ខេត្តព្រះសីហនុ៖ ករណីជនសង្ស័យមានគ្នាចំនួន៣នាក់ ចាប់មនុស្សបញ្ចូលក្នុងរថយន្តនៅចំណុចហាង លក់សម្លៀកបំពាក់ កូកូ នាខេត្តព្រះសីហនុ នគរបាលព្រហ្មទណ្ឌកម្រិតស្រាលដឹកនាំកម្លាំងសមត្ថកិច្ចជំនាញចុះស្រាវជ្រាវជាបន្ទាន់ រហូតដល់វេលាម៉ោង ៦ព្រឹកថ្ងៃទី ១៤ ខែសីហា ឆ្នាំ២០២០ ត្រង់ចំណុច ព្រែកត្រែង ស្រុកស្ទឹងហាវ ក្រុមសមត្ថកិច្ចជំនាញបានរំដោះជនរងគ្រោះបានសម្រេច ហើយសមត្ថកិច្ចកំពុងធ្វើការស្រាវជ្រាវ និងតាមចាប់ជនសង្ស័យដែលកំពុងរត់គេចខ្លួន។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានប្រាប់សារព័ត៌មានក្នុងស្រុកនៅរសៀលថ្ងៃទី១៤ ខែសីហា ឆ្នាំ២០២០ថា កាលពីវេលាម៉ោងជាង១០យប់ថ្ងៃទី១៣ ខែសីហា ឆ្នាំ២០២០ មានករណីចាប់មនុស្សបញ្ចូលក្នុងរថយន្តនៅចំណុចហាង លក់សម្លៀកបំពាក់ កូកូ កែងមហោស្រពចាស់ ក្នុងសង្កាត់លេខ២ ខេត្ត-ក្រុងព្រះសីហនុ ។
ជនសង្ស័យមានគ្នាចំនួន៣នាក់ ដែលមានភិនភាគដូចខាងក្រោម៖ 1-មនុស្សប្រុសពាក់អាវយឺតដៃខ្លី ពណ៌ខៀវចាស់ ស្លៀកខោខ្មៅជើងវែង ពាក់មួកខ្មៅ ។ 2-មនុស្សប្រុសពាក់អាវយឺតដៃខ្លីពណ៌ខ្មៅ ស្លៀកខោខ្មៅជើងវែង ពាក់មួកខ្មៅ ។ 3-តៃកុងឡានមិនចុះពីលើឡាន។
រថយន្តធ្វើសកម្មភាពម៉ាក ហាយឡែនឌ័រ (HIGHLANDER) ពណ៌ទឹកមាស មិនចាំផ្លាកលេខ ។ បានធ្វើសកម្មភាពចាប់មនុស្សស្រីម្នាក់ ពាក់រូបពណ៌ខ្មៅ ដាក់ចូលទៅក្នុងរថយន្តរួចធ្វើដំណើរធ្ពោះទៅផ្លូវជាតិលេខ៤ ។
ភ្លាមៗនោះដែរ ក្រោមការចង្អុលបង្ហាញរបស់លោក ឧត្តមសេនីយ៍ទោ ជួន ណារិន្ទ ស្នងការនគរបាលខេត្ត និងបានដាក់បទបញ្ជាឲ្យលោកវរសេនីយ៍ឯក លី សុខហ៊ី នាយការិយល័យនគរបាល ព្រហ្មទណ្ឌកម្រិតស្រាលដឹកនាំកម្លាំងសមត្ថកិច្ចជំនាញចុះស្រាវជ្រាវជាបន្ទាន់ រហូតដល់វេលាម៉ោង ៦ព្រឹកថ្ងៃទី ១៤ ខែសីហា ឆ្នាំ២០២០ ត្រង់ចំណុច ព្រែកត្រែង ស្រុកស្ទឹងហាវ ក្រុមសមត្ថកិច្ចជំនាញបានរំដោះជនរងគ្រោះបានសម្រេច ។ ដោយឡែកជនសង្ស័យកំពុងរត់គេចខ្លួន ហើយសមត្ថកិច្ចកំពុងធ្វើការស្រាវជ្រាវ និងតាមចាប់ជនសង្ស័យ ៕ដោយ៖បញ្ញាស័ក្តិ
