បន្ទាយមានជ័យ ៖ គយចល័តចាប់ឃាត់រថយន្តស៊េរីទំនើបមួយគ្រឿង កាលពីរសៀលថ្ងៃទី២ ខែកុម្ភៈ ឆ្នាំ២០១៨ ក្រោយពីសង្ស័យនាំចូលគ្មានឯកសារគយត្រឹមត្រូវ។ ប៉ុន្តែ ក្រោយមក មានការអះអាងថា ម្ចាស់រថយន្តបានបង្ហាញឯកសារគយទេ។
ប្រភពព័ត៌មានពីប៉ោយប៉ែតអោយដឹងថា៖ រថយន្តលាក់ទុកក្នុងក្លឹបហាត់ប្រាណ ត្រូវបានមន្ត្រីគយចល័ត ផ្លូវ៥០ម៉ែត្រ នៃការិយាល័យគយនិងរដ្ឋាករច្រកទ្វារអន្តរជាតិប៉ោយប៉ែតចាប់នៅក្នុងក្លឹបហាត់ប្រាណមួយកន្លែងរបស់ឈ្មោះ អ៊ុយ ឆាយ ស្ថិតចំនុចដើមពុទ្រាក្នុងភូមិក្បាលស្ពាន១សង្កាត់-ក្រុងប៉ោយប៉ែត ខេត្តបន្ទាយមានជ័យ។
រថយន្តនោះម៉ាកហ្វជូននឺរ ស៊េរីឆ្នាំ២០១៨ ពណ៍ស ចង្កូតស្តាំ ពាក់ស្លាកលេខ ថៃលេខកឋ៧៩៥៩ ឆាក់ឈើងសាវ។ ឃើញរថយន្តនេះ នាំគេនឹកឃើញថាវាដូចជាប្រភេទរថយន្តដូចគ្នានឹងរថយន្តដែលលោកវរសេនីយ៍ សូ ចាន់ណារី មេបញ្ជាការនគរបាលវរសេនាតូចលេខ៩១១-ប៉ោយប៉ែតធ្លាប់នាំចូលនិងបានប្រើ ហើយមានបញ្ហាចម្រូវចម្រាសកន្លងមក។
លោក ហ៊ុយ សុជាតិ ប្រធានការិយាល័យគយច្រកព្រំដែនអន្តរជាតិប៉ោយប៉ែតអោយសារព័ត៍មានដឹងថា:មានការចាប់រថយន្តដូចខាងលើមែន ព្រោះពីដំបូងសង្ស័យគ្មានឯកសារគយ។ ប៉ុន្តែបន្ទាប់មក ទើបមានការអះអាងថា វាមានេកសារទៅវិញ។រថយន្តនេះ មិនពាក់ព័ន្ធលោកមេប៉ូលិសព្រំដែនខាងលើដែរ។
មកទល់ថ្ងៃទី៣ ខែកុម្ភ: លោក សាំង ណន អនុការិយាល័យគយច្រកទ្វារព្រំដែនអន្តរជាតិប៉ោយប៉ែតទទួលចល័យ និយាយថា ៖ រថយន្តនោះមានឯកសារគយត្រឹមត្រូវ ហើយបាននាំចូលតាមច្រកព្រំដែនតំបន់៤០០ ស្រុកសំឡូតខេត្តបាត់ដំបង។ ដូច្នេះ គយត្រូវដោះលែងទៅវិញហើយ៕ ដោយ ៖ បន្ទាយ
