ខេត្តព្រះសីហនុ ៖ ភ្ញៀវទេសចរច្រើន សំរាមក៏មិនតិចដែរ។ សំរាមនៅតាមឆ្នេរសមុទ្រ កើតឡើងពីពលរដ្ឋ និងអ្នកទេសចរណ៍មួយចំនួនដែលបោះចោលឥតសណ្តាប់ធ្នាប់ បន្សល់ទុកសំរាមរបស់ខ្លួន ពាសវាលពាសកាល មិនប្រមូលយកទៅដាក់ក្នុងធុងសំរាម ។ ករណីនេះ មន្ត្រីនិងក្រុមសម្អាតបរិស្ថាន បានចុះកើបសម្អាតជាបន្តបន្ទាប់ ។
ក្រសួងបរិស្ថាន បានចេញផ្សាយព័ត៌មានលើផេកហ្វេសប៊ុកនៅព្រឹកថ្ងៃទី២០ ខែសីហា ឆ្នាំ២០២០នេះថា ទេសភាពឆ្នេរសមុទ្រស្អាតណាស់ ប៉ុន្តែសំរាមទាំងនេះ បានធ្វើឱ្យទេសភាពទាំងនេះប្រែជាអាក្រក់!។ តើយើងអាចចូលរួមទាំងអស់គ្នា ដើម្បីថែរក្សាឆ្នេរសមុទ្រយើងឱ្យស្រស់ស្អាតជារៀងរហូតទេ? បងប្អូនត្រូវវេចខ្ចប់សំរាម និងទុកដាក់ក្នុងធុងសំរាមនៅក្បែរនោះ មិនគួរណាបោះចោលអនាធិបតេយ្យយ៉ាងនេះទេ! បងប្អូនដើរកម្សាន្តចង់បានទេសភាពស្អាត ចុះបើបងប្អូនមួយចំនួនតូចមិនចូលរួមថែរក្សា ហើយបន្សល់ទុកសំរាមរបស់ខ្លួន ពាសវាលពាសកាលដូច្នេះ តើបងប្អូនប្រជាពលរដ្ឋផ្សេងទៀតនឹងមកទស្សនាទីនេះទៀតទេ? សូមចូលរួមថែរក្សាអនាម័យបរិស្ថាន និងវេចខ្ចប់ទុកដាក់សំរាមឱ្យបានត្រឹមត្រូវ! ទោះបីបងប្អូនអញ្ជើញដល់ទីណាក៏ដោយ សូមចាត់ទុកទីកន្លែងនោះជាផ្ទះរបស់យើង ចូលរួមសម្អាតបរិស្ថានយើង! ជាមួយគ្នានេះ ក្រសួងបរិស្ថាន ក៏សូមថ្លែងអំណរគុណចំពោះបងប្អូនប្រជាពលរដ្ឋភាគច្រើន ដែលបានប្រកាន់ខ្ជាប់នូវអនាម័យបរិស្ថាន! រមណីយដ្ឋានស្អាត បរិស្ថានល្អ។
ចំណែកផេកហ្វេសប៊ុក ប្រជាជនខេត្តព្រះសីហនុ នៅថ្ងៃនេះដែរ បានចេញសារមួយថា ជួយផ្ដល់យោបល់ សុំចិត្តពីបងប្អូនបានទេ បរិភោគរួចកាកសំណល់ និងសំរាម សូមវេចខ្ចប់ និងទុកដាក់ក្នុងធុងសំរាមឲ្យមានអនាម័យ។
នាថ្ងៃទី១៩ ខែកក្កដា ឆ្នាំ២០២០ លោក សរ កក្កដា អភិបាលស្រុកព្រៃនប់ បានដឹកនាំការប្រមូលសំរាម និងសម្អាតអនាម័យ នៅតំបន់ទេសចរណ៍ ឆ្នេរពយជំទាវម៉ៅ ស្ថិតក្នុងឃុំបិតត្រាំង ស្រុកព្រៃនប់ ខេត្តព្រះសីហនុ ។
បងប្អូនមួយចំនួនហាក់នៅតែមិនព្រមចូលរួម ក្នុងកិច្ចការពារបរិស្ថាន អនាម័យ កាកសំណល់សំរាម ដែលសល់ពីការបរិភោគ បែរជាចោលពាសវាលពាសកាល ដែលធ្វើឲ្យខូចសោភ័ណភាពតំបន់ទេសចរណ៍ និងកន្លែងកម្សាន្ដ ហើយគ្មានអ្វីក្រៅពីត្រូវបានអាជ្ញាធរមូលដ្ឋាន រួមជាមួយក្រុមហ៊ុនប្រមូលសំរាមរើសប្រមូលយកចេញ។
ជាថ្មីម្តងទៀត លោក សរ កក្កដា អភិបាលស្រុកព្រៃនប់បានសំណូមពរដល់បងប្អូនប្រជាពលរដ្ឋ ដែលមកលេងកម្សាន្ត មេត្តាវេចខ្ចប់ និងទុកដាក់សំរាមឲ្យបានត្រឹមត្រូវក្នុងធុងសំរាម៕
ដោយ៖កូឡាប