បាត់ដំបង៖អាជ្ញាធរខេត្តបាត់ដំបង បានមានប្រសាសន៍ថា ក្រើនរំលឹកនិងជំរុញទៅដល់អាជ្ញាធរស្រុក ក្រុងនិងបណ្តាមន្ទីរវិស័យជំនាញព្រមទាំងបណ្តាមន្ទីរអង្គភាពពាក់ព័ន្ធ និងក្រុមការងារបច្ចេកទេសផ្គត់ផ្គង់ទឹកស្អាត និងអនាម័យជនបទសូមបន្តផ្តល់ការគាំទ្រនូវផែនការយុទ្ធសាស្ត្រ ក្នុងការផ្គត់ផ្គង់ទឹកស្អាតនិងអនាម័យជនបទ នៅតាមបណ្តាស្រុក-ក្រុង ខេត្តបាត់ដំបងដើម្បីធ្វើឲ្យសម្រេចបាន៩០ភាគរយ នៅក្នុងឆ្នាំ២០២៣ និងសម្រេចជោគជ័យ១០០ភាគរយ នៅឆ្នាំ២០២៥ខាងមុខ។
ការលើកឡើងនេះ ក្នុងកិច្ចប្រជុំប្រចាំឆមាសទី១ឆ្នាំ២០២០ របស់ខេត្តបាត់ដំបងកាលពីថ្ងៃទី១៣ ខែសីហា ឆ្នាំ២០២០ នៅ
សាលប្រជុំមន្ទីរពាណិជ្ជកម្មខេត្ត។
ឯកឧត្តម ឆាយ ម៉ាទីណាល់ អភិបាលរងខេត្តបាត់ដំបង បានមានប្រសាសន៍ក្រើនរំលឹកនិងជំរុញទៅដល់អាជ្ញាធរស្រុក ក្រុងនិងបណ្តាមន្ទីរវិស័យជំនាញ ព្រមទាំងបណ្តាមន្ទីរអង្គភាពពាក់ព័ន្ធ ពិសេសអង្គការដៃគូអភិវឌ្ឍទាំងអស់ដែលចូលរួម សូមបន្តផ្តល់ការគាំទ្រនូវផែនការយុទ្ធសាស្ត្រក្នុងការផ្គត់ផ្គង់ទឹកស្អាត និង អនាម័យជនបទ នៅតាមបណ្តាស្រុក-ក្រុង ខេត្តបាត់ដំបងដើម្បីធ្វើឲ្យសម្រេចបាន៩០ភាគរយ នៅក្នុងឆ្នាំ២០២៣ និងសម្រេចជោគជ័យ១០០ភាគរយនៅឆ្នាំ២០២៥ខាងមុខ។ គោលបំណងសំខាន់ៗដើម្បីធ្វើការត្រួតពិនិត្យមើល ពីការអនុវត្តនិងការទទួលខុសត្រូវការងារផ្គត់ផ្គង់ទឹកស្អាត និងអនាម័យជនបទរបស់ខេត្តសម្រាប់ឆមាសទី១ឆ្នាំ២០២០
ដើម្បីធ្វើការចែករំលែកនូវបទពិសោធនូវទស្សនទាន និងពិគ្រោះយោបល់ស្តីពីការងារផ្គត់ផ្គង់ទឹកស្អាត និងអនាម័យជនបទរបស់ខេត្ត សំដៅធ្វើឲ្យសម្រេចបាន នូវ ផែនការជាយុទ្ធសាស្ត្រថ្នាក់ជាតិ ក៏ដូចជារាជរដ្ឋាភិបាលកម្ពុជា ក្នុងការផ្គត់ផ្គង់ទឹកស្អាតនិងអនាម័យជនបទ នៅឆ្នាំ២០២៣ឲ្យបាន៩០ភាគរយ និងនៅឆ្នាំ២០២៥ សម្រេចឲ្យបាន១០០ភាគរយ។
លោក វ៉ាន់ ថុល ប្រធានមន្ទីរអភិវឌ្ឍន៍ជនបទខេត្តបាត់ដំបង បានបញ្ជាក់បង្ហាញពីសមិទ្ធិកម្មនិងលទ្ធផលការងារដែល
