កាលពីព្រឹកថ្ងៃទី៨ ខែសីហា ឆ្នាំ២០២០ មានករណីគ្រោះថ្នាក់ចរាចរណ៍ដ៏រន្ធត់មួយ ដោយស្ត្រីម្នាក់បានបើករថយន្តព្រូស ឆ្លងភ្លើងស្តុបលឿនពេក ជ្រុលទៅបុកបុរសម្នាក់ជិះម៉ូតូបណ្តាលឲ្យដួល ហើយរេចង្កូតមកបុកបុរសម្នាក់អង្គុយលើកង់បីអានកាសែតបណ្តាលឲ្យក្រឡាប់ ហើយរថយន្តមិនទាន់អស់ល្បឿន បន្តបុកបង្គោលភ្លើងបំភ្លឺផ្លូវទៅមុខលែងរួចបណ្ដាលរងការខូចខាតយ៉ាងដំណំតែម្តង។
ហេតុការណ៍ដ៏ហួសចិត្តបំផុតមួយនេះ បានកើតឡើងនៅចំណុចស្តុបវត្តលង្កា តាមផ្លូវព្រះសីហនុ កែងផ្លូវ៥១ សង្កាត់បឹងកេងកងទី១ ខណ្ឌបឹងកេងកង វេលាម៉ោង៧ និង០០នាទីព្រឹកថ្ងៃទី៨ ខែ សីហា ឆ្នាំ ២០២០។
ស្ត្រីបើករថយន្តបង្កព្រូសពណ៌ប្រផេះ ពាក់ផ្លាកលេខភ្នំពេញ ២AY-១៨៨២ មានឈ្មោះ ទ្រឿង គីចលាង អាយុ ២៩ ឆ្នាំ។
យោងតាមរបាយការណ៍សមត្ថកិច្ចបានឲ្យដឹងថា នៅមុនពេលកើតហេតុ ស្ត្រីខាងលើបានបើករថយន្តតាមផ្លូវព្រះសីហនុ ក្នុងទិសដៅពីលិចទៅកើតភ្លើងស្តុបខៀវ ស្រាប់តែភ្លើងលោតមកក្រហម ក៏គាត់ជាន់បន្ថែមល្បឿនឲ្យផុតស្តុប តែចៃដន្យមានបុរសម្នាក់ បើកម៉ូតូហុងដាឃ្លីកពាក់ផ្លាកលេខ នគរបាល ១-១៩៩៥ ឆ្លងកាត់ទទឹងផ្លូវតាមផ្លូវ៥១ ក្នុងទិសដៅពីជើងមកត្បូងជាន់ហ្វ្រាំងមិនទាន់ បុកម៉ូតូឃ្លីករួចបន្តរេចង្កូតបុកម៉ូតូកង់បីចតនៅលើចិញ្ចើមផ្លូវ ប៉ើងក្រឡាប់ម៉ូតូកង់បី ជ្រុលទៅបុកបង្គោលភ្លើងបំភ្លឺផ្លូវរបស់សាលាក្រុង បណ្ដាលខូចខាត និងរថយន្តត្រូវផ្ទុះពោងសុវត្ថិភាព និងខ្ទេច១កំណាត់ខាងមុខទាំងសុង។ សំណាងល្អហើយ ដែលពុំបង្កឲ្យប៉ះពាល់ដល់អាយុជីវិត ដោយគ្រាន់តែបណ្តាលឲ្យបុរស២នាក់របួសស្រាល យកទៅសង្គ្រោះនៅមន្ទីរពេទ្យភ្លាម។
ទាក់ទងនឹងព័ត៌មាននៃហេតុការណ៍ខាងលើនេះផង ក្រោយ CEN បានចុះផ្សាយ ស្រាប់តែស្ត្រីបើករថយន្តបង្ករូបនេះ បានចេញមកចោទប្រកាន់ថា សារព័ត៌មានយើងចុះផ្សាយព័ត៌មានគ្រោះថ្នាក់ចរាចរណ៍នេះ ពុំមែនជាការពិត ដោយនិយាយអះអាងថា រូបនាងមិនមែនជាអ្នកបង្កទេ គឺបុរសម្នាក់ជិះម៉ូតូជាអ្នកបង្កឡើង តែប៉ូលិសបណ្តោយឲ្យបុរសនោះរួចខ្លួន (មិនដឹងទៅណាទេ) និងបានអះអាងទៀតថា រូបនាងបានឆែកកាមេរ៉ារកឃើញថា បើកបរក្នុងល្បឿនត្រឹមត្រូវ និងសូម្បីគោរពភ្លើងសញ្ញាក៏ត្រូវដែរ (តែបែរជាបើកបុកគេបែបនេះ) ។
មិនត្រឹមតែប៉ុណ្ណឹងទេ ស្ត្រីរូបនេះក៏បានគំរាមប្តឹងទៀត ប្រសិនបើមិនកែតម្រូវ ឬ លុបព័ត៌មាននេះចោល បើទោះជាខាងយើងបានស្នើឲ្យដាក់លិខិតផ្លូវការស្នើសុំមក ដើម្បីធ្វើការបកស្រាយយ៉ាងណា៕ ដោយ៖ លឹម ហុង