ខេត្តបាត់ដំបង+តាកែវ៖ ដើមកញ្ឆាស្រស់ប្រមាណ៧៨ដើម ត្រូវបានកម្លាំងផ្នែកប្រឆាំងគ្រឿងញៀន សហការជាមួយកម្លាំងប៉ុស្តិ៍នគរបាលរដ្ឋបាល តាប៉ុននៃអធិការដ្ឋាននគរបាលស្រុកសង្កែ ចុះបង្ក្រាបនិងកាប់បំផ្លាញចោល ចំនួន២ទីតាំងផ្សេងគ្នា ក្នុងបទល្មើសជាក់ស្តែង។ ចំណែកកម្លាំងនគរបាល នៃអធិការដ្ឋាននគរបាលស្រុកគិរីវង់ ចុះបង្ក្រាបការដាំដំណាំកញ្ឆាខុសច្បាប់ នៅចំនុចលើភ្នំគុហាចិន ស្ថិតនៅក្នុងភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវ។
អធិការនគរបាលស្រុកសង្កែ លោកវរសេនីយ៍ឯក ស៊ុន សុវណ្ណ បានឲ្យយដឹងថា ប្រតិបត្តិការនេះធ្វើឡើង កាលពីថ្ងៃទី១២ ខែសីហា ឆ្នាំ២០២០កន្លងទៅ នៅចំណុចក្រុមទី១៦ ភូមិសម្តេច ឃុំតាប៉ុន ស្រុកសង្កែ ខេត្តបាត់ដំបង ក្រោយពីទទួលបានសេចក្តីរាយការណ៍ថាមានប្រជាពលរដ្ឋលួចលាក់ដាំកញ្ឆាចំនួន២កន្លែងនៅក្នុងមូលដ្ឋានខាង លើ។
លោកអធិការស្រុកបន្តថា ក្នុងកិច្ចចុះប្រតិបត្តិការនេះដែរ ជាលទ្ធផលក្នុងបទល្មើសជាក់ស្តែង សមត្ថកិច្ចបានកាប់បំផ្លាញដើមកញ្ឆាស្រស់ចំនួន ៧៨ដើម ម្ចាស់ទី១-ឈ្មោះ អឿន រ៉េត ភេទស្រី អាយ៥២ឆ្នាំ ។ ទី២-ឈ្មោះ ចៅ ផុន ភេទស្រី អាយ ៦០ ឆ្នាំ នាក់ទាំង២នាក់រស់នៅភូមិសម្តេច ឃុំតាប៉ុន ស្រុកសង្កែ ខេត្តបាត់បំបង។ នៅចំពោះមុខការសាកសួរ របស់សមត្ថកិច្ច ពួកគាត់បានសារភាពថា ដើម ការដាំកញ្ឆារបស់ពួកគាត់ គឺសម្រាប់ប្រើប្រាស់ធ្វើជាឱសថព្យាបាលជំងឺផ្ទាល់ខ្លួនតែប៉ុណ្ណោះ ។
បើទោះបីការដាំដុះ កញ្ឆាទាំងនេះសម្រាប់ព្យាបាលជំងឺផ្ទាល់ខ្លួនរបស់គាត់ ដោយចុះ ប៉ុន្តែការដាំនេះមានចំនួនច្រើនដើម ទើបសមត្ថកិច្ចពិបាកនឹងជឿដែរ ។ នៅក្រោយពេលធ្វើការសាកសួរអំពីមូលហេតុ នៃការដាំដើមកញ្ឆាមានចំនួនច្រើនដើមខាងលើរួចមក ពលរដ្ឋទាំង២នាក់ ត្រូវបានសមត្ថកិច្ចនគរបាលនាំខ្លួនយកមកធ្វើកិច្ចសន្យាអប់រំណែនាំ ដោយមិនអនុញ្ញាតឱ្យគាត់បន្តការដាំដុះបែបនេះបន្តទៀតទេ។
ចំណែកនៅព្រឹកថ្ងៃទី១៣ ខែសីហា ឆ្នាំ២០២០ ដោយអនុវត្តតាមបទបញ្ជា និងការចង្អុលបង្ហាញពីសំណាក់ លោក ឧត្តមសេនីយ៍ទោ សុខ សំណាង ស្នងការ នៃស្នងការដ្ឋាននគរបាលខេត្តតាកែវ លោក វរសេនីយ៍ឯក ឈៀង សុន ស្នងការរង ទទួលផែនការងារប្រឆាំងបទល្មើសគ្រឿងញៀន លោក វរសេនីយ៍ឯក មាស ទេន ស្នងការរងទទួលផែនការងារសន្តិសុខ និងលោក វរសេនីយ៍ឯក ព្រហ្ម វាសនា ស្នងការរង ទទួលការងារកិច្ចការប៉ុស្តិ៍នគរបាលរដ្ឋបាល បានដឹកនាំកម្លាំងនគរបាលខេត្ត សហការជាមួយកម្លាំងនគរបាល នៃអធិការដ្ឋាននគរបាលស្រុកគិរីវង់ ចុះបង្ក្រាបការដាំដំណាំកញ្ឆាខុសច្បាប់ នៅចំនុចលើភ្នំគុហាចិន ស្ថិតនៅក្នុងភូមិជ្រោយ ឃុំព្រះបាទជាន់ជុំ ស្រុកគិរីវង់ ខេត្តតាកែវ។ លទ្ធផលបង្ក្រាបបានរួមមាន៖ កាប់កម្ទេចដុតបំផ្លាញដំណាំកញ្ឆាបានចំនួន ៧ទីតាំង លើផ្ទៃដីដាំដុះសរុប ៤១២ ម៉ែត្រការ៉េ បំផ្លាញអាងស្តុបទឹកចំនួន៧ បច្ចុប្បន្នកម្លាំងជំនាញកំពុងស្រាវជ្រាវស្វែងរកម្ចាស់ទីតាំងខាងលើ ដើម្បីយកមកផ្ដន្ទាទោសតាមផ្លូវច្បាប់៕ ដោយ៖កូឡាប
