មណ្ឌលគីរី៖ តាមរបាយការណ៍របស់មន្ទីរទេសចរណ៍ខេត្តមណ្ឌលគីរី នាពេលឈប់សម្រាករយៈពេលវែងនេះ មានទេសចរក្នុងស្រុកប្រមាណជាង ១មុឺននាក់ ក្នុងមួយថ្ងៃ បានដើរលេងកម្សានតាមរមណីយដ្ឋាននានានៅក្នុងខេត្ត។
ភ្ញៀវទេសចរមានភាពកក់ក្តៅ រីករាយសប្បាយចិត្ត ក្នុងការមកទស្សនាសម្រាកកម្សាន្តជាលក្ខណៈគ្រួសារ នៅខេត្តមណ្ឌលគីរី ពិសេសគឺជក់ចិត្តដិតអារម្មណ៍ជាមួយអាកាសធាតុត្រជាក់ និងសម្រស់ធម្មជាតិដ៏ទាក់ទាញនៅទីនោះ។
បងប្អូនប្រជាពលរដ្ឋមានចំណាប់អារម្មណ៍ ចូលចិត្ត និងសម្រុកទៅលេងខេត្តមណ្ឌលគីរីយ៉ាងច្រើបកុះករ មិនធ្លាប់មានពីមុនមក ពិសេសកន្លែងស្នាក់នៅ ដូចជា សណ្ឋាគារ ផ្ទះសំណាក់ គឺត្រូវបានកក់ទុកពេញទាំងអស់។
ព្រមជាមួយនេះ នៅគ្រប់គោលដៅទេសចរណ៍ រមណីយដ្ឋានទេសចរណ៍ អាជីវកម្ម និងសេវាកម្មទេសចរណ៍ទាំងអស់ ត្រូវបានដាក់ឲ្យអនុវត្តនូវវិធានសុវត្ថិភាពទេសចរណ៍ និងតាមការណែនាំរបស់ក្រសួងសុខាភិបាលដើម្បីការពារ និងទប់ស្កាត់ការរីករាលដាលនៃជំងឺកូវីដ១៩ ដោយតម្រូវឲ្យមានការពិនិត្យវាស់កំដៅ ការលាងសំអាតដៃដោតអាកុល ការពាក់ម៉ាស់ និងការរក្សាគម្លាតសុវត្ថិភាព។
នៅគ្រប់គោលដៅទេសចណ៍ក៏បានរៀបចំឲ្យមានមន្ត្រីសុខាភិបាល រថយន្តសង្គ្រោះបន្ទាន់ និងកម្លាំងសម្ថកិច្ច នៅប្រចាំការ ដើម្បីត្រួតពិនិត្យសុខភាព និងការពារសុខសុវត្ថិភាព សណ្តាប់ធ្នាប់ ចរាចរណ៍ អនាម័យ បរិស្ថាន៕ ដោយ៖បញ្ញាស័ក្តិ