ភ្នំពេញ៖បើតាមសេចក្តីណែនាំក្រើនរំលឹករបស់ក្រសួងសុខាភិបាល ការការពារការចម្លងវីរុសកូរីដ-១៩ក្នុងអំឡុងពេលឈប់សម្រាកពីថ្ងៃទី១៧ ដល់ទី២១ ខែ សីហា ឆ្នាំ២០២០ ដើម្បីសងថ្ងៃឈប់សម្រាកសម្រាប់ពិធីបុណ្យចូលឆ្នាំប្រពៃណីជាតិខ្មែរ។
ក្រសួងសុខាភិបាល សូមគោរពជម្រាបជូនសាធារណជនទាំងអស់ឲ្យបានជ្រាបថា យោងតាមអនុក្រឹត្យលេខ ១០១ អនក្រ.បក ចុះថ្ងៃទី១៥ ខែកក្កដា ឆ្នាំ២០២០ ស្តីពីការអនុញ្ញាតឱ្យមន្ត្រីរាជការ និយោជិត កម្មករ ឈប់ សម្រាកការងារនៅថ្ងៃទី១៧ ទី១៨ ទី១៩ ទី២០ និងទី២១ ខែសីហា ឆ្នាំ២០២០ ដែលជាការសម្រេចដ៏ខ្ពង់ខ្ពស់ របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អនុញ្ញាតឲ្យមានការឈប់សម្រាក ដើម្បីសងថ្ងៃឈប់សម្រាកពីការងាររបស់មន្ត្រីរាជការ និយោជិត កម្មករ ក្នុងពិធី បុណ្យចូលឆ្នាំថ្មីប្រពៃណ៌ជាតិ ឆ្នាំជូត ទោស័ក ដែលត្រូវបានលើកការឈប់សម្រាកការងាររបស់មន្ត្រីរាជការ និយោជិត កម្មករ នៅថ្ងៃទី១៣ ទី១៤ ទី១៥ និងទី១៦ ខែមេសា ឆ្នាំ២០២០ កន្លងទៅ ដោយសារបញ្ហាកូវីដ-១៩។
ការឈប់សម្រាកក្នុងរយៈពេលយូរ នាសប្តាហ៍ខាងមុខនេះ បងប្អូនប្រជាពលរដ្ឋ នឹងអាចមានការធ្វើដំណើរ ទៅជួបជុំក្រុមគ្រួសារនៅស្រុកកំណើត ឬក៏អាចមានការដើរលេងកំសាន្តផងដែរ។ ក្នុងករណីនេះ ក្រសួងសុខាភិបាលបានធ្វើការណែនាំតាមរយៈការចេញនូវសេចក្តីជូនព័ត៌មានជារឿយៗ ក៏ដូចជាតាមរយៈការធ្វើបទសម្ភាសន៍ ជាច្រើនលើកតាមទូរទស្សន៍នានា នាពេលកន្លងមករួចមកហើយ ក៏ប៉ុន្តែ ក្រសួងបានសង្កេតឃើញថា បងប្អូន យើងភាគច្រើន ហាក់ដូចជាបានភ្លេច និងមិនបានអនុវត្តការការពារខ្លួនបានត្រឹមត្រូវទៅតាមការណែនាំរបស់ ក្រសួងសុខាភិបាលឡើយ។ ដូច្នេះ ក្រសួង សូមធ្វើការណែនាំក្រើនរំលឹកសារជាថ្មីម្តងទៀត សូមបងប្អូនប្រជា ពលរដ្ឋទាំងអស់ បន្តអនុវត្តការការពារការចម្លងវីរុសកូវីដ-១៩ ឱ្យបានខ្ជាប់ខ្លួន ហើយក្រសួងសុខាភិបាល សូម បញ្ជាក់ជូនថា បើទោះបីជាប្រទេសកម្ពុជា មិនទាន់មានការចម្លងជំងឺកូវីដ-១៩ នៅក្នុងសហគមន៍ក៏ដោយ ក៏វីរុស កូវីដ -១៩ នេះ នៅតែកំពុងបន្តរាតត្បាតយ៉ាងខ្លាំងនៅលើពិភពលោក និងនៅក្នុងតំបន់ ហើយការរកឃើញវិជ្ជមាន វីរុសកូវីដ-១៩ លើអ្នកដំណើរជាបន្តបន្ទាប់កន្លងមកនេះ បានមកពញ្ញាក់ស្មារតីបុគ្គលគ្រប់រូប កុំឲ្យភ្លេចខ្លួន ដោយ បានបង្ហាញច្បាស់ណាស់ថា ការចម្លងវីរុសកូវីដ-១៩ នៅតែមាននៅឡើយ និងនៅតែជាហានិភ័យសម្រាប់មនុស្ស គ្រប់រូប ទោះជាក្នុងរូបភាពនាំចូលមកក្នុងប្រទេសក៏ដោយ ក៏យើងមិនត្រូវមានការធ្វេសប្រហែស ដោយត្រូវការពារ ខ្លួនតាមការណែនាំឱ្យបានត្រឹមត្រូវ ហើយមិនត្រូវមើលរំលងនូវលទ្ធភាពនៃការចម្លងរហ័សនៃវីរុសដ៏កាចសាហាវ នេះ ដែលនឹងអាចកើតមានគ្រប់ពេលវេលា គ្រប់កាលៈទេសៈ និងគ្រប់ទីកន្លែងទាំងអស់។
ក្រសួងសុខាភិបាលសូមថ្លែងអំណរគុណយ៉ាងជ្រាលជ្រៅជាទីបំផុត ចំពោះការយកចិត្តទុកដាក់ចូលរួមទប់ស្កាត់ ការចម្លងវីរុសកូវីដ -១៩របស់បងប្អូនប្រជាពលរដ្ឋទាំងអស់ ហើយក្រសួង ក៏សូមអំពាវនាវដល់សារធារណជនទាំងអស់ សូមចូលរួមអនុវត្តតាមការណែនាំខាងលើនេះឲ្យមានប្រសិទ្ធភាពខ្ពស់ ដើម្បីចូលរួមចំណែកកាត់ផ្តាច់ការចម្លង វីរុសកូវីដ -១៩ ពីបុគ្គលម្នាក់ទៅបុគ្គលម្នាក់ និងកុំឲ្យមានការចម្លងទៅសហគមន៍។ ប្រសិនបើបងប្អូនប្រជាពលរដ្ឋ មានបញ្ហាសុខភាព ឬមានជំងឺ ឬសង្ស័យថាមានការឆ្លងជំងឺ សូមប្រញាប់ ទៅស្វែងរកការពិនិត្យព្យាបាលនៅតាមមន្ទីរពេទ្យរដ្ឋ ឬទំនាក់ទំនងតាមលេខផ្តល់ជូនខាងក្រោមនេះ។ ក្រសួងសុខាភិបាល បន្តជូនដំណឹងដល់សាធារណជនអំពីការវិវត្តន៍នៃបញ្ហាសុខភាព តាមទំព័រ ហ្វេសប៊ុក និងគេហទំព័ររបស់ក្រសួង www.cdcmoh.gov.kh ដែលគេហទំព័រនេះមានសម្ភារៈអប់រំសុខភាពដែលអាច ទាញយកមកប្រើប្រាស់បាន។ សម្រាប់ព័ត៌មានបន្ថែម មានបញ្ហាសុខភាព សូមទាក់ទងមកទូរស័ព្ទទាន់ហេតុការណ៍ ក្រសួងសុខាភិបាល លេខ ១១៥ ដោយឥតគិតថ្លៃ ឬទំនាក់ទំនងក្រសួងសុខាភិបាល តាមលេខទូរស័ព្ទ៖ ០១២ ៨២៥ ៤៤ ឬ ០១២ ៤៨៨ ៩៨១ ឬ ០១២ ៨៣៦ ៨៦៨ ។
ក្រសួងសុខាភិបាល សូមជូនពរដល់បងប្អូនសារធារណជនទាំងអស់ ទទួលបាននូវសុខភាពល្អ ជៀសផុត ពីការចម្លងវីរុសកូវីដ-១៩ សម្រាប់បុគ្គលផ្ទាល់ សម្រាប់ក្រុមគ្រួសារ និងសម្រាប់សហគមន៍ មិនមានការចម្លងវីរុសកូវីដ-១៩ នៅក្នុងព្រះរាជាណាចក្រកម្ពុជា៕ ដោយ៖កូឡាប