កម្មករអណ្តូងរ៉ែមាសចំនួន ៩៥៥នាក់ បានជាប់នៅក្រោមដី នៅក្នុងប្រទេសអាហ្វ្រិចខាងត្បូង ដោយសារតែការដាច់ភ្លើងអគ្គិសនី។ ប្រតិបត្តិការសង្គ្រោះកំពុងតែបន្តធ្វើឡើង ដើម្បីរំដោះ ពួកគេចេញ។ នេះបើតាមការចេញផ្សាយរបស់ BBC។
អ្នកនាំពាក្យក្រុមហ៊ុនរុករករ៉ែមាស Sibanye-Stillwater បានថ្លែបញ្ជាក់នៅថ្ងៃសុក្រព្រឹកនេះថា ភ្លើងអគ្គិសនីបានតភ្ជាប់វិញហើយ ដើម្បីរំដោះកម្មករទាំងនោះចេញ។
ពួកកម្មករទាំងអស់បានជាប់នៅក្នុងអណ្តូងរ៉ែចាប់តាំងពីយប់ថ្ងៃពុធមកម្លេះ។ កម្មករទាំងនោះ ត្រូវគេរំពឹងថានឹងត្រូវគេនាំឲ្យទៅញាំអាហារ និងងូតទឹកចិត្តបន្ទាប់ពីគេរំដោះពួកគេបាន មុនពេលឲ្យពេទ្យពិនិត្យសុខភាព។
ការដាច់ចរន្តអគ្គិសនី ត្រូវបានគេជឿជាក់ថាបណ្តាលមកពីខ្យល់ព្យុះបោកបក់ប៉ះបង្គោលភ្លើង ដែលនៅជិតអណ្តូងរ៉ែនោះ។
អណ្តូងរ៉ែមាស Beatrix ដែលកម្មករកំពុងជាប់មាន ២៣ថ្នាក់ ហើយមានជំរៅចុះទៅក្រោមដីរហូត ដល់ ១.០០០ម៉ែត្រ។
សូមបញ្ជាក់ថា ប្រទេសអាហ្វ្រិចខាងត្បូងគឺជាប្រទេសផលិតរ៉ែមាសឈានមុខគេក្នុងពិភពលោក ប៉ុន្តែស្តង់ដាសុវត្ថិភាពនៃឧស្សាហ៏កម្មក្នុងប្រទេសនេះតែងតែជាបញ្ហាចោទ៕ សុភ័ក្ត្រ