ខេត្តកំពង់ធំ ៖ នៅថ្ងៃសុក្រ ថ្ងៃទី២ ខែកុម្ភៈ ឆ្នាំ២០១៨ ក្រសួងបរិស្ថាន បានរៀបចំទិវាដីសើមពិភពលោកនៅខេត្តកំពង់ធំ ក្រោមប្រធានបទ «តំបន់ដីសើម ដើម្បី និរន្តរភាពទីក្រុង នាពេលអនាគត»។ ព្រឹត្តការណ៍នេះប្រព្រឹត្តទៅដោយមានការចូលរួមពីលោកស្រី ម៉ី ប៊ុតវិទ្យា អនុរដ្ឋលេខាធិការក្រសួងបរិស្ថាន តំណាងគណៈអភិបាលខេត្តកំពង់ធំ រួមទាំងថ្នាក់ដឹកនាំមន្ត្រីរាជការ នៃមន្ទីរ អង្គភាពនានា សិស្ស និស្សិត តំណាងអង្គការដៃគូ និងអាជ្ញាធរដែនដី។
លោក ស្រី ស៊ុនលាង ប្រធាននាយកដ្ឋានអភិរក្សតំបន់ដីសើមទឹកសាបនៃអគ្គនាយកដ្ឋានរដ្ឋបាលការពារ និងអភិរក្សធម្មជាតិ ពិធីនេះក្នុងគោលបំណងអប់រំ ផ្សព្វផ្សាយពីតម្លៃនៃតំបន់ដីសើម ដល់សាធារណៈជន ប្រជាសហគមន៍ ជាពិសេស សិស្ស និស្សិត យុវជនកម្ពុជា។
លោកស្រី ម៉ី ប៊ុតវិទ្យា អនុរដ្ឋលេខាធិការក្រសួងបរិស្ថាន មានប្រសាសន៍ថា៖រាជរដ្ឋាភិបាលកម្ពុជាបានដាក់តំបន់ដីសើមបួនកន្លែង ជាតំបន់រ៉ាមសារដែលមាន ផ្ទៃក្រឡា សរុប ៧៥.៩៤២ហិកតា ដែលស្ថិតនៅទីតាំងភូមិសាស្ត្រ និងប្រព័ន្ធ អេកូឡូស៊ី៣ ផ្សេងៗគ្នា គឺតំបន់បឹងទន្លេ សាប តំបន់ ទន្លេ មេគង្គ និងតំបន់ឆ្នេរ។ បច្ចុប្បន្ននេះក្រសួង បរិស្ថាន បាននឹងកំពុងដំណើរការរៀបចំដាក់បញ្ចូល តំបន់ស្នូលស្ទឹងសែន នៃឋបនីយជីវមណ្ឌលបឹងទន្លេសាបដែលមានភូមិសាស្ត្រក្នុងខេត្តកំពង់ធំនេះជាតំបន់រ៉ាមសារ ទីប្រាំរបស់ កម្ពុជា។ លោកស្រី បានបន្ថែមថា នាពេលថ្មីៗកន្លងទៅនេះ រាជរដ្ឋាភិបាល ដែល មាន ក្រសួង បរិស្ថាន ជាសេនាធិការ បានធ្វើ ជា ម្ចាស់ផ្ទះរៀបចំសន្និសីទថ្នាក់តំបន់ស្តីពី “និរន្តរភាពតំបន់ដី សើមជាយក្រុង” ដែល សន្និសីទ ថ្នាក់តំបន់នេះមានការចូលរួមពីបណ្តាប្រទេសហត្ថលេខីចំនួន ១៧ ដោយបានធ្វើការ ចែក រំលែកនូវបទពិសោធន៍ ពិភាក្សាអំពីបញ្ហាជាអទិភាព និងគោលនយោបាយ ថ្មីៗ ដើម្បីការពារ និង ប្រើប្រាស់ធនធាន ធម្មជាតិតំបន់ ដីសើម នេះប្រកបដោយនិរន្តរភាព។ នេះជាភស្តុតាងមួយ បង្ហាញ ពីការប្តេជ្ញាចិត្តរបស់រដ្ឋាភិបាល ក្នុង ការ ចូលរួម ជាអន្តរជាតិ ក្នុងការការពារ និងគ្រប់គ្រង តំបន់ដីសើម សំរាប់ផល ប្រយោជន៍ មនុស្សជាតិ និងជីវចម្រុះ។
លោកស្រី បានបញ្ជាក់ទៀតថា៖ដើម្បីកាត់បន្ថយនូវផលប៉ះពាល់ ក៏ដូចជាបញ្ហាប្រឈមទាំងនេះ យើងគួរគប្បីធ្វើការងារមួយចំនួន រួមគ្នាដើម្បីការពារតំបន់ ដីសើមដូចជា ៖ ធ្វើផែនការអភិវឌ្ឍភូមិដ្ឋាន ដែលមានផលប៉ះពាល់ជាអប្បបរមាដល់តំបន់ដីសើមប្រើប្រាស់ដីកសិកម្មរបស់យើងអោយអស់លទ្ធ ភាព ជៀសវាងការពង្រីកដីកសិកម្ម ដោយ គ្មាន ការអនុញ្ញាត្ត និងគ្មានផែនការប្រើប្រាស់ដីធ្លីច្បាស់លាស់ ស្វែងរកបច្ចេកទេសដាំដុះ ដែលប្រើប្រាស់ទឹកតិច និងអាចទទួលផលច្រើន កាត់បន្ថយ ឬជៀសវាងការប្រើប្រាស់ជីគីមី និងថ្នាំគីមីហួសកំរិតជាដើម និងចូលរួមផ្សព្វផ្សាយពីតម្លៃនៃតំបន់ដីសើម និងប្រើប្រាស់ធនធានតំបន់ដីសើម ឱ្យមាននិរន្តរភាព ជាដើម។ល៕ ដោយ ៖ បញ្ញាស័ក្តិ