ភ្នំពេញ ៖ ក្រសួងសុខាភិបាលកម្ពុជា ធ្វើការច្រានចោលទាំងស្រុងចំពោះការផ្សាយរបស់សារព័ត៌មាន Cambodia Daily និងសារព័ត៌មាន UCA News ដែលបានផ្សាយថា ក្រសួងសុខាភិបាលព្រួយបារម្ភពីករណីជនជាតិចិនចំនួន៦នាក់ ដែលបានធ្វើតេស្តវិជ្ជមានវីរុសកូវីដ ១៩ ហើយត្រូវបានស្ថានទូតចិនប្រចាំនៅកម្ពុជា ជំរុញមិនឲ្យមានការដាក់បញ្ចូលក្នុងសេចក្តីរាយការណ៍របស់ក្រសួងជូនសាធារណជន ជាប្រចាំថ្ងៃនោះ។
ការច្រានចោលរបស់ក្រសួងសុខាភិបាលនេះ គឺបានធ្វើឡើងនៅរសៀលថ្ងៃទី១៨ ខែសីហានេះ បន្ទាប់សារព័ត៌មានទាំងពីរខាងលើនេះបាន សរសេរក្នុងអត្ថបទរបស់ខ្លួនថា ជនជាតិចិនចំនួន៦នាក់បានផ្ទុកមេរោគកូវិដ១៩ ខណៈក្រសួង អះអាងថា ជនជាតិចិនទាំង៦នាក់ត្រូវបានធ្វើតេស្តចំនួនបួនលើកហើយ ដោយអវិជ្ជមាននូវមេរោគកូវិដនេះ។
លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល នៃព្រះរាជាណាចក្រកម្ពុជា បានថ្លែងប្រាប់បណ្ដាញសារព័ត៌មានតាមរយៈតេលេក្រាមនៅថ្ងៃទី១៨ ខែសីហា ឆ្នាំ២០២០ នេះថា ក្រសួងសុខាភិបាល នៃព្រះរាជាណាចក្រកម្ពុជា សូមធ្វើការច្រានចោលទាំងស្រុង នូវការចុះផ្សាយរបស់សារព័ត៌មាន Cambodia Daily ដែលដាក់ចំណងជើងថា “Mystery in Cambodia over missing Covid-positive Chinese – The Cambodia Daily” និងការចុះផ្សាយរបស់សារព័ត៌មាន UCA News ដែលមានចំណងជើងថា “Mystery in Cambodia over missing Covid-positive Chinese – UCA News” ដែលបានចុះផ្សាយកាលពីថ្ងៃទី១៧ ខែសីហា ឆ្នាំ២០២០ កន្លងទៅនេះ។
ការចុះផ្សាយនេះ គឺជាការផ្សាយព័ត៌មានមិនត្រឹមត្រូវ និងមិនពិត ហើយការដែលបានសរសេរថា៖ ក្រសួងសុខាភិបាលព្រួយបារម្ភពីករណីជនជាតិចិនចំនួន ៦នាក់ដែលបានធ្វើតេស្តវិជ្ជមានវីរុសកូវីដ-១៩ ហើយស្ថានទូតចិនប្រចាំនៅកម្ពុជា ជម្រុញមិនឲ្យមានការដាក់បញ្ចូលក្នុងសេចក្តីរាយការណ៍ របស់ក្រសួងជូនសាធារណជនជាប្រចាំថ្ងៃ ក៏ជាព័ត៌មានមិនពិតដែរ។
