កំពង់ធំ ៖ ក្រោយពីផ្ទុះរឿងអាស្រូវករណីនគរបាលជានារីៗជាច្រើនរូប នៃស្នងការនគរបាលខេត្តកំពង់ធំ បានដាក់ពាក្យបណ្តឹងទៅកាន់សម្តេចក្រឡាហោម ពីបទបៀតបៀនកេរ្តិ៍ភេទដ៏ធ្ងន់ធ្ងរ អតីតស្នងការនគរបាលខេត្តកំពង់ធំ លោក អ៊ុក កុសល ក៏ត្រូវបានសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ សម្រេចផ្អាកការងារបណ្តោះអាសន្ន ដោយរង់ចាំការសម្រេចជាថ្មី ហើយធ្វើការផ្ទេរភារកិច្ចអោយលោក ឧត្តមសេនីយ៍ត្រី អ៊ិត គឹមស្រ៊ន ស្នងការរងជាស្នងការស្ដីទី នៃស្នងការដ្ឋាននគរបាលខេត្តកំពង់ធំ មកកាន់ការងារជំនួសវិញ។
យ៉ាងណាមិញ នៅថ្ងៃនេះ ស្រាប់តែទទួលបានដំណឹងថា លោក អ៊ុក កុសល អតីតស្នងការខេត្តកំពង់ធំ បានសម្រេចចិត្តទៅសាងផ្នួសហើយ ដែលធ្វើឲ្យមហាជននាំគ្នាភ្ញាក់ផ្អើលព្រើតតែម្តង។ នេះបើយោងតាមការបង្ហោះនៅលើបណ្តាញសង្គមនៅថ្ងៃទី១៥ ខែសីហា ឆ្នាំ២០២០។
ក្រោយពីបានឃើញទិដ្ឋភាពដ៏ស្មានមិនដល់នេះ អ្នកលេងបណ្តាញសង្គមបានខមិនលើកឡើងផ្សេងៗថា៖ «ធ្វើចឹងបានទៀត ទោះបីមនុស្សបុកគល់នេះបួសមួយជីវិតក៏នៅតែឈ្មោះអាសោធ, សូមឲ្យមន្ត្រីដែលយកដីរាស្ត្រលាបួសឲ្យអស់ទៅកុំនៅឲ្យសង្គមស្អប់ខ្ពើម, លាងមិនជ្រះទេបើមិនលាងចិត្តនិងព្រមទទួលកំហុសនោះ, គ្រាន់តែបួសលាងបាប រួចខ្លួន…. ចប់ និងព្រមទាំងមានពាក្យពេចន៍ខំមិនចម្អកជាច្រើនទៀតរាប់មិនអស់» ៕ ដោយ៖ លឹម ហុង
