និយាយអំពីកញ្ញា Ah Na Ros នោះប្រិយមិត្តប្រាកដជានៅចាំបានហើយ ដែលកញ្ញាជាតួអង្គស្រីម្នាក់ថតបទចម្រៀង MV មានចំណងជើង «សង្សារក៏ផិត មិត្តក៏ក្បត់» ហើយត្រូវបានមហាជនរិះគន់ឡើងកក្រើកផ្ទៃប្រទេស ដោយសារតែមិនអាចទទួលយកបាន ចំពោះសកម្មភាពក្នុងឈុតស្នេហាដ៏ក្តៅសាច់ជ្រុលហួសដែនកំណត់របស់នាង ជាមួយតួប្រុសម្នាក់ ថតនៅមុខឡាន និងនៅលើគ្រែ។
ដោយឡែកកាលពីពេលថ្មីៗនេះ កញ្ញា រ៉ូស ត្រូវបានគេនាំគ្នារិះគន់សារជាថ្មី ក្រោយនាងបានប្រើពាក្យពេចន៍និយាយខឹងទៅលើអ្នកលេងម្នាក់នៅលើបណ្តាញសង្គម Tik Tuk ថា៖ «មីងស្គាល់ វិមានឯករាជ្យ អត់ ស្គាល់ ក្រដាស១០ ក្រដាស ២០ អត់ បើអត់ស្គាល់មីង អាចចូលទៅស្វែងរកនៅក្នុង បណ្ដាញសង្គម យូធូប (Youtube) បាន នោះមីងនឹងដឹងថាខ្ញុំជានរណាគេហើយ» ។
យ៉ាងណាមិញ ក្រោយទទួលរងការរិះគន់យ៉ាងចាស់ៗដៃ ដោយសារតែពាក្យសម្តីខាងលើនេះ កញ្ញា រ៉ូស បានចេញមុខបកស្រាយថា តាមពិតទៅ ពាក្យដែលនាងលើកឡើង គឺចង់ប្រាប់ទៅមីងម្នាក់នោះថា នាងបានចូលប្រឡូកក្នុងវិស័យសិល្បៈច្រើនឆ្នាំល្បីប៉ុណ្ណឹងដែរ តែបែរជាគាត់មិនស្គាល់រូបនាង? ហើយបើមិនស្គាល់នាងថាជានរណា គឺហាក់ដូចជាគាត់មិនដែលស្គាល់វិមានឯករាជ្យ ស្គាល់ក្រដាស 10$ ក្រដាស 20$ អ៊ីចឹង។
ប៉ុន្តែ អ្វីដែលធ្វើឲ្យគ្រប់គ្នាចង់លើសជាតិស្ករនោះ គឺនៅពេលនាងត្រូវបានសម្ភាសន៍ជាមួយលោក អ៊ឹម ជីវ៉ា ស្រាប់តែនិយាយអួតសុទ្ធតែថា៖ “បងប្អូនខ្ញុំសុទ្ធតែអ្នកមានទាំងអស់ ពូខ្ញុំសុទ្ធតែធ្វើការនៅក្រសួងមហាផ្ទៃ ផ្កាយ២ មីងខ្ញុំសុទ្ធតែអគ្គនាយក ពូមីងខ្ញុំបង្កើតហ្មង! ប្អូនស្រីម៉ាក់ខ្ញុំ ប្តីគាត់ធ្វើអគ្គនាយកប៉ុស្តិ៍លេខ៥ បងប្អូនៗខ្ញុំគឺពេញភ្នំពេញចា៎ ប្អូនស្រីម៉ាក់ខ្ញុំនិយាយទៅ ម៉ាក់ខ្ញុំគាត់បងប្អូន ១០នាក់ និយាយទៅនៅពេញភ្នំពេញហ្នឹងហ្មង។ ពូខ្ញុំផ្ទះនៅគៀនស្វាយវីឡាប៉ុនណាណី មីងខ្ញុំអីសុទ្ធតែផ្ទះវីឡា តែខ្ញុំមិនដែលចង់ពឹងពាក់បងប្អូនណាទេ។ និយាយទៅ ជីវិតខ្ញុំគឺឯករាជ្យ ម្ចាស់ការលើខ្លួនឯង ខ្ញុំរស់នៅ ចា៎ខ្ញុំចូលចិត្តនៅ ចូលចិត្តឯករាជ្យ និយាយទៅបងចា៎…”៕ ដោយ៖ លឹម ហុង
