ភ្នំពេញ៖ ពិធីករសម្ដីចាក់ទឹកមិនលេច សឡា បានឡាយវីដេអូហែកខ្ទេចពីល្បិចអ្នកលក់អនឡាញបោកប្រាស់នៅប្រទេសថៃ ដោយបានលើកឡើងពីករណីមួយ ក្នុងករណីជាច្រើនទៀតថា ម្ចាស់ភាគហ៊ុនធំៗនៅក្នុងប្រទេសថៃ ឬទាក់ទងជាមួយនឹងតំណាងចែកចាយ រឿងហ្នឹងល្បីខ្លាំងមែនទែន ដែលធ្លាប់បានកើតឡើងនៅក្នុងប្រទេសថៃ នោះគឺរឿងម៉ែមុន្នី (កំពូលទ្រឹស្តីសម្តីចាក់ទឹកមិនលិច) ដែលយកហ្វេសប៊ុកជាកន្លែងដើម្បីរកស៊ីបោកប្រាស់គេ ដែលអាចស្ទាយស្រដៀងអ្នកលក់ផលិតផលអនឡាញនៅខ្មែរ ឬ យ៉ាងណា?។
ដំបូងឡើយ ម៉ែមុន្នី គាត់គ្រាន់តែជាអ្នកលក់តុក្កតាអនឡាញម្នាក់ប៉ុណ្ណោះ ប៉ុន្តែបន្តបន្ទាប់មក គាត់បានចាប់ផ្តើមកសាងខ្លួនឯងរហូតល្បីខ្លាំងមែនទែន តាមរយៈបណ្តាញសង្គមហ្វេសប៊ុក ។
តើគាត់ចាប់ផ្តើមល្បីតាមហ្វេសប៊ុក ដោយសារអ្វី?
គាត់ចាប់ផ្តើមល្បីតាមហ្វេសប៊ុក ទី១- តាមរយៈផុសរូបតាមហ្វេសប៊ុកបង្ហាញថាខ្លួនជាគឺជាកំពូលអ្នកមាន ដោយបង្ហាញផ្ទះវីឡាច្រើនកន្លែង ឡានទំនើបច្រើនគ្រឿង និងមានហាងលក់មាសទៀតផង។ ទី២- គាត់ធ្វើឲ្យគេកាន់តែចាប់អារម្មណ៍កាន់តែខ្លាំង គឺតាមរយៈឡាយតាមហ្វេសប៊ុកចែកមាស ប៉ុន្តែ ការចែកមាសនេះ គឺសុទ្ធតែជាក្រុមការងាររបស់គាត់ប៉ុណ្ណោះ ហើយនៅពេលរឿងក្តីរបស់គាត់ត្រូវបានបែកធ្លាយ និងត្រូវបានចាប់ខ្លួន ប៉ូលិសបានរកឃើញថាហាងមាសរបស់គាត់ គឺជាមាសក្លែងក្លាយ។ ទី៣- គាត់ធ្វើឲ្យគេជឿ ដោយជួលតារាល្បីៗមកហាយសូ នៅក្នុងកម្មពិធីរបស់គាត់។ អ៊ីចឹងរូបភាពជាច្រើន ដែលរូបគាត់ធ្វើឲ្យគេចាប់អារម្មណ៍ គឺតាមរយៈការបង្ហាញថាគាត់ជាមនុស្សចូលចិត្តធ្វើបុណ្យ បង្ហាញសុច្ចៈធម៌ត្រឹមត្រូវ ដោយយកព្រះពុទ្ធសាសនា យកសប្បុរសធម៌មកបាំងមុខ។
ហេតុអ្វីបានជាគេជឿទុកចិត្ត ហើយចូលចិត្តមករកស៊ីជាមួយម៉ែមុន្នី?
មូលហេតុដែលគេនាំគ្នាជឿ ហើយចូលចិត្តភ្លូកមកស៊ីបណ្តាក់ទុនជាមួយ គឺដោយសារម៉ែមុន្នី ឬ ម៉ែមនោ អួតឲ្យគេឃើញតាមហ្វេសប៊ុកថា ឲ្យតែរថយន្តស៊េរីទំនើបទើបចេញថ្មី គឺគាត់មានលុយទិញទាំងអស់, គាត់ជាមនុស្សរកស៊ីសុច្ចរិតត្រឹមត្រូវ ផុសនៅលើហ្វេសប៊ុកម្តងណាក៏បង្ហាញពីភាពមានបាន មានការ៉ាស់លក់រថយន្តទំនើបដ៏ធំ មានក្រុមហ៊ុនគ្រឿងសម្អាងល្បី មានហាងលក់មាស មានក្រុមហ៊ុននៅបរទេស និងជាផលិតករស្អីៗជាច្រើនរាប់មិនអស់។ គាត់បានបង្រៀនកូនចៅទាំងដៃឆ្វេងដៃស្តាំរាប់ពាន់ម៉ឺននាក់ ដែលមកស៊ីជាមួយត្រូវមានផ្នត់គំនិតដោយអួតស្មើៗគ្នាប្រាប់គេថា ឥឡូវនេះមានខ្លាំងណាស់ មានលុយទិញឡាន មានលុយទិញផ្ទះ លុយចាយលែងអស់ហើយ ចង់ឲ្យអ្នកទាំងអស់គ្នាមកមានទាំងអស់គ្នា មកកើបលុយទាំងអស់គ្នា កុំឲ្យក្រទៀត ប៉ុន្តែ ចុងក្រោយផ្ងារជើងគ្រប់គ្នាតែម្តង។
សឡា ក៏បានបញ្ជាក់ឡើងបះសក់ថា នៅពេលចាប់ខ្លួន ប៉ូលិសក៏បានរកឃើញទៀតថា ឡានទំនើបៗដែលម៉ែមុន្នី អួតបង្ហាញតាមហ្វេសប៊ុក តាមពិតគឺសុទ្ធតែឡានជួលគេទាំងអស់។
ទោះយ៉ាងណា ការទម្លាយចេញពីព័ត៌មានករណីតំណាងចែកចាយដ៏ធំរកស៊ីបោកប្រាស់គេនៅស្រុកថៃខាងលើនេះ សឡា ថាខ្លួនមិននិយាយសំដៅ ឬ ប្រៀបធៀបករណីនេះទៅនឹងបុគ្គលណានោះទេ តែចង់ឲ្យបងប្អូនទាំងអស់គ្នា ស្តាប់ហើយឈ្វេងយល់ខ្លួនឯងទៅ៕ ដោយ៖ លឹម ហុង
