ភ្នំពេញ៖ ផូស៊ីលត្រី ជាសំណាកត្រីដែលបានកប់ក្នុងដីហើយប្រែក្លាយទៅជាថ្ម។ ផូស៊ីលត្រីនេះត្រូវបានរកឃើញដោយលោក លឹម វណ្ណច័ន្ទ ក្រុមការងារសិក្សាផូស៊ីលនៃនាយកដ្ឋានតំបន់បេតិកភណ្ឌ អគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាននៅឆ្នាំ២០១៩ នៅភ្នំស្វាយ ខេត្តបន្ទាយមានជ័យ។ នេះបើតាមការផ្សាយព័ត៌មានក្នុងផេកហ្វេសប៊ុកលោកសាយ សំអាល់ រដ្ឋមន្ត្រីក្រសួងបរិស្ថាន នៅថ្ងៃទី១៤ខែសីហាឆ្នាំ២០២០នេះ។
លោករដ្ឋមន្ត្រី បានបញ្ជាក់ថា សំណាកត្រីនេះ សល់ផ្នែកខាងក្បាល មានភ្នែក និងព្រុយ នៅពាក់កណ្តាលខ្លួនបែកមួយកំណាត់ផ្នែកកន្ទុយដែលយើងអាចមើលឃើញស្នាមពណ៌ក្រហម មានទំហំប្រមាណ៣សង់ទីម៉ែត្រ និងបណ្តោយ៨សង់ទីម៉ែត្រ និងមានសំណាកផូស៊ីលផ្សេងៗជាច្រើនទៀត ដែលកប់នៅក្នុងថ្មកំបោរមួយដុំ។
ភ្នំស្វាយជាប្រភេទភ្នំថ្មកំបោរ ដែលមានអតីតកាលស្ថិតជាសមុទ្រ ដែលកើតឡើងដោយកំណកនៃសាធាតុកំបោរ តាមរយៈផែនទី Geological map of Cambodia ភ្នំទាំងនេះត្រូវបានកំណត់ក្នុងសម័យកាល Permian(២២៥-២៨០លានឆ្នាំ) ក្នុងស័កទី១ ដែលហៅថា Paleozoic៕ដោយ៖កូឡាប