ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងសារលើផេកហ្វេសប៊ុកផ្លូវការ នៅព្រឹកថ្ងៃទី១៨ខែសីហាឆ្នាំ២០២០នេះថា ក្នុងកាលៈទេសៈដែលប្រទេសកម្ពុជា កំពុងតែប្រឈមនឹងការប្រយុទ្ធប្រឆាំងជំងឺឆ្លងរាតត្បាតកូវីដ-១៩ ការអភិវឌ្ឍប្រទេសក៏កំពុងតែដំណើរការទៅមុខជាធម្មតា ក្នុងនោះវិស័យសំណង់កំពុងតែមានការរីកចម្រើនគួរឲ្យកត់សម្គាល់។
សម្តេចតេជោ បានមានប្រសាសន៍ថា ក្នុងរយៈពេលជាង១០ឆ្នាំចុងក្រោយនេះ វិស័យសំណង់នៅក្នុងប្រទេសកម្ពុជា បានបន្តរីកចម្រើនទាំងនៅរាជធានីភ្នំពេញ និងតាមបណ្តាខេត្តមួយចំនួនទៀត គឺសុទ្ធសឹងតែបានបង្ហាញពីតួលេខអភិវឌ្ឍន៍កើនឡើង ជាមួយនឹងសំណង់អគារលំនៅដ្ឋានខុនដូ , អាផាតមិន , សំណង់អគារពាណិជ្ជកម្មខ្ពស់ៗ និងសំណង់លំនៅដ្ឋានលក្ខណៈបុរីជាដើម។
ការសាងសង់អគារខ្ពស់ៗជាសូចនាករ នៃភាពរីកចម្រើនផ្នែកសេដ្ឋកិច្ច ហើយនៅពេលខាងមុខកម្ពុជាយើង នឹងមានអាគារខ្ពស់ៗបន្ថែមទៀត ទាំងទីក្រុងភ្នំពេញ និងតាមបណ្ដាខេត្ត។
ទោះបីការកសាងផ្នែកសំណង់នេះកំពុងតែបោះជំហានទៅមុខហើយតម្រូវការ បុគ្គលិក ឬក៏កម្មករជាច្រើនយ៉ាងណាក៏ដោយ សូមម្ចាស់ក្រុមហ៊ុន ឬម្ចាស់ការដ្ឋាន សូមយកចិត្តទុកដាក់ថែរក្សាសុខភាពបុគ្គលិកកម្មករឲ្យយល់អំពីរបៀបនៃការថែរក្សាសុខភាពជាពិសេស ការថែរក្សាកុំឲ្យមានឆ្លងជំងឺកូវីដ-១៩ ត្រូវមានការលាងសម្អាតដៃ មានម៉ាសពាក់ឲ្យបានត្រឹមត្រូវក្នុងករណីចាំបាច់និងដើម្បីចៀសវាងការឆ្លងពីម្នាក់ទៅម្នាក់ ពីព្រោះការដ្ឋានសំណង់មានបុគ្គលិកកម្មករធ្វើការច្រើន ។ សូមយកចិត្តទុកដាក់ថែរក្សាបុគ្គលិកកម្មករកុំឲ្យឆ្លងជំងឺ កូវីដ-១៩៕ដោយ៖កូឡាប
