ខេត្តបន្ទាយមានជ័យ ថ្ងៃទី១៥ ខែសីហា ឆ្នាំ២០២០ អគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀនសហការជាមួយគណ:កម្មាធិកាត្រួតពិនិត្យគ្រឿងញៀននៃខេត្តចំនួន៤ មាន: ខេត្តបន្ទាយមានជ័យ ឧត្តរមានជ័យ សៀមរាបនិងខេត្តកំពង់ធំ បានប្រារព្ធទិវាអន្តរជាតិប្រយុទ្ធប្រឆាំងគ្រឿងគ្រឿងញៀនក្រោមប្រធានបទ “ការយល់ដឹងច្បាស់ នាំឱ្យការថែទាំមានប្រសិទ្ធភាព “និងពិធីដុតបំផ្លាញគ្រឿងញៀនដែលកម្លាំងអនុវត្តច្បាប់នៃខេត្តទាំង៤បង្ក្រាបបាន ជិត១០០គីឡូក្រាម។
ពិធីនេះប្រព្រឹត្តទៅ ក្រោមអធិបតីភាពឯកឧត្ដម កើត រិទ្ធ រដ្ឋមន្ត្រីក្រសួងយុត្តិធម៌ និងជាអនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងមានវត្តមានចូលរួមដោយឯកឧត្តម ឧត្តមសេនីយ៍ឯក ឡាយ គឹមលី នាយកខុទ្ទកាល័យ ឯកឧត្តម ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាអគ្គលេខាធិការរង អាជ្ញាធរជាតិប្រយុទ្ធប្រឆាំងគ្រឿងញៀន ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ឯកឧត្តមអភិបាលរងនិងជាប្រធានលេខាធិការដ្ឋានគណ:គណកម្មាធិការត្រួតពិនិត្យគ្រឿងគ្រឿងញៀនខេត្តទាំង៤ និងមានការអញ្ជើញចូលរួមផងដែរពីសំណាក់មន្ត្រីរាជការ កងកម្លាំងប្រដាប់អាវុធគ្រប់ប្រភេទ សិស្សានុសិស្ស ប្រជាពលរដ្ឋ និងប្អូនៗដែលទទួលរងឥទ្ធិពលគ្រឿងញៀនសរុបចំនួន ជិត៥០០នាក់។
លោក អ៊ុំ រាត្រី អភិបាលខេត្តបន្ទាយមានជ័យ បានរាយការណ៍ថា ទិវាអន្តរជាតិប្រយុទ្ធប្រឆាំងគ្រឿងញៀន ដែលដុតកម្ទេចចោលនៅថ្ងៃនេះមានទម្ងន់ ៩៣គីឡូក្រាម ត្រូវបានប្រមូលពី៤ខេត្តរួមមាន៖ ១៖ ខេត្តបន្ទាយមានជ័យ មានគ្រឿងញៀនទំងន់២៣គីឡូក្រាម។ ២៖ ខេត្តឧត្តរមានជ័យ មានគ្រឿងញៀនទំងន់៩គីឡូក្រាម។ ៣៖ ខេត្តសៀមរាបមានគ្រឿងញៀនទំងន់ ៥៨គីឡូក្រាម និង៤៖ ខេត្តកំពង់ធំ មានគ្រឿងញៀនទំងន់៦ក្រាម សរុបគ្រឿងញៀន ដែលពិនិត្យផ្ទៀងផ្ទាត់មានសរុបទំងន់ ៩៣គីឡូក្រាម។
ក្នុងឱកាសនេះឯកឧត្ដម កើត រិទ្ធ បានកោតសសើរចំពោះថ្នាក់ដឹកនាំខេត្ត ប្រធានសាលាដំបូង ព្រះរាជអាជ្ញា មន្ត្រីតុលាការ មន្ត្រីនគរបាលយុតិ្តធម៌ របស់ខេត្តទាំង៤ ក៏ដូចជាស្ថាប័នអនុវត្តច្បាប់ និងតួអង្គពាក់ព័ន្ធទាំងអស់ ដែលបានខិតខំសហការ ពុះពារយ៉ាងសកម្មក្នុងការបង្ការទប់ស្កាត់ និងបង្ក្រាបបទល្មើសគ្រឿងញៀន នៅតាមមូលដ្ឋានរបស់ខ្លួន ឲ្យទទួលបានជោគជ័យជាបន្តបន្ទាប់ នាពេលកន្លងមក។
លោករដ្ឋមន្ត្រី ក៏បានក្រើនរំលឹកដល់មន្ត្រីអនុវត្តច្បាប់ និងអ្នកពាក់ព័ន្ធទាំងអស់ ឲ្យប្រកាន់ខ្ជាប់នូវភាពម៉ឺងម៉ាត់ និងប្រកបដោយស្មារតីទទួលខុសត្រូវខ្ពស់ ក្នុងការបន្តអនុវត្តយុទ្ធនាការប្រយុទ្ធប្រឆាំងគ្រឿងញៀន ឲ្យកាន់តែមានប្រសិទ្ធភាពថែមទៀត ដើម្បីភាពសុខដុមរមនារបស់ប្រជាពលរដ្ឋ និងដើម្បីជាឧត្តមប្រយោជន៍ ដល់សង្គមជាតិយើងទាំងមូល។
លោករដ្ឋមន្ត្រី បានរំលឹកជូនអង្គពិធីនូវខ្លឹមសារ នៃសារលិខិតមួយច្បាប់របស់ សម្តេចតេជោនាយករដ្ឋមន្ត្រី ផ្ញើជូនជនរួមជាតិ នៅក្នុងឱកាស នៃការប្រារព្ធទិវាអន្តរជាតិប្រយុទ្ធ ប្រឆាំងគ្រឿងញៀន ថ្ងៃទី២៦ ខែមិថុនា ឆ្នាំ២០២០ នៅកម្ពុជា ដែលក្នុងនោះ សម្តេចតេជោនាយករដ្ឋមន្ត្រី បានគូសបញ្ជាក់ថា «អ្នកញៀនគ្រឿងញៀនដែលជាជនរងគ្រោះពិតប្រាកដ ត្រូវបានយកចិត្តទុកដាក់ ដោះស្រាយ និងជួយសង្គ្រោះឲ្យបានសមស្រប ប៉ុន្តែឧក្រិដ្ឋជន និងជនលើ្មសពាក់ព័ន្ធ នឹងការផលិត ការកែច្នៃ ការរក្សាទុក ការជួញដូរ និងការចរាចរគ្រឿងញៀនខុសច្បាប់ គឺត្រូវតែបានផ្តទ្ទាទោសយ៉ាងតឹងរឹងទៅតាមនីតិវិធីនៃច្បាប់»។
គិតត្រឹមរយៈពេល៨ខែ ដើមឆ្នាំ២០២០នេះ មានបទល្មើសគ្រឿងញៀន សរុបចំនួន៣២២០៥ ករណីត្រូវបានបង្ក្រាប ក្នុងនោះ ជនសង្ស័យចំនួនជាង៦ម៉ឺន៧ពាន់នាក់ ត្រូវបានឃាត់ខ្លួន និងគ្រឿងញៀនគ្រប់ប្រភេទសរុបជាង ២៣០០ គីឡូក្រាម ត្រូវបានដកហូត៕
ដោយ៖កូឡាប