ភ្នំពេញ៖ ជឿជាក់ថា ប្រិយមិត្តពុកម៉ែបងប្អូនជាច្រើន ប្រាកដណាស់ស្គាល់ច្បាស់ដូចថ្ងៃ ចំពោះគ្រូអគ្គីនេត្រ ដែលល្បីកាប់មិនមុត ពិសេសពូកែខាងទស្សន៍ទាយ ធ្វើយន្តគាថា ដាក់ស្នេហ៍មុខ ឬ រកស៊ីជាដើម។
ប៉ុន្តែ ក្រោយមានគ្រូខ្លាំងជាច្រើននាក់ បានចេញមកហែកហួរ និងបើកបង្ហាញការពិតស្តែងៗយ៉ាងសាហាវថា នេះគឺគ្រាន់តែជាវិធីកាប់មិនមុតកំប៉ិចកំប៉ុកអង្ករកំប៉ុងបណ្តោះ និងគ្មានខ្លាំងពូកែស័ក្តិសិទ្ធិអ្វីឡើយនោះ គ្រូអគ្គីនេត្រហាក់ស្ងប់ស្ងាត់ និងឈានដល់ប្រព្រឹត្តគ្រឿងញៀន ត្រូវសមត្ថកិច្ចចាប់ខ្លួន ហើយទើបចេញគុគជិត១ឆ្នាំមកហើយ។
ក្រោយចេញពីពន្ធនាគារ ឃើញគ្រូអគ្គីនេត្ររូបនេះ ក៏ហាក់បន្តបើកមុខរបរនេះបន្តទៀត ដោយលើកហេតុផលថា មានកូនសិស្សជាច្រើននៅបន្តគាំទ្រ។ ទោះយ៉ាងណា ក្រោយមក គ្រូអគ្គីនេត្រក៏បានផ្លាស់ប្តូរមកលក់ផលិតផលអនឡាញវិញម្តង។
តែយ៉ាងណា ថ្មីៗនេះ គ្រូអគ្គីនេត្រ បានធ្វើឲ្យកូនសិស្ស និងមហាជនភ្ញាក់ផ្អើលព្រើតតែម្តង ខណៈបានឃើញបកស្រាយចម្រៀង១បទចង្វាក់ក្លឹបមានចំណងជើងថា៖ «លង់ស្នេហ៍នារីសក់ខ្លី»។ ក្រោយពីបានឃើញបែបនេះ អ្នកលេងហ្វេសប៊ុកជាច្រើនបានចូលខមិនលាន់មាត់ហួសចិត្តបែបៗនេះថា៖ «ពីរោះសាហាវ, ស្តាប់មិនយល់ ឮសូរតែសូមអូនស្រីហ្វាប់បងបានទេ, អគ្គីនេត្រអើយអគ្គីនេត្រ, ស្តាប់ហើយចង់វិលមុខ,…» ៕ ដោយ៖ លឹម ហុង
