ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា បើទោះបីពិភពលោកនៅបន្តស្ថិតនៅក្នុងស្ថានភាពមិនច្បាស់លាស់នៅឡើយពីថ្នាំព្យាបាលជំងឺកូវីដ-១៩ កម្ពុជាត្រូវតែមានភាពច្បាស់លាស់និងម្ចាស់ការលើការងារជាអាទិភាចម្បងពីរគឺ៖ ទី១ការបន្តរក្សានូវស្ថិរភាពនយោបាយដែលជាមូលដ្ឋានគ្រឹះសម្រាប់ការគ្រប់គ្រងស្ថានការណ៍ និង ការរក្សាស្ថិរភាពម៉ាក្រូសេដ្ឋកិច្ចឱ្យបានល្អប្រសើរ ទប់ស្កាត់អតិផរណានិងការឡើងថ្លៃទំនិញក្នុងទីផ្សារ។ នេះបើតាមសេចក្តីប្រកាសព័ត៌មាន ស្តីពីលទ្ធផលកិច្ចប្រជុំពេញអង្គគណៈរដ្ឋមន្ត្រី ថ្ងៃទី១៤ ខែសីហា ឆ្នាំ២០២០។
សម្តេចតេជោ ហ៊ុន សែន បានជម្រុញឲ្យក្រសួងស្ថាប័ននិងរដ្ឋបាលថ្នាក់ក្រោមជាតិពាក់ព័ន្ធ ត្រូវអនុវត្តទិសដៅភារកិច្ចចំនួន៥ គឺ៖
– ភារកិច្ចទី១ បន្តប្រយុទ្ធប្រឆាំងជំងឺកូវីដ-១៩ កុំឱ្យឆ្លងរីករាលដាលក្នុងសហគមន៍ ហើយត្រូវបន្តអនុវត្តនិងចាត់វិធានការសុខាភិបាលឱ្យបានដិតដល់ នៅកន្លែងដែលមានភ្ញៀវទេសចរទៅកម្សាន្ត ពិសេសក្នុងកំឡុងពេលឈប់សម្រាកខាងមុខនេះ ដើម្បីថែរក្សាសុខុមាលភាពបស់ប្រជាពលរដ្ឋ។ ក្រសួងសុខាភិបាល ត្រូវខិតខំស្ថាបនាមន្ទីរពិសោធន៍សម្រាប់ធ្វើតេស្តមើលមេរោគកូវីដ-១៩ បន្ថែមពីលើមន្ទីរពិសោធន៍នៅរាជធានីភ្នំពេញ នៅខេត្តសំខាន់ចំនួន៣ទៀតគឺ ខេត្តព្រះសីហនុ ខេត្តសៀមរាប និងខេត្តបាត់ដំបង។
– ភារកិច្ចទី២ បន្តរក្សាសន្តិសុខ សណ្ដាប់ធ្នាប់សាធារណៈ និងធានាសុវត្ថិភាពចរាចរណ៍ ដើម្បីការពារភាពសុខសាន្តនិងអាយុជីវិតរបស់ប្រជាពលរដ្ឋ។
– ភារកិច្ចទី៣ បន្តអនុវត្តកម្មវិធីឧបត្ថម្ភសាច់ប្រាក់ជូនប្រជាពលរដ្ឋដែលមានជីវភាពក្រីក្រនិងងាយរងគ្រោះដោយសារផលប៉ះពាល់នៃជំងឺកូវីដ-១៩ ចំនួនពីរខែទៀត។
– ភារកិច្ចទី៤ ជំរុញនិងលើកទឹកចិត្តការបង្កបង្កើនផលក្នុងវិស័យកសិកម្ម ដោយប្រមូលផ្ដុំឡើងវិញនូវកម្លាំងពលកម្មពីវិស័យសេវាកម្មនិងឧស្សាហកម្ម ដែលបាននិងកំពុងរងផលប៉ះពាល់ពីវិបត្តិនៃជំងឺកូវីដ-១៩ ដើម្បីគាំទ្រដល់ផលិតកម្មកសិកម្មសម្រាប់ផ្គត់ផ្គង់តម្រូវការក្នុងស្រុកនិងការនាំចេញទៅទីផ្សារក្រៅប្រទេស ព្រមទាំងលើកទឹកចិត្តដល់ប្រជាកសិករទូទាំងប្រទេស ឱ្យធ្វើការចិញ្ចឹមត្រីអណ្ដែង ឱ្យបានច្រើន ដើម្បីផ្គត់ផ្គង់តម្រូវការទីផ្សារក្នុងស្រុកនិងគាំទ្រដល់ការនាំចេញទៅលក់នៅក្រៅប្រទេស។
– ភារកិច្ចទី៥ អនុញ្ញាតឱ្យបើកដំណើរការឡើងវិញនូវគ្រឹះស្ថានសិក្សាចំណេះទូទៅ និងសាលាបណ្ដុះបណ្ដាលវិជ្ជាជីវៈ ដោយត្រូវបែងចែកទៅតាមដំណាក់កាល និងត្រូវគោរពឱ្យបានខ្ជាប់ខ្ជួននូវវិធានសុខាភិបាល។ ចំពោះគ្រឹះស្ថានសិក្សាចំណេះទូទៅនិងសាលាបណ្ដុះបណ្ដាលវិជ្ជាជីវៈ ដែលនឹងត្រូវអនុញ្ញាតឱ្យបើកដំណើរការឡើងវិញ ត្រូវមានការបាញ់ថ្នាំសម្លាប់មេរោគឱ្យបានត្រឹមត្រូវតាមលក្ខណៈបច្ចេកទេស ជាពិសេសអគារសិក្សាដែលធ្លាប់បានប្រើប្រាស់ធ្វើជាមណ្ឌលចត្តាឡីស័ក៕ ដោយ៖កូឡាប