ស្វាយរៀង៖កូនប្រជាពលរដ្ឋនៅក្នុងឃុំគគីរ ស្រុករមាសហែក ខេត្តស្វាយរៀង ចំនួន៣នាក់ ដែលបានកើតមក មិនប្រក្រតី ដូចជា ម៉ាត់វៀច ក្បាលធំ និងកើតរមាស់លើស្បែក តាំងពីពេលពួកគេកើតមកម្ល៉េះ ។ ការកើតមករបៀបនេះ ដោយសារតែឥទ្ធិពលដ៏សាហាវ នៃគ្រាប់បែកគីមីរបស់សហរដ្ឋអាមេរិក ដែលបានបន្សល់ទុកក្រោយពីទម្លាក់ពីយន្តហោះចម្បាំងរបស់សហរដ្ឋអាមេរិកកាលសម័យសង្គ្រាមពីឆ្នាំ១៩៦៣ដល់១៩៧៥ ដែលកើតមាននៅក្នុងឃុំគគីរ ស្រុករមាសហែក ខេត្តស្វាយរៀង។
នៅថ្ងៃទី១២ ខែតុលា ឆ្នាំ២០១៧ ដោយអនុវត្តតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាលើផលប៉ះពាល់សុខភាពបណ្តាលមកពីគ្រាប់បែកគីមីរបស់សហរដ្ឋអាមេរិកដែលបានបន្សល់ទុកពីសម័យសង្គ្រាម លោកវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាល បានដឹកនាំក្រុមគ្រូពេទ្យ ចុះពិនិត្យសុខភាពប្រជាពលរដ្ឋនៅទីតាំងដែលបានរកឃើញគ្រាប់បែកនោះក្នុងខេត្តស្វាយរៀង ហើយបានចេញសេចក្តីណែនាំជូនដល់ប្រជាជនទូទៅផងដែរ។
លោក ម៉ម ប៊ុនហេង រដ្ឋមន្ដ្រីក្រសួងសុខាភិបាល បានថ្លែងថា ការប្រទះឃើញបែបនេះ ក្រោយពីមន្ត្រីជំនាញថ្នាក់ជាតិ និងថ្នាក់ខេត្ត បានសហការគ្នាចុះអង្កេតស្រាវជ្រាវដល់ឃុំគគីរ ស្រុករមាសហែក ខេត្តស្វាយរៀង ដែលជាទីកន្លែងដែលមានវត្តមានគ្រាប់បែកគីមីរបស់អាមេរិក កាលពីសម័យសង្គ្រាមបន្សល់ទុកយ៉ាងរាយប៉ាយ។ ក្រុមការងារបានពិនិត្យសុខភាពរបស់ប្រជាពលរដ្ឋ ហើយយើងបានរកឃើញក្មេងតូចៗ៣នាក់ កើតមកមានភាពមិនប្រក្រតី។ ក្នុងនោះមានក្បាលធំ មាត់វៀច ហើយមានម្នាក់ទៀតរមាស់ស្បែកមិនឈប់នោះឡើយ។ ដោយក្មេងខ្លះដល់អាយុ១៤ឆ្នាំ តាមការពិនិត្យ ភាពមិនប្រក្រតីរបស់ក្មេងទាំងនេះ ដោយសារឥទ្ធិពលគ្រាប់បែកគីមីរបស់អាមេរិកនេះតែម្តងហើយ អាចមានកូនចៅប្រជាពលរដ្ឋនៅក្នុងឃុំគគីរជាច្រើន ជួបភាពមិនប្រក្រតីដោយសារតែឥទ្ធិពលគ្រាប់បែកគីមីនេះ ហើយក្រុមការងាររបស់លោកនឹងបន្តពិនិត្យ សុខភាពរបស់ប្រជាពលរដ្ឋ និងរកឃើញដែលរងផលប៉ះពាល់បន្តទៅទៀត។
លោក ម៉ម ប៊ុនហេង បានថ្លែងថា សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានសម្រេចឲ្យសាងសង់មណ្ឌលសុខភាពថ្មីមួយ នៅក្នុងមូលដ្ឋានឃុំគគីរ ស្រុករមាសហែក ខេត្តស្វាយរៀង ទីដែលគ្រាប់បែកគីមីដ៏សាហាវរបស់អាមេរិកបន្សល់ទុក ហើយបង្កបញ្ហាសុខភាពយ៉ាងធ្ងន់ធ្ងរដល់ប្រជាពលរដ្ឋរាប់រយគ្រួសារ ដើម្បីតបតាមសំណើររបស់ប្រជាពលរដ្ឋមូលដ្ឋាន ហើយក៏ដើម្បីសម្រួលឲ្យ ពលរដ្ឋងាយស្រួលទៅពិនិត្យភាពផងដែរ ព្រោះខ្លាចក្រែងសារធាតុគីមីដ៏សាហាវចេញពីគ្រាប់បែកដែលបន្សល់ទុកនោះ កាន់តែប៉ះពាល់ដល់សុខភាពធ្ងន់ធ្ងរ។
