ភ្នំពេញ៖ ឯកឧត្តម ឧត្តមសេនីយ៍ឯក លឹម សុខារស្មី បានថ្លែងថា ករណីហឹង្សាកើតឡើងបង្កដោយលោកឧត្តមសេនីយ៍ត្រី ជិន សាមីឌី ឋានៈ អនុប្រធាននាយកដ្ឋានគ្រប់គ្រងសន្តិសុខឯកជន ជាមួយម្ចាស់អាហាដ្ឋានយីហោ វិមានព្រិស បានព្រមព្រៀងគ្នា ដោយជម្រើសផ្សះផ្សាបញ្ចប់រឿង នៅអធិការដ្ឋាននគរបាលខណ្ឌចំការមន ហើយនាយកដ្ឋានគ្រប់គ្រងសន្តិសុខឯកជន បានធ្វើការអប់រំ ណែនាំ លោកឧត្តមសេនីយ៍ត្រី ជិន សាមីឌី ដោយធ្វើកិច្ចសន្យាបញ្ឈប់សកម្មភាពឆ្គាំឆ្គងបែបនេះនៅទីសាធារណៈបន្តទៀត និងក៏បានធ្វើកំណត់ហេតុដកហូតអាវុធ ព្រមទាំងអនុវត្តវិន័យរបស់កងកម្លាំងនគរបាលជាតិ។
ឯកឧត្តម ឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្តិសុខឯកជន បានឲ្យដឹងថា កាលពីវេលាម៉ោង២៣:៣០នាទីយប់ ថ្ងៃទី១១ ខែសីហា ឆ្នាំ២០២០ នៅចំណុចអាហាដ្ឋានយីហោ វិមានព្រិស មានករណីហឹង្សាកើតឡើងបង្កដោយលោកឧត្តមសេនីយ៍ត្រី ជិន សាមីឌី ឋានៈ អនុប្រធាននាយកដ្ឋានគ្រប់គ្រងសន្តិសុខឯកជន។
ជនបង្កហេតុខាងលើ ត្រូវបានកម្លាំងជំនាញនៃស្នងការដ្ឋាននគរបាលរាជធានីភ្នំពេញធ្វើការឃាត់ខ្លួន និងធ្វើកំណត់ហេតុប្រគល់ជូននាយកដ្ឋានគ្រប់គ្រងសន្តិសុខឯកជនដើម្បីចាត់ការបន្ត។
ចំពោះករណីនេះ ឯកឧត្តម ឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្តិសុខឯកជន បានបញ្ជាឲ្យក្រុមប្រឹក្សាវិន័យរបស់នាយកដ្ឋានធ្វើការសួរនាំបំភ្លឺលោកឧត្តមសេនីយ៍ត្រី ជិន សាមីឌី ។
នៅចំពោះមុខក្រុមការងារ លោកឧត្តមសេនីយ៍ត្រី ជិន សាមីឌី បានសារភាពទទួលស្គាល់កំហុស ពិតជាបានឈ្លោះប្រកែកគ្នា ដោយពាក្យសម្តីជាមួយមិត្តភក្តិអំឡុងពេលហូបចុកនោះពិតប្រាកដមែន ប៉ុន្តែពុំបានប្រើអាវុធបាញ់គំរាម ឬ បង្ករបួសស្នាមដល់ម្ចាស់ហាងវិមានព្រិលនោះទេ រីឯរឿងហេតុនេះ ភាគីពាក់ព័ន្ធបានព្រមព្រៀងគ្នា ដោយជម្រើសផ្សះផ្សាបញ្ចប់រឿង នៅអធិការដ្ឋាននគរបាលខណ្ឌចំការមន រួចរាល់ផងដែរ។
ដោយឡែក នាយកដ្ឋានគ្រប់គ្រងសន្តិសុខឯកជន បានធ្វើការអប់រំ ណែនាំ លោកឧត្តមសេនីយ៍ត្រី ជិន សាមីឌី ដោយធ្វើកិច្ចសន្យាបញ្ឈប់សកម្មភាពឆ្គាំឆ្គងបែបនេះ នៅទីសាធារណៈបន្តទៀត និងក៏បានធ្វើកំណត់ហេតុដកហូតអាវុធ ព្រមទាំងអនុវត្តវិន័យរបស់កងកម្លាំងនគរបាលជាតិ។
