សៀមរាប៖ លោកឃឹម ហ្វីណង់ អភិបាលស្រុកបន្ទាយស្រី បានសរសេរសារនៅលើផេកហ្វេសប៊ុកនៅថ្ងៃពុធនេះថា
មានអ្នកសួរខ្ញុំថា តើការហាមឃាត់ការធ្វើសត្តឃាតសត្វឆ្កែ និងការធ្វើអាជីវកម្មសាច់ឆ្កែ នៅក្នុងស្រុកបន្ទាយស្រី បានអនុវត្តដល់ណាហើយ?
កាលពីម្សិលមិញនេះ មន្ត្រីរបស់រដ្ឋបាលស្រុកបន្ទាយស្រី បានសហការជាមួយមន្ត្រីមកពីមន្ទីរកសិកម្មខេត្តសៀមរាប ចុះត្រួតពិនិត្យកន្លែងទិញលក់សត្វឆ្កែនៅក្នុងទូទាំងស្រុកបន្ទាយស្រី និងបានសង្កេតឃើញថា កន្លែងដែលទិញលក់ធំជាងគេនៅក្នុងស្រុក(និងក៏ជាកន្លែងធំជាងគេនៅក្នុងខេត្តសៀមរាបដែរនោះ) បានបញ្ឈប់ការធ្វើអាជីវកម្មរបស់ខ្លួនហើយ ប៉ុន្តែនៅសល់ចំនួន២កន្លែងទៀតដែលកំពុងធ្វើអាជីវកម្ម ហើយត្រូវបានទទួលការណែនាំសាជាថ្មីឲ្យបញ្ឈប់អាជីវកម្មផងដែរ។
លោកបន្តថា ក្នុងដំណាក់កាលនេះ រដ្ឋបាលស្រុកបន្ទាយស្រីនឹងបន្តប្រកាន់ជំហរទន់ភ្លន់លើបញ្ហានេះ ផ្តល់អាទិភាពទៅលើគោលការណ៍ស្ម័គ្រចិត្ត និងការណែនាំអប់រំឲ្យបញ្ឈប់ច្រើនជាងការចាប់បង្ខំ ហើយរដ្ឋបាលស្រុកក៏កំពុងធ្វើការជាមួយអង្គការសង្គ្រោះសត្វកម្ពុជា (Animal Rescue Cambodia) និងអង្គការ ហ្វរផរ (Four Paws) ដើម្បីរិះរកវិធីជួយសម្រួលដល់ការផ្លាស់ប្តូរមុខរបរថ្មីរបស់បងប្អូនអាជីវករក្នុងដំណាក់កាលអន្តរកាលនេះ។
លោក បានលើកឡើងថា សង្ឃឹមថា នៅក្នុងរយៈពេលដ៏ខ្លីខាងមុខនេះ បន្ទាយស្រីនឹងក្លាយទៅជាស្រុកដែលគ្មានការជួញដូរសាច់ឆ្កែទាំងស្រុង និងស្តារមកវិញនូវកិត្តិនាមជាស្រុកទេសចរណ៍ ដែលមានការឲ្យតម្លៃទៅលើអាយុជីវិត និងសុខុមាលភាពរបស់សត្វឆ្កែ។
សូមបញ្ជាក់ថា ការលួច ការជួញដូរ ការដឹកជញ្ជូន សម្លាប់និងលក់សត្វឆ្កែ ដើម្បីយកសាច់ទៅធ្វើជាម្ហូបអាហារ មានការកើនឡើងគួរឲ្យបារម្ភ ដែលក្នុងនោះស្រុកបន្ទាយស្រី ត្រូវបានរកឃើញថា ជាកន្លែងជួញដូរធំជាងគេនៅក្នុងខេត្តសៀមរាប ជាពិសេសនៅក្នុងឃុំព្រះដាក់ ដោយមានទីតាំងប្រមូលទិញពីបណ្តាស្រុកផ្សេងៗ ស្តុកទុកសត្វឆ្កែរស់ជាច្រើនកន្លែង និងកំពុងប្រតិបត្តិការផ្គត់ផ្តង់សត្វឆ្កែរស់ និងសាច់ឆ្កែបន្តទៅកាន់តំបន់ដទៃទៀត ក្នុងប្រទេសកម្ពុជា។ ការជួញដូរនេះ បានធ្វើឱ្យប៉ះពាល់ដល់វិស័យទេសចរណ៍ និងកេរ្តិ៍ឈ្មោះរបស់ស្រុកបន្ទាយស្រី និងខេត្តសៀមរាប តួយ៉ាង មានសារព័ត៌មានអន្តរជាតិចំនួន១៨០បណ្តាញ បានធ្វើការចុះផ្សាយរិះគន់ នៅលើគេហទំព័ររបស់ពួកគេ ក្នុងអំឡុងពីខែវិច្ឆិកា និងខែធ្នូ២០១៩៕ ដោយ៖កូឡាប
