វីដេអូមួយរបស់បុរសម្នាក់ជាកម្មករនេសាទ បានធ្វើឲ្យគ្រប់គ្នានៅលើបណ្តាញសង្គម ស្លុតចិត្ត និងអាណិតអាសូរហួសថ្លែង បន្ទាប់ពីបានឃើញគាត់បង្ហោះផ្តាំផ្ញើប្រពន្ធក្នុងចិត្តគិតថាជាលើកចុងក្រោយ ស្ថិតក្នុងស្ថានភាពរបួសរលាកពាសពេញផ្ទៃមុខ និងដងខ្លួន កំពុងរសាត់អណ្តែតតែឯងលើផ្ទៃសមុទ្រគ្មានកោះត្រើយ បន្ទាប់ពីជួបគ្រោះអកុសលផ្ទុះហ្គាសបណ្តាលឲ្យលិចទូក។
នៅចំពោះមុខកាមេរ៉ាទូរស័ព្ទ កណ្តាលផ្ទៃសាគរតែឯង កម្មករចុះទូកនេសាទនៅស្រុកថៃរូបនេះ បាននិយាយផ្តាំផ្ញើប្រពន្ធជាទីស្រឡាញ់ ឲ្យមើលថែកូនបានល្អផង ព្រោះពេលនេះ គាត់គ្មានសង្ឃឹមនឹងរស់ទេ ខណៈខ្លួនប្រាណពោរពេញទៅដោយរបួសរលាក ហើយពុំឃើញស្រមោលទូកណាមួយបើកចូលមកក្បែរសោះឡើយ ខណៈដែលការទាក់ទងទៅថៅកែក៏លែងបាន ព្រោះគ្មានសេវា។
ទោះយ៉ាងណា ជីវិតគាត់ពិតជាថ្លៃណាស់ បន្ទាប់ពីរសាត់អណ្តែតនៅលើពោងសង្គ្រោះអស់រយៈពេល ៤ យប់ ៤ថ្ងៃ គាត់ក៏ត្រូវបានគេស្វែងរកឃើញ និងសង្គ្រោះឡើងគោកដោយសុវត្ថិភាព។ នេះបើយោងតាមគណនីហ្វេសប៊ុកបុរសខាងលើដែលមានឈ្មោះជាភាសាថៃ «ลี ฮ้ว» បានបង្ហោះវីដេអូពីខណៈពេលដ៏អស់សង្ឃឹមរបស់គាត់ផ្តាំផ្ញើប្រពន្ធជាលើកចុងក្រោយ និងសរសេររៀបរាប់ប្រាប់បងប្អូននៅក្នុងបណ្តាញសង្គមថា៖ «ខ្ញុំបាទបានជួបឧប្បទ្ទវហេតុផ្ទុះហ្គាសនៅកណ្តាលសមុទ្រលិចទូក ៤យប់ទើបបានគេរកឃើញ ជីវិតខ្ញុំអើយ…. ព្រោះតែជីវភាពក្រសម្រេចចិត្តមកធ្វើការស្រុកថៃគិតថា ជីវភាពប្រសើរតែមិនដូចការគិត… តែបែរជាបរាជ័យទៅវិញ…»។
ដោយឡែកបើតាមមន្ត្រីស្ថានទូតកម្ពុជាប្រចាំប្រទេសថៃ បានបញ្ជាក់ប្រាប់ឲ្យដឹងថា៖ «ស្ថានទូតបានបញ្ជាក់ថា ពលករម្នាក់នេះគាត់បានផុតពីគ្រោះថ្នាក់ហើយ ពេលនេះក្រុមការងារស្ថានទូតកំពុងធ្វើដំណើរចុះទៅសួរសុខទុក្ខគាត់។
ករណីពលករនេសាទខ្មែរផ្ទុះហ្គាសនៅលើទូកនេសាទពលករគ្រោះថ្នាក់មានឈ្មោះ វ៉ាន់ ឡុន ភេទប្រុស អាយុ២៥ឆ្នាំ មានទីលំនៅខេត្តកំពង់ឆ្នាំង បច្ចុប្បន្ននេះ បានចេញពីមន្ទីរពេទ្យមកសម្រាកព្យាបាលនៅបន្ទប់ស្នាក់នៅក្នុងស្រុកប៉ាកណាម ខេត្តរ៉ាក់យ៉ង។ ពេលនេះ ក្រុមការងារស្ថានទូតកំពុងចុះទៅជួបគាត់ផ្ទាល់ដើម្បីសួរសុខទុក្ខ និងជួយជាអំណោយ ក៏ដូចជាថវិកាមួយចំនួនឧបត្ថម្ភដល់រូបគាត់។»៕ ដោយ៖ លឹម ហុង
