ស្វាយរៀង៖ លោកស្រីឧបនាយករដ្ឋមន្ត្រីម៉ែនសំអនរដ្ឋមន្ត្រីក្រសួងទំនាក់ទំនងជាមួយរដ្ឋសភានិងព្រឹទ្ធសភានិងអធិការកិច្ចនៅក្នុងពិធីសម្ភោធដាក់អោយប្រើប្រាស់ឧបដ្ឋានសាលា(សាលាបុណ្យ) ស្ថិតនៅមរណីដ្ឋានទេសចរណ៍ប្រាសាទព្រៃបាសាក់ ភូមិបាសាក់ ឃុំបាសាក់ ស្រុកស្វាយជ្រំ នៅព្រឹកថ្ងៃទី៣ ខែកុម្ភៈ ឆ្នាំ២០១៨នះ បានធ្វើការអំពាវនាវដល់ប្រជាពលរដ្ឋត្រូវចូលរួមថែរក្សាតម្លៃសន្តិភាព ចំណែកឯអាជ្ញាធរគ្រប់លំដាប់ថ្នាក់បន្តខិតខំថែមទៀត ក្នុងការការពារសន្តិសុខសណ្តាប់ធ្នាប់សង្គម របៀបរៀបរយ សាធារណៈ បម្រើសេវាសាធារណៈជូនប្រជាពលរដ្ឋឲ្យបានកាន់តែល្អប្រសើរបន្ថែមទៀត។
នៅក្នុងពិធីនេះក៏មានការចូលអមដំណើរដោយលោកស្រីហង់ភារី អ៊ឹមសិទ្ធីនិងលោកអូនពន្ធ័មុនីរត្ន័និងលោកស្រីព្រមទាំងអ្នកតំណាងរាស្ត្រមណ្ឌស្វាយរៀង មន្ត្រីរាជការ អាជ្ញាធរដែនដីកងកម្លាំងប្រដាប់អាវុធ ប្រជាពលរដ្ឋប្រមាណជាង២០០០នាក់។
លោកស្រី ម៉ែនសំអន បានលើកឡើងនៅក្នុងឱកាសនោះទៀតថាៈ ថ្ងៃនេះពិតជាមានសេចក្ដីសោមនស្សរីករាយ ក្រៃលែងដោយបានមកចូលរួមជាមួយព្រះថេរានុត្ថេរៈគ្រប់ព្រះអង្គ អស់លោក លោកស្រី លោកតា លោកយាយ លោកពូ អ្នកមីង និងបងប្អូន ក្មួយៗ ទាំងអស់ ក្នុងពិធីសម្ភោធដាក់ឱ្យប្រើប្រាស់នូវសាលាបុណ្យ១ខ្នង មានបណ្តោយ ១៧ម៉ែត្រកន្លះ ទទឹង៧ម៉ែត្រកន្លះ ប្រក់ក្បឿង នៅតំបន់វប្បធម៌ប្រវត្តិសាស្ត្រព្រៃបាសាក់ ស្ថិតនៅភូមិបាសាក់ ឃុំបាសាក់ ស្រុកស្វាយជ្រំ ខេត្តស្វា’យរៀង។
លោកស្រី ម៉ែនសំអន បាននាំមកនូវការផ្ដាំផ្ញើសាកសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចកាលសម្តេចទាំងពីរតែងតែមានមនោ សញ្ចេតនាស្រឡាញ់រាប់អាន និងរួមសុខរួមទុក្ខជាមួយបងប្អូនជនរួមជាតិទាំងអស់ និងជួយដោះស្រាយទុក្ខលំបាកសព្វបែបយ៉ាងគ្រប់ទីកន្លែងទូទាំងប្រទេស កម្ពុជា ។
លោកស្រីម៉ែនសំអន បានជំរុញឱ្យអាជ្ញាធរ និងមន្ដ្រីរាជការគ្រប់លំដាប់ថ្នាក់ទូទាំងស្រុកស្វាយជ្រំ ក៏ដូចជាអាជ្ញាធរខេត្ដស្វាយរៀងបន្ដបំពេញការងារឱ្យកាន់តែមានប្រសិទ្ធភាពថែមទៀត ជាពិសេសត្រូវចុះឱ្យដល់មូលដ្ឋាន ជាក់ស្ដែង ក្ដាប់ឱ្យបានច្បាស់លាស់ពីកង្វះខាត សំណូមពរផ្សេងៗដែល ប្រជាពលរដ្ឋនៅមូលដ្ឋានត្រូវការជាចាំបាច់ ដើម្បីរួមចំណែកកាត់បន្ថយភាពក្រីក្រ និងជួយលើកកម្ពស់ជីវភាពរស់នៅរបស់ពួកគាត់ឱ្យកាន់តែល្អប្រសើរ។
រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំប្រទេសកម្ពុជាឆ្ពោះទៅរកវឌ្ឍនភាពលើគ្រប់វិស័យ លើកស្ទួយកិត្តិនាមជាតិនៅលើឆាកអន្តរជាតិ ជាពិសេស ពន្លត់ភ្លើងសង្គ្រាមរុំារ៉ៃ ការពារបូរណភាពទឹកដីធានាបាននូវស្ថិរភាព នយោបាយ កំណើនសេដ្ឋកិច្ចប្រមាណជាង ៧%។
លោក ស្រីក៏បាន អំពាវនាវដល់ប្អូនទាំង អស់គ្នាចូលរួមថែរក្សាតម្លៃនៃសន្តិភាព ចំណែកឯអាជ្ញាធរគ្រប់លំដាប់ថ្នាក់បន្តខិតខំថែមទៀតក្នុងការការពារសន្ដិសុខ សណ្ដាប់ធ្នាប់សង្គម របៀបរៀបរយ សាធារណៈ បម្រើសេវាសាធារណៈជូនប្រជាពលរដ្ឋឲ្យបានកាន់តែប្រសើរ អនុវត្ដឱ្យបាននូវគោលនយោបាយរបស់រាជរដ្ឋាភិបាលស្តីពី ភូមិ-ឃុំ មានសុវត្ថិភាព (១) គ្មានសកម្មភាព ឆក់ ប្លន់គ្រប់ប្រភេទ (២) គ្មានការដាំដុះ ការផលិត ការចរាចរ ការជួញដូរ ការចែកចាយ និងការប្រើប្រាស់គ្រឿងញៀនខុសច្បាប់ (៣) គ្មានអំពើអាណាចារ្យ ការជួញដូរស្ត្រី និងកុមារ និងអំពើហិង្សាក្នុងគ្រួសារ (៤) គ្មានក្មេងទំនើង (៥) គ្មានការលេងល្បែងស៊ីសង ខុសច្បាប់គ្រប់ប្រភេទ ការប្រើប្រាស់អាវុធខុសច្បាប់ និងបទល្មើសគ្រប់ប្រភេទ (៦) គ្មានគ្រោះថ្នាក់ចរាចរណ៍ (៧) គ្មានគ្រោះថ្នាក់ដោយសារយុទ្ធភ័ណ្ឌមិនទាន់ផ្ទុះ (៨) មានវិធានការទប់ស្កាត់ គ្រប់គ្រង និងឆ្លើយតបចំពោះ គ្រោះមហន្តរាយប្រកបដោយប្រសិទ្ធភាព (៩) គ្មានការត្រួតពិនិត្យខុសច្បាប់ បន្ដជំរុញកសាងហេដ្ឋារចនាសម្ព័ន្ធរូបវ័ន្ដ ខិតខំដោះស្រាយឱ្យបានល្អនូវបាតុភាពផ្សេងៗក្នុងមូលដ្ឋាន ចូលរួមថែរក្សាសមិទ្ធផលនេះថែរក្សាគង់វង្ស, ចូលរួមថែរក្សាបរិស្ថាន ដូចជាកាប់ដើមឈើ ជីករំលើងនៅទីទួលបុរាណ នៅជុំវិញតំបន់វប្បធម៌ប្រវត្តិសាស្ត្រព្រៃបាសាក់ ដើម្បីជាការទាក់ទាញដល់ភ្ញៀវ ទេសចរណ៍មកទស្សនានៅក្នុងតំបន់នេះ, បងប្អូនប្រជាពលរដ្ឋជាកសិករត្រូវត្រៀមខ្លួនក្នុងការបង្ករបង្កើនផលក្នុងរដូវស្សានេះ។ ដោយឡែកសមាជិកក្រុមប្រឹក្សា ឃុំ-សង្កាត់ ត្រូវត្រៀមខ្លួនសម្រាប់ចូលរួមក្នុងការបោះឆ្នោតជ្រើសតាំងព្រឹទ្ធសភា អាណត្តិទី៤ ដែលនឹងប្រព្រឹត្តនៅថ្ងៃទី២៥ ខែកុម្ភៈ ឆ្នាំ២០១៨ ខាងមុខនេះ៕ វ៉ៃកូ