ក្រសួងសុខាភិបាល សូមគោរពបញ្ជាក់ជូនសាធារណជន និងសារព័ត៌មានទាំងពីរខាងលើនេះថា៖ ក្រសួងតែងតែចេញផ្សាយព័ត៌មានស្តីពីការរកឃើញអ្នក វិជ្ជមានវីរុសកូវីដ-១៩ ថ្មី អ្នកព្យាបាលជាសះស្បើយ និងអ្នកកំពុងនៅសម្រាកព្យាលបាលក្នុងមន្ទីរពេទ្យរដ្ឋ និងឯកជន ប្រកបដោយតម្លាភាព ដោយមិនមានការលាក់លៀមអ្វីទាំងអស់ ហើយក៏មិនមានការបាត់ករណីអ្នកវិជ្ជមានវីរុសកូវីដ-១៩ ថ្មី នៅក្នុងប្រទេសកម្ពុជានោះទេ។ ចំណែកឯករណីជនជាតិចិនទាំង ៦នាក់ដែលបានលើកឡើងនោះ គឺមិនមានភាពអាថ៌កំបាំងអ្វីនោះឡើយដោយពួកគាត់ទាំង ៦នាក់នេះ មានលទ្ធផលតេស្ត អវិជ្ជមានវីរុសកូវីដ-១៩ ដែលមិនមានភាពចាំបាច់ដែលត្រូវរាយការណ៍ជាសាធារណៈ ដូចដែលក្រសួង មិនបានរាយការណ៍នូវរាល់បុគ្គលដែលមាន លទ្ធផលអវិជ្ជមានវីរុសកូវីដ-១៩ តាំងពីចាប់ផ្តើមមានការរកឃើញអ្នកជំងឺកូវីដ-១៩ នៅក្នុងប្រទេសកម្ពុជាមកម្ល៉េះ លើកលែងតែអ្នកដែលត្រូវបានពិនិត្យព្យាបាលជាសះស្បើយតែប៉ុណ្ណោះ។ ដោយសារមានការចុះផ្សាយធ្វើឲ្យមានការយល់ច្រឡំ បង្កឲ្យមានភាពមិនច្បាស់លាស់លើវិធានការ និងការខិតខំរបស់ក្រុមការងារទាំងថ្ងៃទាំងយប់នោះ ក្រសួងសុខាភិបាល សូមជម្រាបបញ្ជាក់ជូនផងដែរថា ជនជាតិចិនទាំង ៦នាក់នេះ គឺពេលមកដល់អាកាសយានដ្ឋានអន្តរជាតិភ្នំពេញ កាលពីយប់ថ្ងៃទី២៣ ខែកក្កដា ឆ្នាំ២០២០ កន្លងទៅ ក្រុមការងារអន្តរវិស័យ ដែលមានក្រុមការងារក្រសួងសុខាភិបាលផងដែរនោះ បានខិតខំបំពេញភារកិច្ចបានយ៉ាងហ្មត់ចត់ រហូតដល់រំលងអធ្រាត្រដោយមិនទាំងបានសម្រាកផងនោះ បានធ្វើតេស្តពួកគាត់ពេលមកដល់ភ្លាម និងឲ្យពួកគាត់នៅដាច់ដោយឡែក នៅមណ្ឌលសុខភាពចាក់អង្រែ រាជធានីភ្នំពេញ ដើម្បីរង់ចាំលទ្ធផល ហើយបន្ទាប់មក ក៏ទទួលបានលទ្ធផលមានភាពមិនច្បាស់លាស់ និងដោយមានកិច្ចសហការល្អពីស្ថានទូតចិនប្រចាំនៅកម្ពុជា ក្រុមការងារបានចាត់ចែងដើម្បីធ្វើតេស្តសារឡើងវិញ ដែលជាលទ្ធផលនៃការធ្វើតេស្តលើកទីពីរនៅថ្ងៃទី២៦ ខែកក្កដា ឆ្នាំ២០២០ ផ្តល់ដោយវិទ្យាស្ថានប៉ាស្ទ័រកម្ពុជា ជនជាតិចិនទាំង ៦នាក់នោះ មិនមានផ្ទុកនៅវីរុសកូវីដ-១៩ នោះឡើយ។ នៅថ្ងៃទី២៧ ខែកក្កដា ឆ្នាំ២០២០ តេស្តលើកទី៣ ក៏បានធ្វើឡើងទៀត ដោយទទួលបានលទ្ធផលអវិជ្ជមាន និងបានអនុញ្ញាតឲ្យចេញពីមណ្ឌលសុខភាពចាក់អង្រែ រាជធានីភ្នំពេញ ទៅបន្តធ្វើចត្តាឡីស័ក នៅតាមទីកន្លែងស្នាក់នៅរបស់ពួកគាត់ ក្រោមការតាមដានរបស់ក្រុមការងារ និងការជួយសហការពីស្ថានទូតចិនប្រចាំនៅកម្ពុជា។ រហូតមកដល់ថ្ងៃទី៥ ខែសីហា ឆ្នាំ២០២០ ពួកគាត់ទាំង ៦នាក់នេះ មិនមានបញ្ហាសុខភាពអ្វីគួរឲ្យកត់សម្គាល់ ដែលពាក់ព័ន្ធនឹងជំងឺកូវីដ-១៩ នោះឡើយ ហើយតេស្តលើកទី៤ ក៏បានធ្វើឡើងបន្ថែមទៀត ដោយទទួលបានលទ្ធផលអវិជ្ជមានវីរុស-១៩ ដែរ។
ដូច្នេះ ក្រសួងសុខាភិបាល សូមច្រានចោលទាំងស្រុងនូវការចុះផ្សាយព័ត៌មាន របស់សារព័ត៌មានកាំបូឌាដេលី និង UCA News ខាងលើ ដែលបានលើកឡើងផ្ទុយពីការពិតទាំងស្រុង ហើយក្រសួង ក៏មិនដែលបានបញ្ជាក់ជូន ឬផ្តល់ព័ត៌មានពាក់ព័ន្ធនឹងករណីជនជាតិចិនទាំង ៦នាក់ និងការបារម្ភរបស់ក្រសួង ឬខ្លឹមសារព័ត៌មានទៅសារព័ត៌មានទាំងពីរខាងលើនេះ នោះដែរ។
ក្រសួង សូមអំពាវនាវ ដល់អ្នកសារព័ត៌មានទាំងអស់ ចូលរួមសហការជាមួយក្រសួងសុខាភិបាល ដើម្បីទទួលបានព័ត៌មានពិតប្រាកដ សម្រាប់ការផ្សព្វផ្សាយព័ត៌មាន ឲ្យមានភាពត្រឹមត្រូវ ចៀសវាងធ្វើឲ្យមានភាពច្របូកច្របល់ក្នុងសង្គម ដោយសារតែព័ត៌មានមិនច្បាស់លាស់ មិនពិត ឬចេះតែសរសេរលើកឡើង ដោយគ្មានមូលដ្ឋានច្បាស់លាស់ ឬមិនដឹងរឿងពិតនៃហេតុការណ៍ ដែលអាចធ្វើឲ្យប៉ះ ពាល់ដល់កិត្តិយស និងសេចក្តីថ្លៃថ្នូរសង្គម និងប្រទេសជាតិផងដែរ។
ក្រសួងសុខាភិបាល ស្នើសុំឲ្យមានការកែតម្រូវនូវការចុះផ្សាយព័ត៌មានរបស់សារព័ត៌មានកាំបូឌាដេលី និង UCA News ស្តីពីករណីជនជាតិចិនទាំង ៦នាក់ ដូចក្រសួងបានបញ្ជាក់ជូនខាងលើនេះស្រាប់។
អាស្រ័យដូចបានជម្រាបជូនខាងលើ សូមសាធារណជនទាំងអស់មេត្តាជ្រាប និងចូលរួមលុបបំបាត់ព័ត៌មានមិនច្បាស់លាស់ ព័ត៌មានមិនពិត ព័ត៌មានខុស ឬព័ត៌មានប្រឌិត ដើម្បីរក្សាសេចក្តីថ្លៃថ្នូរក្នុងសង្គម និងមិនមានភាពចលាចលក្នុងសង្គមផងដែរ៕ ដោយ៖កូឡាប