ប្រធាននាយកដ្ឋានគ្រប់គ្រងសន្តិសុខឯកជន បានលើកឡើងថា ក្នុងនាមថ្នាក់ដឹកនាំនាយកដ្ឋានគ្រប់គ្រងសន្តិសុខឯកជន សូមថ្លែងអំណរគុណចំពោះសាធារណជន អ្នកសារព័ត៌មាន ពិសេសបណ្តាញទំនាក់ទំនងសង្គម ដែលបានចូលរួមចំណែកក្នុងកិច្ចការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម យើងខ្ញុំរីករាយទទួលយកការទិតៀនទាំងឡាយក្នុងន័យស្ថាបនា ដើម្បីជាមូលដ្ឋានក្នុងការកែលម្អចំណុចខ្វះខាតក្នុងការគ្រប់គ្រង់កម្លាំង ក៏ដូចជាការអនុវត្តតួនាទីភារិច្ចរបស់ខ្លួន និងក៏សូមអំពាវនាវ សូមបងប្អូនកុំធ្វើការសន្និដ្ឋាន វាយតម្លៃខ្វះការស៊ើបបញ្ជាក់ច្បាស់ ដែលជាហេតុបង្កឲ្យមានការប៉ះកិត្តិសយរបស់បុគ្គល ឬស្ថាប័នអនុវត្តច្បាប់។
បើតាមផេកហ្វេសប៊ុក Kert Ey (កញ្ញាលីលី) ជាម្ចាស់អាហាដ្ឋានយីហោ វិមានព្រិស បានសរសេររៀបរាប់ថា គិតទៅចុះគេមិនពិតក៏ចុះដែល បើមិនមែន ជារឿងពិតកុំនិយាយឲ្យគេ ខ្ញុំមិនមែន គាត់សុំស្នេហ៍ហើយក៏មិនបានរកបាញ់នាងអី ដែលគាត់ជាបងប្រុស ដែលស្គាល់គ្នាហើយមានរឿងនៅហាងនាងខ្ញុំ នាងខ្ញុំគ្រាន់តែចូលមកបំភ្លឺទេ សុំអង្វរអស់លោកសារព័ត៌មានទាំងឡាយអើយ រឿងខ្លះអាច មានរឿង ចុះទៅធ្វើឲ្យគេ ឬអស់លោកសប្បាយចិត្តណាស់ឃើញ ខ្មែរដូចគ្នាឈ្លោះគ្នា? ធ្វើជាអ្នកសារព័ត៌មានត្រូវដឹងរឿងឲ្យច្បាស់សិនមិនមែនចេះតែចុះទេៗ ធ្វើឲ្យខូចឈ្មោះនាងខ្ញុំអស់ថ្ងៃនាងខ្ញុំសុំ បញ្ជាក់គាត់មិនបានសុំស្នេហ៍នាងខ្ញុំហើយក៏អត់បានញ៉ែនាងខ្ញុំអីដែរ ហើយក៏មិនបានរកបាញ់អ្វីដែរ សុំកុំយករូបនាងខ្ញុំផុសតទៀត , អស់លោកសារព័ត៌មានកុំដោយសារប្រយយោន៍របស់ខ្លួន រួចបំផ្លាញអ្នកដទៃ។
សូមបញ្ជាក់ថា ជនសង្ស័យ២នាក់ ត្រូវបានសមត្ថកិច្ចឃាត់ខ្លួន ជាមួយវត្ថុតាងកាំភ្លើងខ្លី១ដើម បន្ទាប់ពីមានជម្លោះនៅហាង ផឹកស៊ីផ្អើលភ្ញៀវផឹកស៊ី រត់ចែកជើងគ្នា កាលពីវេលា ម៉ោង១និង៣០នាទីយប់រំលងអធ្រាត្រឈានចូលថ្ងៃពុធ ទី១២ ខែសីហា ឆ្នាំ២០២០ ស្ថិតនៅផ្លូវ១៦៣ ចំណុចហាងផឹកស៊ី យីហោវិមានព្រិល សង្កាត់ទួលទំពូងទី១ខណ្ឌចំការមន រាជធានីភ្នំពេញ ។
បុរស២នាក់ ស្លៀកពាក់ស៊ីវិល ក្នុងនោះមាន( លោកឧត្តមសេនីយ៍ត្រី ) បានជិះរថយន្តម៉ាកឡិចស៊ីស៣៣០ ពណ៌ទឹកប្រាក់ ពាក់ផ្លាកលេខ នគរបាល 2. 7119 បានចូលផឹកស៊ី នៅហាងកើតហេតុ ហើយគេឃើញបុរសនោះ ស្រវឹងស្រឿងៗ ក៏កើតជម្លោះក្នុងហាង មួយប្រាវ រួចមកបើករថយន្តចេញបាត់ទៅ ។
ក្រោយពេលឃាត់ខ្លួន ជនសង្ស័យបាន បង្ហាញកាតថាខ្លួន ជានគរបាល មានឈ្មោះ ជិន សាមីឌី អាយុ៣២ឆ្នាំ មានឋានន្តរស័ក្តិ ជាឧត្តមសេនីយ៍ត្រី ឋានៈ អនុប្រធាននាយកដ្ឋាន មានទីលំនៅផ្ទះលេខ ១៥V ភូមិវាលស្បូវ សង្កាត់វាលស្បូវ ខណ្ឌច្បារអំពៅ ៕ដោយ៖កូឡាប
