ភ្នំពេញ៖ ដូចដែលប្រិយមិត្តបានទទួលជ្រាប និងផ្ទុះសំណើចហួសចិត្តរួចហើយ ចំពោះកញ្ញា An Na Rose ដែលត្រូវបានមហាជននៅក្នុងបណ្តាញសង្គមហ្វេសប៊ុក មានការចាប់អារម្មណ៍យ៉ាងខ្លាំង ជាមួយការរិះគន់យ៉ាងចាស់ៗដៃ ដោយមានទាំងអ្នកយកទៅត្រូលទៀតផង ដោយសារតែសម្តីប៉ុន្មានម៉ាត់ដែលនាងបាននិយាយនៅលើ Tik Tuk ខឹងមីងម្នាក់ដែលអត់ស្គាល់ខ្លួនថាជានរណា ក្នុងខ្លឹមសារយ៉ាងដូច្នេះថា «មីងស្គាល់ វិមានឯករាជ្យអត់? ស្គាល់ក្រដាស ១០ ក្រដាស ២០ អត់ បើអត់ស្គាល់ទេ មីងអាចស្វែងរកមើល នៅក្នុងបណ្ដាញសង្គម យូធូប បាន នោះមីងនឹងដឹងថា ខ្ញុំជានរណាគេហើយ»។
យ៉ាងណាមិញ ស្របពេលដែលកំពុងល្បីខ្លាំងពេកដោយសាររឿងនេះ ក៏ស្រាប់តែលេចធ្លាយព័ត៌មានថា តាស្រីស៊ិចស៊ីរូបនេះបានបោកលុយគេអស់រាប់ពាន់ដុល្លារមិនសង ដែលធ្វើឲ្យរឿងនេះផ្ទុះកក្រើកជាថ្មី។
ក្រោយពីបានឃើញបែបនេះ កញ្ញា Rose បានសម្តែងការហួសចិត្តយ៉ាងខ្លាំងតែម្តង និងបានបញ្ចាក់ថា ការចោទប្រកាន់ខាងលើនេះ គឺពុំមានជាការពិតនោះទេ ដោយនាងបានចាត់ទុកករណីនេះ គ្រាន់តែជាចេតនារបស់បុគ្គលមួយនោះបង្កើតអាខោនហ្វេសប៊ុកក្លែងក្លាយ ចង់បំផ្លាញកិត្តិយសរបស់នាងប៉ុណ្ណោះ។
ជាក់ស្តែង តាមរយៈគណនីហ្វេសប៊ុករបស់ខ្លួន កញ្ញា Rose បានចេញមកបញ្ជាក់យ៉ាងដូច្នេះថា៖ «សូមបងប្អូនមួយចំនួនតូច មេត្តាបញ្ឈប់យករូបថតនាងខ្ញុំទៅបង្កើត account ក្លែងក្លាយ និងបង្កើតរឿងមិនពិតប្រាកដដើម្បីបំផ្លាញកិត្តិយស និងសេចក្តីថ្លៃថ្នូររបស់នាងខ្ញុំតទៅទៀតទៅ បើពុំដូច្នោះនាងខ្ញុំនឹងចាត់វិធានការតាមផ្លូវច្បាប់» ។
កញ្ញា Rose ក៏បានបញ្ជាក់បន្ថែមទៅកាន់បងប្អូនអ្នកប្រើប្រាស់បណ្តាញសង្គម ឲ្យបានជ្រាបថា អាខោនហ្វេសប៊ុករបស់នាងដែលកំពុងលេងបច្ចុប្បន្ន គឺមានតែ២នេះគត់ៈ (AN Na Rose និង An Na Rose) ក្រៅពីនេះគឺនាងពុំទទួលខុសត្រូវឡើយ ៕ ដោយ៖ លឹម ហុង