ភ្នំពេញ៖ លោកបណ្ឌិត សុខ ទូច បានចុះទៅពិនិត្យដោយផ្ទាល់ដល់ក្នុងព្រៃ កន្លែងដែលក្រុមឈ្មួញលបលួចកាប់ដើមឈើធំៗមានតម្លៃ ដូចជាធ្នង់ គ្រញូង ឈ្លីក និងផ្ចឹក ដើម្បីយកទៅលក់ក្នុងទីផ្សារងងិត។ ប៉ុន្តែទោះយ៉ាងណា លោកបណ្ឌិត ពុំបានបញ្ជាក់ទីកន្លែងពិតប្រាកដថានៅក្នុងតំបន់ណានោះទេ។
លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា នៅថ្ងៃទី២០ ខែសីហា ឆ្នាំ២០២០នេះ បានសរសេរសារលើហ្វេសប៊ុកផ្លូវថា ថ្ងៃនេះជាថ្ងៃសម្រាក ប៉ុន្តែក្រុមការងារយើង មិនបានឈប់សម្រាកនោះទេ ព្រោះក្រុមចោរកាប់ឈើកាន់តែច្រើន។
លោកបណ្ឌិត បានបញ្ជាក់ថា លើកនេះក្រុមចោរយកតែឈើធំៗ ដែលមានទំហំចាប់ពី២ឱបឡើងទៅ ហើយឈើដែលពួកនេះ ត្រូវការទំហំចាប់ពី២ឱបទៅមានឈើឈ្លីក និងផ្ចឹក ចំណែកឈើដែលពួកនេះ យកចាប់ពី២តឹកទៅ៣តឹកឡើងទៅមានដូចជាធ្នង់ និងគ្រញូង ដែលពួកនេះ កាប់យកតែឈើប្រវែង១ម៉ែត្រទៅមួយម៉ែត្រកន្លះឡើងទៅ៕ ដោយ៖កូឡាប
