ភ្នំពេញ៖ ដើម្បីឆ្លើយតបនឹងការសម្រេចកាត់ចេញផ្នែកខ្លះនៃប្រព័ន្ធអនុគ្រោះពន្ធ EBA របស់អឺរ៉ុបនោះ រាជរដ្ឋាភិបាលកម្ពុជា ដែលមានក្រសួងសេដ្ឋកិច្ច និងហិរញ្ញវត្ថុ ជាសេនាធិការ បានរៀបចំគោលនយោបាយយុទ្ធសាស្ត្រសម្រាប់ទប់ទល់ ដោយត្រៀមថវិកាជាង១ពាន់លានដុល្លារ ដើម្បីទប់ទល់និងវិបត្តិ ដែលអាចកើតមានឡើង ចាប់តាំងពីដើមឆ្នាំ២០១៩ ពេលមិនទាន់កើតមានជំងឺកូវីដ១៩ ហើយបើគិតទាំង EBA និងកូវីដ១៩ រាជរដ្ឋាភិបាល ត្រៀមកញ្ចប់ថវិការហូតដល់ជាង១ពាន់លានដុល្លារ ដើម្បីទប់ទល់ចំពោះវិបត្តិ ដែលអាចកើតមានឡើង។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានបញ្ជាក់ឲ្យដឹងថា ពាក់ព័ន្ធនឹង EBA នេះ ក្រសួងសេដ្ឋកិច្ច បានត្រៀមថវិកាតាំងពីដើមឆ្នាំ២០១៩មកម្ល៉េះ មុនពេលមានកូវីដ១៩ទៅទៀត។ ក្រសួងសេដ្ឋកិច្ច បានត្រៀមថវិការាប់លាន ដើម្បីទប់ទល់នឹង EBA ប៉ុន្តែបើសិនជាគិតទាំង EBA និងកូវីដ១៩ មានថវិកា១,១៦៤លានដុល្លារ។
លោក បានបញ្ជាក់ថា ការដកចេញផ្នែកខ្លះនៃប្រព័ន្ធអនុគ្រោះ EBA នេះ មិនមែនជាការបាត់បង់ទីផ្សារនៅអឺរ៉ុបនោះទេ។ អឺរ៉ុបនៅតែជាទីផ្សារបស់កម្ពុជា គ្រាន់តែមុខទំនិញមួយចំនួន ដែលពីមុនធ្លាប់តែអនុគ្រោះពន្ធ មកជាបង់ពន្ធវិញប៉ុណ្ណោះ។
ការចូលជាធរមាននេះមានរយៈពេល៦ខែ បន្ទាប់ EU ចេញសេចក្តីសម្រេចរបស់ខ្លួន កាត់ផ្នែកខ្លះប្រព័ន្ធអនុគ្រោះពន្ធ EBA កាលពីថ្ងៃទី១២ ខែកុម្ភៈ ឆ្នាំ២០២០។ តាមការវាយតម្លៃរបស់រាជរដ្ឋាភិបាល ការកាត់ចេញផ្នែកខ្លះប្រព័ន្ធអនុគ្រោះពន្ធ EBA នេះ មានទឹកប្រាក់ប្រមាណ១០០លានដុល្លារ៕
ដោយ៖CEN
