ភ្នំពេញ ៖ ការវាយប្រហារតាមប្រព័ន្ធបច្ចេកវិទ្យាមានការកើនឡើងខ្លាំងចាប់តាំងពីដើមឆ្នាំនេះ ជាឧទាហរណ៍កាលពីថ្ងៃសៅរ៍កន្លងទៅនេះ អាជ្ញាធរប្រទេសកាណាដាបានប្រាប់ឱ្យដឹងថា មានការលួចចូលគណនីរាប់ពាន់របស់អ្នកប្រើប្រាស់ ដែលប្រើសេវាកម្មជាមួយរដ្ឋាភិបាលតាមប្រព័ន្ធអ៊ីនធឺណិត។ ការវាយប្រហារនេះគឺសំដៅទៅលើសេវាកម្ម GCKey ដែលកំពុងប្រើប្រាស់ដោយនាយកដ្ឋានចំនួន ៣០ និងគណនីរបស់ភ្នាក់ងារពន្ធដារនៃប្រទេសកាណាដា។ នេះបើតាមការផ្សាយព័ត៌មានរបស់នាយកដ្ឋានប្រឆាំងបទល្មើសបច្ចេកវិទ្យា Anti Cyber Crime Department នៅថ្ងៃទី១៨ខែសីហាឆ្នាំ២០២០។
នាយកដ្ឋានប្រឆាំងបទល្មើសបច្ចេកវិទ្យា បានឲ្យដឹងថា តាមការបង្ហាញប្រាប់ពីអាជ្ញាធរថា យ៉ាងហោចណាស់មានលេខសម្ងាត់ និងឈ្មោះអ្នកប្រើប្រាស់ចំនួន ៩០៤១ ដែលត្រូវបានលួច និងត្រូវបានព្យាយាមចូលដើម្បីប្រើសេវាកម្មរបស់រដ្ឋាភិបាល។ គណនីទាំងនេះត្រូវបានបិទចោល ក្រោយពីរកឃើញថាបានរងផលប៉ះពាល់ពីការវាយប្រហារនេះ។ ជាមួយគ្នានេះដែរទិន្នន័យគណនីរបស់ទីភ្នាក់ងារពន្ធដារប្រមាណ ៥៥០០ គណនី ក៏ត្រូវបានគេកំណត់គោលដៅនៅក្នុងការវាយប្រហារនេះ និងការវាយប្រហារមួយផ្សេងទៀតផងដែរ ហើយការចូលទៅកាន់គណនីទាំងនោះត្រូវបានផ្អាក ដើម្បីការពារព័ត៌មានរបស់អ្នកប្រើប្រាស់។
បច្ចុប្បន្នអាជ្ញាធររបស់ប្រទេសកាណាដាកំពុងស៊ើបអង្កេត ដើម្បីធ្វើការកំណត់ឱ្យច្បាស់ថាតើមានការរំលោភលើឯកជនភាព ឬ មានទិន្នន័យណាត្រូវបានទាញយកពីគណនីទាំងនោះ។ នាយកដ្ឋានប្រឆាំងបទល្មើសបច្ចេកវិទ្យា សូមឱ្យអ្នកប្រើប្រាស់មានការប្រុងប្រយ័ត្ន ក្នុងការរក្សាទុកឈ្មោះនិងលេខសម្ងាត់ ដើម្បីជៀសវាងពីការលួចយករបស់ជនអនាមិក ជាងនេះទៅទៀត សូមបងប្អូនមានការប្រុងប្រយ័ត្នជាមួយនឹងការបោកប្រាស់តាមប្រព័ន្ធបច្ចេកវិទ្យា តាមរូបភាពផ្សេងៗ ដូចជាការបន្លំតេឬផ្ញើសារថា ជាភ្នាក់ងារមកពីធនាគារដើម្បីឱ្យបងប្អូន ផ្ដល់លេខកូដឬលេខសម្ងាត់នោះ៕ ដោយ៖កូឡាប