គ្រាប់បែកគីមីរបស់អាមេរិក ដែលទម្លាក់នៅក្នុងចន្លោះទសវត្សរ៍ឆ្នាំ៦០ និង៧០ បានបន្សល់ទុកយ៉ាងរាយប៉ាយនៅក្នុងឃុំគគីរ មកដល់ពេលនេះមន្ត្រីជំនាញអាវុធគីមី និង CMAC បានរកឃើញចំនួន ១៥ទីតាំងហើយ។ មន្ត្រីជំនាញអះអាងថា គ្រាប់បែកគីមីនេះ មិនឥទ្ធិពល ពិសពុលខ្លាំងណាស់សម្រាប់សុខភាពរបស់មនុស្ស ហើយក៏អាចទារកក្នុងផ្ទៃមានការលូតលាស់មិនប្រក្រតី រហូតជួបភាពពិការសរីរាង្គណាមួយថែមទៀតផង។
លោករដ្ឋមន្ត្រីក្រសួងសុខាភិបាល បានបង្ហាញពីលទ្ធផលនៃការពិនិត្យស្រាវជ្រាវផលប៉ះពាល់សុខភាពប្រជាជននៅខេត្តស្វាយរៀង ៖ បន្ទាប់ពីរកឃើញនូវកុមារបីរូប នៅក្នុងឃុំគគីរ ស្រុករមាសហែក ខេត្តស្វាយរៀង កើតមកមិនប្រក្រតីគួរឲ្យអាណិតអាសូរ ដោយសារឥទ្ធិពលដ៏សាហាវនៃគ្រាប់បែកគីមីរបស់សហរដ្ឋអាមេរិក ដែលបានបន្សល់ទុកពីសម័យសង្គ្រាមនោះ ក្រសួងសុខាភិបាលកម្ពុជា បានធ្វើការណែនាំចំនួន៣ចំណុច ដើម្បីឱ្យប្រជាពលរដ្ឋប្រុងប្រយ័ត្ន អំពីឥទ្ធិពលនៃគ្រាប់បែកនេះ។
លោកក៏ការណែនាំដល់ប្រជាពលរដ្ឋចំនួន៣ចំណុច ដូចជា៖ ១៖ ត្រូវនៅឱ្យឆ្ងាយពីគ្រាប់បែកគីមីតាមការណែនាំរបស់មន្ត្រី។
២៖ ត្រូវណែនាំកូនចៅមិនត្រូវរើសយកមកលេងនូវគ្រាប់បែកគីមីឡើយ និង៣៖ បើមានរោកសញ្ញាខុសប្រក្រតី ឬមានកុមារកើតមកមានរូបរាងខុសប្រក្រតី សូមទៅកាន់មណ្ឌលសុខភាព ឬមន្ទីរពេទ្យដើម្បីត្រួតពិនិត្យសុខភាពជាបន្ទាន់។ ក្រសួងសុខាភិបាល នឹងបន្តជូនដំណឹងដល់សាធារណជន អំពីការរកឃើញនិងការវិវត្តន៍នៃជំងឺនេះ។
បើតាមលោកហេង រតនា អគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា(ស៊ីម៉ាក់) បានថ្លែងថា ការស្រាវជ្រាវរុករកឃើញគ្រាប់បែកអាវុធគីមីចំនួន១៥ទីតាំងថី្ម បន្ទាប់ពីទីតាំងទី១ត្រូវបានបញ្ចប់ ដោយរកឃើញមួយគ្រាប់។ គិតមកដល់ថ្ងៃទី១១ខែតុលាឆ្នាំ២០១៧ នេះកម្លាំងស្រាវជ្រាវស៊ីម៉ាក់ បានបញ្ចប់ការស្រាវជ្រាវនិងកំណត់ទីតាំងគ្រាប់បែកអាវុធគីមីនៅឃុំគគីរទាំង៥ភូមិរួចរាល់ហើយ ដោយរកឃើញ១៤ទីតាំងថ្មី (មិនគិតបញ្ចូលទីតាំងវត្តគគីរដែលបានបោសសំអាតនោះទេ) ។ ទន្ទឹងនឹងនេះនៅថ្ងៃទី១១នេះ កម្លាំងស្រាវជ្រាវបានចូលទៅឃុំអំពិល ស្ថិតនៅជាប់ឃុំគគីរនោះដែរ បានរកឃើញមួយទីតាំងទៀត។ ដូចនេះមានចំនួន១៥ទីតាំងថី្ម។ លោកបានបន្ថែមថា “ខ្ញុំសូមអំពាវនាវដល់ប្រជាពលរដ្ឋទាំងអស់ ទាំងក្នុងមូលដ្ឋាន កំពុងប្រតិបតិ្តការ និងនៅកន្លែងដទៃទៀត មេត្តារាយការណ៍មកកម្លាំងអាជ្ញាធរមូលដ្ឋាន ដើម្បីយើងសហការគ្នាមានវិធានការ ចុះអង្កេតនិងកំណត់លក្ខណៈបច្ចេកទេស”៕ ដោយ៖ជាលី
