ភ្នំពេញ៖ កញ្ញា An Na Rose បច្ចុប្បន្ននេះ ឃើញថាបានកំពុងក្លាយជាតួអង្គ ដែលបងប្អូនប្រិយមិត្តនៅក្នុងបណ្តាញសង្គមហ្វេសប៊ុក តាមដានយ៉ាងជក់ចិត្តចាប់អារម្មណ៍តែម្តង បន្ទាប់ពីផ្ទុះការរិះគន់យ៉ាងចាស់ៗដៃ ដោយសារតែសម្តីប៉ុន្មានម៉ាត់ដែលនាងបាននិយាយនៅលើបណ្តាញសង្គម Tik Tuk ខឹងទៅនឹងមីងម្នាក់ដែលអត់ស្គាល់ខ្លួនថាជានរណា ក្នុងខ្លឹមសារយ៉ាងដូច្នេះថា «មីងស្គាល់ វិមានឯករាជ្យអត់? ស្គាល់ក្រដាស ១០ ក្រដាស ២០ អត់ បើអត់ស្គាល់ទេ មីងអាចស្វែងរកមើល នៅក្នុងបណ្ដាញសង្គម យូធូប បាន នោះមីងនឹងដឹងថា ខ្ញុំជានរណាគេហើយ»។
ដោយឡែកក្រោយរឿងនេះពុំទាន់រសាយបាត់ពីការហួសចិត្តរបស់មហាជនផង ស្រាប់បែកធ្លាយកញ្ញា Rose បានបោកលុយគេអស់ ៥០០០ ដុល្លារ មិនសង។ តែទោះយ៉ាងណា Rose ក៏បានចេញមកបញ្ជាក់ថា ការចោទប្រកាន់ខាងលើនេះ គឺជារឿងមិនពិតនោះទេ ដោយបានអះអាងថា នេះជាចេតនារបស់បុគ្គលមួយដែលប្រើអាខោនក្លែងក្លាយ ចង់បំផ្លាញកិត្តិយសរបស់នាងប៉ុណ្ណោះ។
ទោះយ៉ាងណាក្តី ទន្ទឹមនឹង Rose បានបដិសេធជាប់វាក់វិននឹងការចោទប្រកាន់បោកលុយគេនេះ ស្រាប់តែអ្នកលក់អនឡាញ Mo Lika បានបញ្ចេញវីដេអូ Rose ខ្ចីលុយជនបរទេសម្នាក់ស្តែងៗ ប៉ុន្តែ ក្រោយមក Rose បាន Block គាត់ ដោយពុំព្រមសងលុយគាត់វិញទេ។
នេះបើយោងតាមគណនីហ្វេសប៊ុក Mo Lika បានបង្ហោះវីដេអូ និងសរសេរបញ្ជាក់ឲ្យដឹងថា៖ «មានជនបរទេសម្នាក់សុំឲ្យខ្ញុំជួយ គាត់បានបញ្ជាក់បូករួមទាំងភស្តុតាងច្បាស់លាស់ថា កញ្ញា Rose បោកប្រាស់គាត់ ។ គាត់បានបញ្ជាក់ថា Rose បានខ្ចីលុយគាត់ មកដល់ពេលនេះ Rose នៅជំពាក់គាត់ 4166$ ទៀតហើយ Rose បាន Block គាត់ដោយមិនព្រមសងលុយគាត់ សូម Rose ជួយចេញមុខតទល់នឹងគាត់ ដើម្បីរក យុត្តិធម៌ទាំងសងខាង» ៕ ដោយ៖ លឹម ហុង