឃើញបុរសម្នាក់ស្លៀកពាក់ស៊ីវិល បានជិះរថយន្តម៉ាក Lexus 330 ពណ៌ទឹកប្រាក់ ពាក់ស្លាកលេខ នគរបាល 2. 7119 បានចូលផឹកស៊ី នៅហាងកើតហេតុ ហើយបន្ទាប់ផឹកស៊ីស្រវឹងស្រឿងៗ បុរសរូបនេះក៏បានលេបខាយសម្ដីស្នេហាជាមួយម្ចាស់ហាង។ ប៉ុន្តេ សន្ទុះក្រោយមក ក៏ស្រាប់តែផ្ទុះពាក្យសម្តីខ្លាំងៗជាមួយម្ចាស់ហាងមួយប្រាវ រួចក៏បើករថយន្តចេញបាត់ទៅ។
ប្រភពដដែលបន្តថា មួយសន្ទុះក្រោយ ក៏ស្រាប់តែបុរសរូបនេះ បានបើករថយន្តត្រឡប់មកវិញ ហើយបានដកកាំភ្លើងគំរាមបាញ់លើស្ត្រីម្ចាស់ហាង ធ្វើឲ្យភ្ញៀវនៅក្បែរភ័យព្រលឹងចុងសក់គ្រប់ៗគ្នាតែម្តង។ ភ្លាមៗនោះ ស្ត្រីម្ចាស់ហាងក៏បានរាយការណ៍ទៅកម្លាំងសមត្ថកិច្ច និងអាវុធហត្ថខណ្ឌចំការមន ដែលបានចុះទៅដល់កន្លែងកើតហេតុយ៉ាងលឿន ប៉ុន្តែ ពេលនោះជនបង្កបានឡើងរថយន្តបើកគេចខ្លួនចេញទៅបាត់។ ទោះយ៉ាងណា សមត្ថកិច្ចបានបើករថយន្តដេញតាមពីក្រោយ រហូតដល់សង្កាត់ច្បារអំពៅ ផ្លូវជាតិលេខ១ ខណ្ឌច្បារអំពៅ ទើបធ្វើការឃាត់ខ្លួនបុរសរូបនេះ រួចនាំខ្លួនមកកាន់អធិការដ្ឋានខណ្ឌចំការមន ដើម្បីចាត់ការទៅតាមផ្លូវច្បាប់។
តាមរយៈកាតបង្ហាញសមត្ថកិច្ច ជនបង្ករូបនេះមានឈ្មោះ ជិន សាមីឌី អាយុ ៣២ ឆ្នាំ មានឋានន្តរស័ក្តិជាឧត្តមសេនីយ៍ត្រី ឋានៈអនុប្រធាននាយកដ្ឋាន មានទីលំ នៅផ្ទះ លេខ ១៥V ភូមិវាលស្បូវ សង្កាត់វាលស្បូវ ខណ្ឌច្បារអំពៅ ។
បច្ចុប្បន្ន សមត្ថកិច្ចកំពុងសួរនាំជនសង្ស័យ និងស្ត្រីជាម្ចាស់ហាង ដើម្បីដោះស្រាយទៅតាមនីតិវិធី៕ ដោយ៖ លឹម ហុង