កណ្តាល៖ លោក ជួន វណ្ណៈ ចៅក្រមជំនុំជម្រះ នៃ សាលាដំបូងខេត្តកណ្តាល នៅព្រឹកថ្ងៃទី ១៨ ខែ សីហា ឆ្នាំ ២០២០ នេះ បានចេញដីកាបង្គាប់ឲ្យឃុំខ្លួន ឈ្មោះ ជុន មុំ ដាក់ពន្ធនាគារខេត្តកណ្ដាល ពីបទ កែច្នៃ ផលិតផលទំនិញដែលច្បាប់ហាមឃាត់ ប្រព្រឹត្តនៅភូមិរំលិច ឃុំទួលព្រេជ ស្រុកអង្គស្នួល ខេត្តកណ្តាល កាលពីថ្ងៃទី១៤ខែសីហា ឆ្នាំ២០២០ តាមបញ្ញត្តិមាត្រា ១៧ ១៨ និងមាត្រា ៦៣ នៃច្បាប់ស្តីពីការគ្រប់គ្រងគុណភាពសុវត្ថិភាពលើផលិតផល និងត្រូវចាប់ខ្លួនកាលពីថ្ងៃទី១៧ ខែសីហា ឆ្នាំ២០២០។។
ស្ត្រីរូបនេះបានប្រព្រឹត្តបទល្មើសហើយត្រូវសមត្ថកិច្ចចាប់ខ្លួន ចំនួន ៨ ដងប៉ុន្តែពុំត្រូវបានផ្តន្ទាទោស ឬក៏សាងសំណុំរឿងបញ្ជូនទៅតុលាការនោះឡើយ។ ការប្រព្រឹត្តបទល្មើសញឹកញាប់ហើយមិនមានទោស ត្រូវបានគេសង្ស័យថា មន្ត្រីអនុវត្តន៍ច្បាប់ខ្លះអាចមានផលប្រយោជន៍អំពីរឿងនេះ ។ ឈ្មោះ ជុន មុំ រស់នៅភូមិរំលិច ឃុំទួលព្រេជ ស្រុកអង្គស្នួល ខេត្តកណ្តាល ។
លោក ជួន វណ្ណៈ ចៅក្រមជំនុំជម្រះ នៅថ្ងៃទី១៨ខែសីហាឆ្នាំ២០២០នេះ បានចេញដីកាសម្រេចបង្គាប់ឲ្យប្រធានមន្ទីរឃុំឃាំងខេត្តកណ្តាល ឃុំខ្លួនឈ្មោះ ជុន មុំ ភេទស្រី ជាបណ្តោះអាសន្ន ឲ្យបានសម្រេចតាមដីកានេះ។
ចំណែកលោកជំទាវ ហ៊ុន ស៊ីណាត ប្អូនស្រីបង្កើត សម្ដេចតេជោ ហ៊ុន សែន បានរិះគន់ខ្លាំងៗ និងបានព្រមានថា បើហ៊ានដោះលែងទៀត លោកជំទាវ នឹងទៅរកមុខព្រះរាជអាជ្ញានិង សមត្ថកិច្ច ហើយ ។
លោកជំទាវបានបញ្ជាក់ថា” សូមបងប្អូនកូនក្មួយមិត្តរួមFacebook ទាំង ជួយឃ្លាំមើលការឃាត់ខ្លួនថៅកែឈ្មោះជុន មុំ ផលិតស្ករត្នោតក្លែងក្លាយបង្ករផលប៉ះពាល់ដល់សុខភាពប្រជាពលរដ្ឋនោះឃាត់បានប៉ុន្មានថ្ងៃបើហ៊ានលែងយាយជុន មុំ ទៀតខ្ញុំទៅរកមុខលោកព្រះរាជអាជ្ញា និងសមត្ថកិច្ចប៉ូលីសហើយពីព្រោះការផលិតស្ករត្នោតក្លែងក្លាយចាប់ថៅកែនេះ៨ ដងតែមិនដែលកាត់ទោសទេចាំមើលសានេះតុលាការគិតយ៉ាងម៉េចលែងយាយហ្នឹងឲ្យទៅផលិតទៀតដែរទេ ? សូមមិត្តរួមហ្វេសប៊ុកជួយឃ្លាំមើលតុលាការទាំងអស់គ្នា “៕ ដោយ៖កូឡាប
