ព្រះសីហនុ៖ ដោយមានការដឹកនាំនិងបញ្ជាផ្ទាល់របស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ កម្លាំងជំនាញបានឃាត់ខ្លួនជនសង្ស័យជាជនជាតិចិន៣នាក់ ពាក់ព័ន្ធករណីចាប់ស្ត្រីម្នាក់ ឃុំឃាំងមនុស្សខុសច្បាប់ ជំរិតទារប្រាក់។
លោកឧត្តមសេនីយ៍ទោ ស្នងការខេត្ត បានឲ្យដឹងនៅរសៀលថ្ងៃទី១៧ ខែសីហា ឆ្នាំ២០២០នេះថា កាលពីថ្ងៃទី១៣ ខែសីហា ឆ្នាំ២០១០ វលាម៉ោង២៣នឹង១០នាទី មានប្រជាពលរដ្ឋដែលជាអ្នករត់ម៉ូតូកង់បី (PASS APP) បានទូរស័ព្ទប្តឹងរាយការណ៍ថា មាននារីជនជាតិចិន១នាក់ បានបើករថយន្តរបស់គាត់ម៉ាក RANGE ROVER ពណ៌ស មកចតនៅកៀនហាងលក់សំលៀកបំពាក់របស់គាត់ដែលមានស្លាកយីហោ COCO ស្ថិតនៅភូមិ២ សង្កាត់២ ក្រុង-ខេត្តព្រះសីហនុ ភ្លាមនោះស្រាប់តែមានជនជាតិចិនមួយក្រុមមានគ្នា ៤នាក់ បានបើករថយន្ត១គ្រឿង ម៉ាកហាយឡែនឌែ ពណ៌ទឹកប្រាក់ មកឈប់ក្បែររថយន្តរបស់នារីជនជាតិចិន ដែលជាថៅកែហាងCOCO ហើយក៏មានជនជាតិចិន៣នាក់ បានចុះពីរថយន្តម៉ាកហាយឡែនឌ័រ មកចាប់នារីជនជាតិចិននោះ ខ្ទប់មាត់បោះចូលក្នុងរថយន្តរបស់ពួកវា រួចជិះគេចខ្លួនបាត់។
លោកស្នងការបន្តថា បន្ទាប់ពីទទួលបានដំណឹងនេះភ្លាម កម្លាំងជំនាញផែនការងារនគរបាលព្រហ្មទណ្ឌ សហការជាមួយកម្លាំងអធិការដ្ឋាននគរបាលក្រុងព្រះសីហនុ និងកម្លាំងប៉ុស្តិ៍សង្កាត់២ ទៅដល់កន្លែងកើតហេតុ និងត្រួតពិនិត្យមើលកាំមេរ៉ាសុវត្តិភាពឃើញថា ពិតជាមានករណីចាប់ខ្លួននារីជនជាតិចិនដែល ជាថៅកែហាងលក់សំលៀកបំពាក់ COCO ចូលទៅក្នុងរថយន្ត ១គ្រឿង ម៉ាកហាយឡែនឌែ ពិតប្រាកដមែន ទើបកម្លាំងសមត្ថកិច្ចជំនាញរបស់យើងប្រើប្រាស់វិធានការជំនាញ និងស្ទាក់គ្រប់គោលដៅសំខាន់ៗ ដោយសហការជាមួយកម្លាំងអធិការដ្ឋាននគរបាលក្រុង-ស្រុកទាំងអស់។ រហូតដល់វេលាម៉ោង៦៖០០នាទី ថ្ងៃទី១៤ សីហា កម្លាំងជំនាញយើងរកបានតំរុយដែលរថយន្តជនសង្ស័យជិះគេចខ្លួនទៅស្រុកស្ទឹងហាវ ទើបរុករករហូតរំដោះបានជនរងគ្រោះ ដែលត្រូវជនសង្ស័យចាប់យកទៅបង្ខាំងទុកនៅក្នុងព្រៃស្រុកស្ទឹងហាវ ខេត្តព្រះសីហនុ រីឯជនសង្ស័យបានរត់ គេចខ្លួនអស់។
