ភ្នំពេញ៖ ចាប់តាំងពីឆ្នាំ២០១៨ កម្មវិធីខ្សែសង្វាក់តម្លៃកសិកម្មកម្ពុជា-អូស្ត្រាលី (កាវ៉ាក់) បាននិងកំពុងគាំទ្រសហករណ៌កសិកម្ម ដើម្បីសហការជាដៃគូជាមួយក្រុមហ៊ុន អេមរុ រាយស៍ ដែលជាក្រុមហ៊ុនកិនស្រូវមួយក្នុងចំណោមក្រុមហ៊ុនកិនស្រូវធំជាងគេនានា នៅកម្ពុជា។ នេះបើតាមការផ្សាយព័ត៌មានលើផេកហ្វេសប៊ុកស្ថានទូតអូស្ត្រាលីប្រចាំព្រះរាជាណាចក្រកម្ពុជា នៅថ្ងៃទី១៧ខែសីហាឆ្នាំ២០២០។
ស្ថានទូតអូស្ត្រាលី បានបញ្ជាក់ថា កាលពីសប្តាហ៍មុន កសិករជាង ១៥០០ នាក់ មកពីសហករណ៍កសិកម្ម ចំនួន ២២ នៅខេត្តកំពង់ធំ និងកំពង់ចាម នឹងទទួលបានអត្ថប្រយោជន៍ពីការធ្វើជាដៃគូជាមួយ Amru Rice Cambodia Co., Ltd សម្រាប់រដូវកាលដាំដុះលើកក្រោយ។
វិធីសាស្ត្រដែលគាំទ្រថវិកាដោយអូស្ត្រាលីនេះ – ហៅថា ការធ្វើកសិកម្មតាមកិច្ចសន្យា – បណ្តុះបណ្តាល និងគាំទ្រ កសិករ ដាំដុះស្រូវប្រកបដោយនិរន្តរភាពដែលត្រូវគេទទួលស្គាល់ជាអន្តរជាតិ។
ការអនុវត្តបច្ចេកទេសនេះ មានគោលបំណងធ្វើឲ្យទិន្នផលផលស្រូវរបស់ពួកគាត់កើនឡើង ហើយមានការធានាទិញពីពីក្រុមហ៊ុន អេមរុ រាយស៍ ក្នុងតម្លៃសមរម្យ។ ទន្ទឹមនឹងនេះ ក្រុមហ៊ុន អេមរុ រាយស៍ នឹងទទួលបានស្រូវដែលមានគុណភាពខ្ពស់ ប្រមាណជាង ៥៥០០ តោន សម្រាប់ជាឱកាសនាំចេញទៅលក់ដល់ អូស្ត្រាលី និងសហគមន៍អឺរ៉ុប ព្រមទាំងក្នុងស្រុកផងដែរ។
តម្រូវការអង្ករដែលកែច្នៃពីស្រូវប្រកបដោយនិរន្តរភាព មិនប៉ះពាល់អាកាសធាតុ មានកម្រិតខ្ពស់ ដោយសារតែអតិថិនដឹងពីគុណភាព និងការគាំទ្រដែលត្រូវបានផ្តល់ទៅឱ្យកសិករ ព្រមទាំងការកាត់បន្ថយ ផលប៉ះពាល់ដល់បរិស្ថាន៕
ដោយ៖កូឡាប
