ភ្នំពេញ៖ បណ្ឌិត ហោ ប៉េង សាកលវិទ្យាធិការនៃសាកលវិទ្យាល័យជាតិគ្រប់គ្រង និងលោក Nick Beresford តំណាងនិវាសនដ្ឋាន UNDP ប្រចាំកម្ពុជា បានចុះហត្ថលេខាលើអនុស្សរណៈស្ដីពីការយោគយល់គ្នា (MOU) ក្នុងគោលបំណងរៀបចំ និងជំរុញកិច្ចសហប្រតិបត្តិការរវាងភាគីទាំងពីរ។
ការចុះហត្ថលេខានេះត្រូវបានធ្វើឡើង បន្ទាប់ពីការអនុវត្តសកម្មភាពរួមគ្នាជាច្រើនក្នុងរយៈពេលប៉ុន្មានឆ្នាំចុងក្រោយនេះ ជាពិសេស ការបង្កើតមជ្ឈមណ្ឌលឧត្តមភាពសេដ្ឋកិច្ចឌីជីថល ក្រោមការឧបត្ថម្ភរបស់ UNDP នៅក្នុងបរិវេណសាកលវិទ្យាល័យនេះក្នុងរាជធានីភ្នំពេញ។
អនុស្សរណៈនេះ ជាការចាប់ផ្តើមនូវកិច្ចសហប្រតិបត្តិការក្នុងរយៈពេលពីរឆ្នាំ ហើយផ្តោតសំខានលើការងារជាច្រើន ដូចជា ការកសាងសមត្ថភាព និងបណ្ដុះបណ្ដាល ការសិក្សាស្រាវជ្រាវរួមគ្នា និងការបង្កើតប្រព័ន្ធទិន្នន័យ និងធនធានព័ត៌មាន រួមទាំងប្រព័ន្ធទូទៅ ក៏ដូចជាការពង្រឹងស្ថាប័ន។ បន្ទាប់ពីការចុះហត្ថលេខាលើអនុស្សរណៈនេះរួច នឹងមានការរៀបចំកម្មវិធីការងារដើម្បីអនុវត្តសកម្មភាពជាក់លាក់រួមគ្នា នាពេលអនាគត។
លោក Nick Beresford មានប្រសាសន៍ថា «UNDP ទទួលស្គាល់ពីតួនាទីរបស់សាកលវិទ្យាជាតិគ្រប់គ្រង ក្នុងនាមជាស្ថាប័ននាំមុខមួយក្នុងវិស័យអប់រំឧត្តមសិក្សានៅកម្ពុជា និងជាស្ថាប័នស្រាវជ្រាវនាំមុខខាងជំនាញវិទ្យាសាស្ត្រគ្រប់គ្រង និងសេដ្ឋកិច្ចអនុវត្ត។ UNDP ស្វាគមន៍ភាពជាដៃគូជាមួយនឹងស្ថាប័នដ៏សំខាន់នេះ ដើម្បីជួយឱ្យកម្ពុជាអាចសម្រេចសក្ដានុពលពេលលេញរបស់ខ្លួន»៕
ដោយ៖CEN