សម្រេចបានក្នុងឆមាសទី១ ឆ្នាំ២០២០ កន្លងមកនេះ ខេត្តបាត់ដំបងមានភូមិចំនួន៨០០ភូមិ មានចំនួន១០២ឃុំ-សង្កាត់ មានស្រុកចំនួន១៣ និងក្រុង១។ ភូមិដែលបានសម្រេចបានមានចំនួន១៤៦ភូមិ លើ៨ឃុំនិងឈានដល់៩ឃុំ នៅពេលខាងមុខសម្រាប់អត្រាអនាម័យនៅក្នុងខេត្តទាំងមូល។ មានការប្រែប្រួលនូវអត្រា៧៥ភាគរយ គិតត្រឹមឆមាសទី១ ឆ្នាំ២០២០និងអត្រាប្រើប្រាស់ទឹកបាន ៦៩ភាគរយនៅក្នុងខេត្ត។ តាមរយៈសមិទ្ធិកម្ម និងលទ្ធផលការងាររបស់មន្ទីរអភិវឌ្ឍន៍ជនបទខេត្តបាត់ដំបងខាងលើនេះ លោក វ៉ាន់ ថុល បានសម្តែងនូវការអរគុណចំពោះអង្គការជាតិ និងអន្តរជាតិនិងបណ្តាអង្គការដៃគូអភិវឌ្ឍន៍ទាំងអស់ ដែលតែងបានគាំទ្រនិងបន្តនូវកិច្ចគាំពារនិងកិច្ចសហប្រតិបត្តិការល្អរួមនិងអាជ្ញាធរគ្រប់ថ្នាក់នៅមូលដ្ឋាន ដែលបានជួយជ្រោមជ្រែង និងធ្វើឲ្យមន្ទីរសម្រេចបាននូវផែនការកន្លងមក ដើម្បីឆ្ពោះទៅសម្រេចបាននូវផែនការយុទ្ធសាស្ត្រ របស់រាជរដ្ឋាភិបាលនៅឆ្នាំ២០២៣ខាងមុខ ឲ្យបាន៩០ភាគរយនិងឆ្នាំ២០២៥ សម្រេច១០០ភាគរយតែម្ដង។
ឯកឧត្តម ឆាយ ម៉ាទីណាល់ អភិបាលរងខេត្តបាត់ដំបង បានធ្វើការវាយតម្លៃពីសមិទ្ធិកម្មនិងលទ្ធផលការងារ ដែលសម្រេចបានកន្លងមក ប៉ុន្តែសូមធ្វើការដាស់តឿនដល់អាជ្ញាធរស្រុកក្រុង និងឃុំសង្កាត់ទាំងអស់ ត្រូវគិតគូរពិចារណាឡើងវិញ ក្នុងការប៉ាន់ប្រមាណនូវកញ្ចប់ថវិកាឃុំសង្កាត់របស់ខ្លួន ដើម្បីរៀបចំផែនការប្រើប្រាស់ថវិកាទាំងនោះ ឲ្យបានសមស្របនិងឆ្លើយតបពីតម្រូវការសង្គមក្នុងមូលដ្ឋាន ជាពិសេសជំរុញនូវផែនការយុទ្ធសាស្ត្រថ្នាក់ជាតិ ដោយធ្វើយ៉ាងណាឲ្យសម្រេចបាននូវការប្រើប្រាស់បង្គន់អនាម័យ នៅតាមជនបទនិងការផ្គត់ផ្គង់ទឹកស្អាត និងប្រើប្រាស់ក្នុងមូលដ្ឋានស្រុក-ក្រុង ឃុំ-សង្កាត់ ដើម្បីឆ្លើយតបនិងធ្វើឲ្យសម្រេចបានជោគជ័យ នូវផែនការយុទ្ធសាស្ត្ររបស់រាជរដ្ឋាភិបាល ដែលកំណត់ខាងលើ៕ ដោយ៖អ៊ុងសារុំ