លោកឧត្តមសេនីយ៍ទោ ជួន ណារិន្ទ បន្ថែមថា បន្ទាប់ពីរំដោះជនរងគ្រោះរួចហើយ កម្លាំងជំនាញស្រាវជ្រាវយ៉ាងយកចិត្តទុកដាក់ រហូតដល់ថ្ងៃទី១៥ សីហា វេលាម៉ោង១៥នឹង៣០នាទី កម្លាំងសមត្ថកិច្ច បានឃាត់ខ្លួនជនសង្ស័យ១នាក់ នៅចំណុចសណ្ឋាគារ និងកាស៊ីណូ រ៉ូយ៉ាល់លីហ័រ ស្ថិតនៅក្រុម១៣ ភូមិ៤ សង្កាត់៤ ក្រុង-ខេត្តព្រះសីហនុ ព្រមទាំងដកហូតបានរថយន្តម៉ាក ហាយឡែនឌ័រ ពណ៌ទឹកប្រាក់ មានផ្លាកលេខ ភ្នំពេញ 2K-7388 ដែលក្រុមជនសង្ស័យជិះធ្វើសកម្មភាពចាប់ជំរិតជនរងគ្រោះ។ បន្ទាប់ ពីសាកសួរជនសង្ស័យរួចមក កម្លាំងសមត្ថកិច្ចបានបន្តចាប់ឃាត់ខ្លួនបានជនសង្ស័យ២នាក់ បន្ថែមទៀត នៅថ្ងៃទី១៥ វេលាម៉ោង២១៖៣០នាទី នៅចំណុចកែងផ្លូវ LV ស្ថិតនៅ ភូមិ៤ សង្កាត់៤ ក្រុង-ខេត្តព្រះសីហនុ។
ជនរងគ្រោះឈ្មោះ WU JIAJIA ភេទស្រី អាយុ៤២ឆ្នាំ ជនជាតិចិន មុខរបរលក់សម្លៀកបំពាក់ ស្នាក់នៅភូមិ២ សង្កាត់២ ក្រុង-ខេត្តព្រះសីហនុ មានស្នាមរងបួសដាច់រលាត់ស្បែកបន្តិចបន្តួច(រងរបួសស្រាល) ។
ជនសង្ស័យទាំង៣នាក់៖១-ឈ្មោះ WANG XIAO ZHANG ភេទប្រុស អាយុ៣៨ឆ្នាំ ជនជាតិចិន មុខរបរ បុគ្គលិកហាងលក់អំពូលភ្លើងសូឡា កាន់លិខិតឆ្លងដែនលេខៈ EH7330702 (មិនបានយកតាមខ្លួន) ស្នាក់នៅសណ្ឋាគារ កាស៊ីណូ រ៉ូយ៉ាល់លីហ័រ ស្ថិតនៅ ភូមិ៤ សង្កាត់៤ ក្រុង-ខេត្តព្រះសីហនុ, ២-ឈ្មោះ RAN FU CHUAN ភេទប្រុស អាយុ២៣ឆ្នាំ ជនជាតិចិន មុខរបរអ្នកគ្រប់គ្រងហាងបាយ HUAN LE គ្មានលិខិតឆ្លង ដែនលេខជាប់ខ្លួន ស្នាក់នៅភូមិ៣ សង្កាត់៣ ក្រុង-ខេត្តព្រះ សីហនុ និង៣-ឈ្មោះ JIANG HONG ភេទប្រុស អាយុ២៦ឆ្នាំ ជនជាតិចិន មុខរបរបុគ្គលិកទិញអីវ៉ាន់ហាងបាយ HUAN LE គ្មានលិខិតឆ្លង ដែនលេខជាប់ខ្លួន ស្នាក់នៅភូមិ៣ សង្កាត់៣ ក្រុង-ខេត្តព្រះ សីហនុ។
វត្ថុតាងចាប់យកបាន៖ រថយន្ត១គ្រឿង ម៉ាកហាយឡែនឌែ ពណ៌ទឹកប្រាក់ ផ្លាកលេខ ភ្នំពេញ 2K-7388 (មធ្យោបាយធ្វើសកម្មភាពចាប់ជំរិត)និងក្នុងរថយន្តមានសម្ភារមួយចំនួន, រថយន្ត១គ្រឿង ម៉ាក TUNDRA ពណ៌ស ផ្លាកលេខ ភ្នំពេញ 2AY-0176, ដំបងដែករលាស់១ដើម, ខ្សែដៃអង្កាំ, ចិញ្ជៀន១វង់, ស៊ីមទូរស័ព្ទដៃ១គ្រឿង, នាឡិកាដៃ២ និងបំពង់ប្រើប្រាស់គ្រឿងញៀន១, ទូរស័ព្ទដៃ៧គ្រឿង។
បច្ចុប្បន្នកម្លាំងជំនាញការិយាល័យនគរបាលព្រហ្មទណ្ឌកម្រិតស្រាល បានកសាងសំណុំរឿងបញ្ជូនខ្លួនជនសង្ស័យ និងវត្ថុតាង ទៅសាលាដំបូងខេត្តព្រះសីហនុ ដើម្បីចាត់ការតាមផ្លូវច្បាប់ ៕ ដោយ៖បញ្ញាស័ក្តិ